Kumbi Mwe Akunozgeka Kusintha?
1. Kumbi tikhumbika kusintha vinthu wuli chifukwa cha kusintha kwa vakuchitika va charu?
1 Pa 1 Ŵakorinte 7:31 Bayibolo liyeruzgiya kusintha kwa vakuchitika va charu ichi ndi ŵanthu wo achita masaza pa bwalu la seŵeru mwakusinthanasinthana. Tikhumbika kusintha nthowa zo tipharazgiya, nyengu ndipuso nkhani zo tikambiskana ndi ŵanthu, chifukwa vakuchitika va charu ichi visinthasintha. Kumbi mwe akunozgeka kusintha?
2. Nchifukwa wuli tikhumbika kusintha kuti tiyendiyengi limoza ndi gulu laku Yehova?
2 Nthowa zo Mupharazgiya: Mpingu wachikhristu ukwamba kali kusintha vinthu. Pakwamba, Yesu wachituma akusambira ŵaki, wanguŵakambiya kuti angapinganga chakurya pamwenga ndalama cha. (Mat. 10:9, 10) Kweni pavuli paki, Yesu wanguzisintha ulongozgi uwu wati wawona vinthu vakusuzga vo akusambira ŵaki atingi azikumanengi navu ndipuso mo nchitu yakupharazga yatingi yizilutiyengi panthazi m’vigaŵa vinyaki. (Luka 22:36) Mwakuyeruzgiyapu, kali gulu laku Yehova lagwiriskiyanga nchitu nthowa zakupambanapambana pakupharazga nge, makadi, kupharazga pa wayilesi ndipuso magalimotu nga masipika, malinga ndi vakuchitika va panyengu yo. Chifukwa chakuti ŵanthu mazuŵa nganu asanirika kaŵikaŵi cha panyumba, gulu laku Yehova lititichiska kuti tigwiriskiyengi nchitu nthowa zakupambanapambana, kusazgiyapu pa kupharazga nyumba ndi nyumba ndipuso upharazgi wa mwamwaŵi. Tichiskika so kuchita upharazgi wa nyumba ndi nyumba chakumazulu asani ŵanthu awe kunchitu. Kumbi titende limoza ndi gareta laku Yehova kwekosi ko lingalazga?—Ezek. 1:20, 21.
3. Kumbi kusintha upharazgi widu kungawovya wuli kuti tiŵafiki pamtima ŵanthu a m’chigaŵa chidu?
3 Ziŵani vo Mungakamba: Kumbi ndi nkhani nizi zo ŵanthu adandawula nazu m’chigaŵa chinu? Ndalama? Mabanja? Nkhondu? Nkhwamampha kuziŵa masuzgu ngo ŵanthu akumana nangu panyengu yo ndipuso mo vinthu viliri m’chigaŵa chidu kuti tinozgeke nkhani zakwenere zo tingakambiskana nawu. (1 Ŵakor. 9:20-23) Asani ŵeneku a nyumba akamba masuzgu ngo akumana nangu, tingachita umampha kukambiskana nawu nkhani yeniyo, m’malu mwakuŵachichizga kuti tikambiskani nawu vo tanozgeke.
4. Nchifukwa wuli tikhumbika kusintha mwaliŵi upharazgi widu?
4 Pambula kuswera yapa, kusinthasintha kwa “vinthu” mu charu ichi kumalengi, ndipu chisuzgu chikulu chiyambengi. ‘Nyengu yafupika.’ (1 Ŵako. 7:29) Vingaja umampha ukongwa kusintha liŵiliŵi upharazgi widu kuti tipharazgiyi ŵanthu anandi m’nyengu yimanavi yo yajaku.