Mugwiriskiyengi Nchitu Kabuku Kakuti, “Kumbi M’Mazu Ngaku Chiuta mwe Nkhani Nizi?”

1. Kumbi tikulonde kabuku wuli ko kangatiwovya mu uteŵeti?

¹ Pa unganu wa Chigaŵa wa 2014 tingulonde kabuku kakuti, “Kumbi m’Mazu Ngaku Chiuta mwe Nkhani Nizi?” Kumbi tingakagwiriskiya wuli nchitu asani tinozgeke uteŵeti? Kabuku yaka kangatiwovya ukongwa kuti tiyambi kukambiskana ndi ŵanthu chifukwa kakulembeka mwakuyanana ndi buku la Kukambitsirana.

2. Kumbi tingagwiriskiya wuli nchitu kabuku kakuti, “Kumbi M’Mazu Ngaku Chiuta mwe Nkhani Nizi?”

² Mungagwiriskiya nchitu fumbu la nambala 8, ndipu mungakamba kuti: “Tikambiskana ndi ŵanthu fumbu lakuti, ‘Kumbi Chiuta ndiyu wachitiska masuzgu ngo tikumana nangu?’ [Lindizgani kwamuka. Muvigaŵa vinyaki, vija umampha kumulongo fumbu mweneku wa nyumba.] Bayibolo limuka fumbu lenili.” Ŵerengani kutuliya m’Bayibolo malemba ngo nge pa fumbu la nambala 8. Asani mweneku wa nyumba wakhumba kuziŵa vinandi, mungamulongo mafumbu 20 ngo nge papeji lakwamba kuti wasankhepu fumbu lo mungazikambiskana pa ulendu wakulondopu. Pamwenga mungamugaŵiya buku lelosi lo tigwiriskiya nchitu pakusambira ndi ŵanthu lo mwe fundu yakuyanana ndi yo mwakambiskananga.

3. Kumbi tingagwiriskiya wuli nchitu kabuku kakuti, “Kumbi M’Mazu Ngaku Chiuta mwe Nkhani Nizi?” asani tipharazgiya ŵanthu wo mbakhristu cha?

³ Asani mupharazgiya ŵanthu wo mbakhristu cha, mungagwiriskiya nchitu fumbu la nambala 4 ndipuso 13 mpaka 17. Mwakuyeruzgiyapu, mungagwiriskiya nchitu fundu za mu fumbu la nambala 17, ndipu mungakamba kuti: “Tikambiskana ndi ŵanthu nkhani zo zingawovya mabanja. Kumbi muzomerezga kuti m’mabanja nganandi mwe masuzgu ngakupambanapambana? [Lindizgani kwamuka.] Mabanja nganandi ngawona kuti mazu yanga ngakovya: “Muwolu wopi murumu waki.” [Kumukambiya cha kuti mazu yanga ngatuwa pa Ŵaefesu 5:33. Asani mukambiskana ndi munthukazi, mungagwiriskiya nchitu mazu nga pa Ŵaefesu 5:28.] Kumbi muŵanaŵana kuti kugwiriskiya nchitu ulongozgi uwu kungawovya m’banja?”

4. Kumbi mungachitanji mwechendamalizi kukambiskana ndi munthu yo ndi Mkhristu cha?

⁴ Mwechendamali kukambiskana, mupempheni mweneku wa nyumba kuti muzi so zuŵa linyaki. Pa ulendu wakulondopu, mungazikambiskana nayu lemba limoza pa fumbu lo mwakambiskananga. Pa nyengu yakwenere, mungazimukambiya kuti ulongozgi wakovya wo mwakambiskananga ngwakutuliya m’Bayibolo. Malinga ndi vo mwakambiskananga maulendu ngakuvuli, mupaskeni buku lo muwona kuti lingamuwovya. Ivi vingathemba mo iyu watiliwone Bayibolo.​—Wonani mphatika ya Uteŵeti Widu wa Ufumu wa December 2013.