Mulutengeku Mwaliŵi ku Ŵanthu Akunweka

Kutuliya po Webusayiti yidu yikunozgeke so, ŵanthu anandi apempha sambiru la Bayibolo mwakugwiriskiya nchitu malu ngenanga. Ŵanthu anandi ayamba so kupempha sambiru chifukwa cha nthowa zasonu zakupharazgiya ko kusanirika ŵanthu anandi. Ofesi ya nthambi yinozga mwaliŵi kuti apharazgi akakumani ndi ŵanthu ŵenaŵa. Mwakuyeruzgiyapu, asani munthu wapempha sambiru kuporote pa jw.org, ŵara a m’chigaŵa chaki alonde uthenga wakuŵaziŵiska va munthu mwenuyu asani pajumpha ŵaka mazuŵa ngaŵi. Kweni malipoti ngalongo kuti apharazgi ato masabata nganandi kuti aluteku ku ŵanthu wo apempha masambiru nga Bayibolo. Kumbi tingachita wuli kuti tiwovyi ŵanthu ŵenaŵa ŵeche ndi linweka?—Marko 4:14, 15.

Asani mwakumana ndi munthu yo wakhumbisiska kusambira Bayibolo kweni ngwa m’chigaŵa chinu cha, mulembengi mwaliŵiliŵi fomu ya Kaonaneni ndi Wachidwi Uyu (S-43) ndipu muyiperekengi kwa mlembi pechendajumphi sabata yimoza. Mlembi watenere kuziŵiska mpingu wakwenere pamwenga ofesi ya nthambi va munthu uyu pechendajumphi mazuŵa ngaŵi mwakugwiriskiya nchitu Webusayiti yidu ya jw.org. Ŵara atenere kuwona mauthenga pa Webusayiti iyi kaŵikaŵi. Asani alonde uthenga wakuti munthu munyaki wakhumba kusambira Bayibolo, atenere kulutaku mwaliŵi. Asani mpharazgi wapempheka kuti wakawonani ndi munthu uyu watenere kuwona kuti nkhani iyi njakukhumbika ukongwa. Asani mwachimusaniya cha panyumba paki, mungachita umampha kusiya kapepala ka nambala yinu ya foni kweniso ko muja.