Vidya vo Tigwiriskiya Ntchitu Pakusambiza
1. Kumbi Akhristu ayanana wuli ndi amisiri?
1 Amisiri agwiriskiya ntchitu vidya vakupambanapambana pakuchita ntchitu yawu. Vidya vinyaki ativigwiriskiya ntchitu ukongwa cha, penipo vinyaki ativigwiriskiya ntchitu pafupifupi. Vidya vo ativigwiriskiya ntchitu pafupifupi ndivu amisiri wo aziŵa umampha ntchitu yawu awonesesa kuti ŵe navu nyengu zosi. Vidya ivi ndivu aziŵa ukongwa kugwiriskiya ntchitu. Bayibolu lichiska Akhristu wosi kuti ajiperekengi pa ntchitu yaku Chiuta kwambula ‘kuchita soni ndi chechosi.’ (2 Tim. 2:15) Kumbi chidya chikuru cho tipharazgiya ndi nichi? Bayibolu ndilu chidya chikulu cho tigwiriskiya ntchitu pakusambiza ŵanthu. (Mat. 28:19, 20) Mwaviyo, titenere kuyesesa kuti tije alusu pakukonkhoska “mazu nga uneneska.” Kweni pe so vidya vinyaki vo Akhristu wosi akhumbika kusambira kuvigwiriskiya ntchitu mwalusu kuti asambizengi ŵanthu uneneska.—Nthanthi 22:29.
2. Kumbi ndi vidya nivi vo tigwiriskiya ntchitu nyengu zosi?
2 Vidya vo Tigwiriskiya Ntchitu Nyengu Zosi: Kupatuwaku Bayibolu, kumbi ndi vidya nivi vinyaki vo tikhumbika kugwiriskiya ntchitu pakusambiza? Chidya chakwamba cho tigwiriskiya ntchitu pakusambiza ŵanthu uneneska ndi buku lakuti Kumbi Bayibolo Lisambizanji Weniukongwa? Asani tamaliza kusambira buku ili ndi munthu, titamba kusambira nayu bulu lakuti “Mujisungi mu Chanju Chaku Chiuta,” kuti timusambizi mo wangagwiriskiya ntchitu fundu za m’Bayibolu pa umoyu waki. Mwaviyo, tikhumbika kungagwiriskiya ntchitu mwalusu mabuku yanga. Pe so timabuku tinyaki to titenere kuja natu nyengu zosi. Kabuku kamoza kakukhumbika ukongwa ko titambiskiya sambiru la Bayibolu nkhakuti Uthenga Wamampha Wakutuliya Kwaku Chiuta! Asani mu chigaŵa chidu mwe ŵanthu wo asuzgika kuŵerenga pamwenga wo mu chineneru chawu alivi mabuku nganandi ngo ngakufwatulika, mungagwiriskiya ntchitu kabuku kakuti Vwiyani Chiuta pamwenga kakuti Vwiyani Chiuta Kuti Muje ndi Umoyu Wamuyaya. Kabuku kakuti Kumbi Mbayani Wo Achita Khumbu Laku Chiuta Mazuŵa Nganu? ndiku tingawovye wo tisambira nawu kuziŵa gulu lidu. Vidya vinyaki vo vititiwovya kupanga akusambira ndi mavidiyo ngakuti Nchifukwa Wuli Tikhumbika Kusambira Bayibolo?, Kumbi ndi Vinthu Wuli vo Vichitika pa Nyumba ya Ufumu? ndi yakuti Kodi Mulungu Ali Ndi Dzina? Mavidiyo yanga tikhumbika kungaziŵa umampha mo tingangagwiriskiya ntchitu mu uteŵeti.
3. Kumbi nkhani zakunthazi zamu Uteŵeti Widu wa Ufumu zazakutiwovya wuli?
3 Mu nkhani zakunthazi za mu Uteŵeti Widu wa Ufumu tazamusambira vo tingachita kuti tije alusu ndi vidya vo tigwiriskiya ntchitu nyengu zosi pakusambizga. Asani titesesa kugwiriskiya ntchitu mwalusu vidya ivi, ndikuti tivwiya ulongozgi wakuti: ‘Nyengu zosi uphweriyengi ndi vo uchita kweniso ndi vo usambiza. Jaririya mwaku venivi; chifukwa asani uchita viyo ujitaskengi wamweni ndi wo atikuvwa.’—1 Tim. 4:16.