Mujengi Akuphwere mu Uteŵeti
1. Kumbi nchifukwa wuli tikhumbika kuja akuphwere asani tipharazga?
1 Ateŵeti aku Chiuta ŵe “nge ndi mberere mukati mu zimphumphi,” ndipu apharazga mukati mwa “mgonezi wakunyongoroka ndi wakupuruska.” (Mate. 10:16; Ŵafi. 2:15) Tituvwa nkhani zinandi zakofya nge, nkhondu, vivulupi kweniso kuba ŵanthu ndi kuŵabaya, uwu mbukaboni wakuti ŵanthu aheni ‘ŵarutirizgengi kuchita uheni.’ (2 Timo. 3:13) Kumbi ndi fundu nizi za m’Malemba zo tingagwiriskiya nchitu kuti zitiwovyi ‘kuja akuchenje’ mu uteŵeti?—Mate. 10:16.
2. Kumbi ndi vakuchitika nivi vo vingakuchitiskani kutuwamu muchigaŵa cho mupharazga ndi kuchipharazga kunyaki?
2 Chitani Vinthu Mwazeru: Lemba la Nthanthi 22:3 lilongo kuti nchinthu chazeru ‘kubisama’ asani mwawona chirwani. Mbuneneska kuti mutenere kuphwere. Vakuchitika va muchigaŵa chinu vingasintha mwamabuchibuchi. Nyengu zinyaki mungawona kuti mu msewu mwazaza apolisi pamwenga ŵanthu. Vingachitika kuti munthu yo mutimupharazgiya watikutcheŵeskani. M’malu mwakuzerezga ndi kukhumba kuwona vo vichitika, mungachita umampha kutuwamu mwaliŵi mu chigaŵa cho ndi kuchipharazga kunyaki.—Ntha. 17:14; Yoha. 8:59; 1 Ŵatesa. 4:11.
3. Kumbi fundu yo ye pa lemba la Wakutaula 4:9, tingayigwiriskiya wuli nchitu mu upharazgi?
3 Mupharazgengi ndi Anyinu: Lemba la Wakutaula 4:9 likamba kuti: “Kuŵa ŵaŵi nkhwamampha kwakuruska yumoza.” Chinanga kuti mukuziŵiriya kupharazga mwija, kumbi sonu kuchigaŵa cho mupharazgaku kulivi chechosi chakofya? Mu vigaŵa vinyaki mwakofya cha kweni mu vigaŵa vinyaki mwakofya ukongwa ndipu azichi pamwenga ŵana angapharazga cha ŵija ukongwa nyengu ya mazulu. Ivi vilongo kuti nkhwakukhumbika ukongwa kupharazganga mwe ndi munthu munyaki. (Waku. 4:10, 12) Asani mupharazga ndi gulu, mutenere kuŵanaŵaniya anyinu wo mwe nawu mu chigaŵa cho. Muyesesengi kuŵakambiya asani mwamaliza kupharazga.
4. Kumbi tingachita wuli kuti tosi tivikiliriki mumpingu?
4 Ŵara ‘alindiya maumoyu ngidu’ mwaviyo, ŵe ndi udindu wakutipaska ulongozgi wo ungatiwovya pa vo vichitika mu chigaŵa chidu. (Ŵahe. 13:17) Asani tilongo jalidu lachikhristu lakujithereska ndipuso kukoliyana ndi ŵara, Yehova watitumbikengi. (Mika. 6:8; 1 Ŵako. 10:12) Mwaviyo, tosi titenere kujipereka pa nchitu yakupharazga mu chigaŵa chidu kweni nyengu zosi tijengi akuphwere.