Mo Tingasazgiyaku Lusu Lidu mu Uteŵeti—Kuŵanaŵaniya wo Titiŵapharazgiya

Nchifukwa Wuli Nkhwakukhumbika? Yesu waziŵanga kuti munthu weyosi ngwakupambana ndi munyaki, ndipu wayanjanga munthu weyosi paku yija. Mwakuyeruzgiyapu, nyengu yinyaki Yesu wanguwona kuti munthu munyaki yo wasuzgikanga kuvwa wenga ndi soni ndipu wangumutole kumphepeti ndi kumuchizga kuti ŵanthu anyaki aleki kuwona vo wamuchitiya. (Marko 7:31-35) Wangulongo so kuti waŵanaŵaniya akusambira ŵaki chifukwa chakuti waziŵanga vo angafiska ndi vo angaleka kufiska ndipu waŵasambizanga cha vinthu vinandi pa nyengu yimoza. (Yoh. 16:12) Ndipu chinanga mphanyengu yo wangulutiya kuchanya, Yesu walongonga mbwenu kuti waŵanaŵaniya akusambira ŵaki. (2 Tim. 4:17) Nasi tikhumbika kwezga Khristu, chifukwa te akusambira ŵaki. (1 Pet. 2:21; 1 Yoh. 3:16, 18) Kweniso tingaja apharazgi alusu ukongwa asani tilongo kuti tiŵanaŵaniya munthu yo tipharazgiya ndipuso asani tiziŵa mo vinthu viliri pa umoyu waki, vo watanja kweniso masuzgu ngaki. Iyu wangavwisiya ukongwa asani wawona kuti chilatu chidu nkhumupharazgiya pamwenga kumugaŵiya ŵaka magazini cha, kweni kuti titimuŵanaŵaniya ndi kumuwona kuti ngwakukhumbika.

Mo Mungachitiya:

Munozgekiyengi umampha. Mujengi akufwatuka, mumwemwetiyengi kweniso muchitengi vinthu mwachanju.
Muŵanikengi mo vinthu viliri. Kumbi muwona kuti munthu yo mutimupharazgiya we ndi ŵana? Kumbi watanja kulima pamwenga kuŵeta viŵetu? Kumbi wawoneka kuti wagomezga vinthu vinyaki vachisopa? Asani mungaŵanika vinthu ivi, mungasuzgika cha kusintha nkhani yo mukhumba kukambiskana nayu kuti yimukondweski.
Mumufumbengi kuti wakonkhoski maŵanaŵanu ngaki ndi kuvwisiya mpaka wamalizi kukonkhoska. Mulereskanengi nayu wachikonkhoska kuti waziŵi kuti mutimuvwisiya. Mumuwongengi chifukwa cha vo wakonkhoska ndi kumulumba ndi mtima wosi. Muchitengi vinthu mwakuphwere kuti muleki kupindana nayu.
Munozgekengi kusintha. Asani nkhwamachitika musinthengi upharazgi winu kuti ukolerani ndi nkhani yo munthu yo mutimupharazgiya wangayanja kuti mukambiskani. Kuchita ivi nkhwakusuzga cha chifukwa timapepala, timabuku, kweniso magazini ngaja ndi nkhani zakupambanapambana. Asani muwona kuti munthu yo mukhumba kumupharazgiya watangwamika, mungakambiskananga nayu nyengu yitali cha.

Yesani Kuchita ivi Mwezi Wunu:

Asani muchita kusopa kwa pabanja yesani kuchita vakuyeruzgiyapu va mo mungasinthiya upharazgi. Ndipu asani mwe mu upharazgi yesani kusintha kuti vo mukamba vikolerani ndi vo mwenechu wa nyumba wakamba.
Pamaunganu nganyaki ngakunozgeke uteŵeti wa kumunda mubali yo walongozga wakonkhoski pamwenga wachiti chakuyeruzgiyapu chakulongo mo tingalongole kuti tiŵanaŵaniya ŵanthu mu upharazgi.