Bokosi la Mafumbu
◼ Kumbi titenere kugwiriskiya ntchitu intaneti pakupharazga pamwenga kusambira Bayibolu ndi ŵanthu ambula kuŵaziŵa wo aja ku charu chinyaki?
Apharazgi anyaki agwiriskiya ntchitu Intaneti kuti ayambi kusambira Bayibolu ndi ŵanthu wo aja m’charu cho ntchitu yidu njakukanizgika pamwenga ko kulivi apharazgi anandi. Nyengu zinyaki abali ndi azichi asaniya ŵanthu akusambira nawu. Kweni nyengu zinyaki kukambiskana ndi ŵanthu pa intaneti wo tileka kuŵaziŵa nkhwakofya. (Wonani Uteŵeti Widu wa Ufumu wa Chichewa wa July 2007, peji 5.) Chinanga kuti chilatu chidu nchakuti tipharazgiyi ŵanthu a mtima wamampha, kweni tingayamba kucheza ndi ŵanthu aheni pamwenga akugaruka. (1 Ŵakor. 1:19-25; Ŵakol. 2:8) Kweniso m’vyaru vo ntchitu yidu njakukanizgika, ŵaraŵara aboma angaziŵa asani tipharazgiya munthu pa Intaneti. Ivi vingachitiska kuti abali ndi azichi a m’charu ichi akumani ndi masuzgu. Mwaviyo, titenere cha kupenja ŵanthu a m’charu chinyaki pa Intaneti kuti tiŵapharazgiyi uthenga wamampha.
Asani tapharazgiya munthu wambula kumuziŵa wa m’charu chinyaki, tikhumbika cha kulutirizga kusambira nayu asani iyu wawere kwawu. Tingalutirizga kumusambiza pija asani tapempheka ndi ofesi ya nthambi. M’malu mwaki, titenere kumulongo mo wangagwiriskiya ntchitu jw.org kuti waziŵi vinandi pamwenga mo wangachitiya kuti wakakambiskani ndi abali ku ofesi ya nthambi ya m’charu chaki. Tingamuchiska so kuti wakaluti ku Nyumba ya Ufumu yo ye kufupi ndi ko waja kuti wakawoni mo tichitiya maunganu. Kweni m’vyaru vinyaki mulivi Nyumba za Ufumu. Asani wakhumba kuti Akaboni akamuyendiyengi mukhumbika kulemba fomu yakuti Kaonaneni ndi Wachidwi Uyu (S-43). Asani mwamaliza kulemba fomu iyi, mukapereki kwa mlembi yo wazamutumiza ku ofesi ya nthambi kuziya pa jw.org pamwenga pa Imelu pamwenga munevulupu. Ofesi ya nthambi ya m’charu cho munthu yo waja ndiyu yingaziŵa umampha mo vinthu viliri m’charu chaki. Abali yaŵa ndiwu angamuwovya umampha mwauzimu.—Wonani Uteŵeti Widu wa Ufumu wa June 2014, peji 7 ndi Uteŵeti Widu wa Ufumu wa Chichewa wa November 2011, peji 2.
Asani munthu yo tisambira nayu waluta ku charu chinyaki pamwenga tisambira ndi munthu wa m’charu chinyaki yo tamuziŵiya pa intaneti, tikhumbika kulondo ulongozgi wo walembeka m’nkhani iyi. Kweni tingachita umampha kulutirizga kusambira nayu mpaka po m’bali wa m’charu chaki wasanirikiya kuti wasambirengi nayu. Kweni asani waluta ku charu cho ntchitu yidu njakukanizgika, tikhumbika kuphwere ukongwa asani tikambiskana nayu pa kalata, pa foni pamwenga pa intaneti.—Mat. 10:16.