Kumbi Mujengi Aphamphu mu Nyengu ya Chikumbusku nge Yehova ndi Yesu?
1. Kumbi Akaboni aku Yehova achitanji mu nyengu ya Chikumbusku?
1 Yehova wachita vinthu mwaphamphu kuti wafiski chilatu chaki. Pakukamba za vitumbiku vo tazamulonde mu Ufumu waku Chiuta, lemba la Yesaya 9:7 lititisimikizgiya kuti: “Phamphu la Ambuya a maŵanja likachitanga ichi.” Mwana waku Chiuta nayu wanguchita vinthu mwaphamphu we pacharu chapasi. (Yoh. 2:13-17; 4:34) Chaka chechosi mu nyengu ya Chikumbusku, apharazgi anandi pacharu chosi chapasi achita vinthu mwaphamphu nge Yehova ndi Yesu, mwakusazgiyaku uteŵeti wawu. Kumbi namwi muchitengi phamphu?
2. Kumbi ndi nchitu niyi yo tigwirengi kwambiya pa 7 March?
2 Kudaniya Ŵanthu ku Chikumbusku: Chaka chinu, nchitu yakudaniya ŵanthu ku mwambu uwu yiyambengi pa Chisulu, 7 March. Yambani sonu kunozgeke kuti muzigwireku nchitu iyi. Mipingu yazamukondwa ukongwa chifukwa chakuyesesa kudana ŵanthu a m’chigaŵa chawu chosi. Pakhumbika phamphu kuti tizidani wo tisambira nawu Bayibolo, wo tigwira nawu nchitu, achibali ndipuso wo tisambira nawu sukulu mwakugwiriskiya nchitu timapepala pamwenga jw.org/tog.
3. Kumbi tingachita wuli kuti tisazgiyeku uteŵeti widu mu March ndi April?
3 Upayiniya Wakovya: Phamphu lazakutiwovya kuti tizisazgiyeku uteŵeti widu. Tikayika cha kuti ŵanthu anandi azamuchita upayiniya wakovya wa maola 30 mu March ndi April. Asani mukhumba kuzichita upayiniya wakovya pa nyengu iyi, rombani kwaku Yehova pa sambiru lakumwija pamwenga pa kusopa kwa pabanja kuti wakuwovyeni. (Nthanthi 15:22) Phamphu linu lingachiska so anyaki mumpingu kuti nawu azigwireku nchitu iyi. Asani mungasintha vinthu pa umoyu winu kuti muchiti vinandi mu uteŵeti, ndikuti muchita phamphu nge Yesu.—Marko 6:31-34.
4. Kumbi tiyanduwa wuli asani tichita vinthu mwaphamphu nge Yehova ndi Yesu?
4 Tazamuyanduwa ukongwa chifukwa cha kuchita vinthu mwaphamphu nge Yehova ndi Yesu mu nyengu ya Chikumbusku. Ŵanthu anandi m’chigaŵa chidu azamukuvwa uthenga wamampha. Tazamukondwa ukongwa chifukwa cha kuteŵete Yehova ndipuso kupharazgiya ŵanthu. (Mac. 20:35) Tikayika cha kuti Chiuta ndi Mwana waki ndiwu azamukondwa ukongwa.