Bokosi La Mafumbu

◼ Kumbi muzichi watenere kuvwala chinthu kumutu pakuchitiska sambiru la Bayibolo lakudumuwa pakhomu la munthu kwambula kuja pasi asani wayenda ndi m’bali?

Asani mzichi wachitiska sambiru lo wachitiska nyengu zosi ndipu we ndi m’bali, watenere kuvwala chinthu kumutu. (1 Ŵakor. 11:3-10) Chigongwi cha Alinda cha Chichewa cha July 15, 2002, papeji 27 chikamba kuti: “Pa nyengu iyi muja kuti mwapangana nayu kali munthu yo musambira nayu. Mwaviyo, munthu yo wachitiska sambiru ndiyu waja mulongozgi. Sambiru laviyo nchigaŵa cha vakuchitika va mpingu. Asani mzichi wakubatizika ndiyu wachitiska sambiru laviyo ndipu we ndi m’bali wakubatizika, watenere kuvwala chinthu kumutu.” Wangachita venivi pakuchitiska sambiru la Bayibolo mwakuja pasi, mwakuma wima pamwenga pamalu ngengosi.

Chinanga kuti chilatu cha ulendu wakuweriyaku nkhwambiska sambiru la Bayibolo pamwenga kukambiskana nkhani yinyaki mwakugwiriskiya nchitu buku lakuchitiskiya sambiru, palivi chifukwa chakuti muzichi yo wayenda ndi m’bali wavwali chinthu kumutu asani sambiru lechendajalikiskiki. Kanandi sambiru lakudumuwa lo munthu wachitiska kwambula kuja pasi lijalikiskika kamanakamana, mwaviyo asani mwaweliyaku maulendu nganandiku ndipu muwona kuti munthu yo mukambiskana nayu waluta panthazi, mzichi wangawona nyengu yakwenere kuvwala chinthu kumutu asani mwe ndi m’bali.