“Mazu Yanga Ngaje Mumtima Waku”

Apapi ŵenge aliska. Yiwu atenere kuphwere ŵana ŵawu chifukwa ŵana angaswera cha kukumana ndi ngozi. (Nthanthi 27:23) Kumbi apapi angafiska wuli venivi? Atenere kusaniya nyengu yakukwana zuŵa lelosi yakukambisiyana ndi ŵana ŵawu. Ivi vingawovya apapi kuti aziŵi vo ŵana ŵawu aŵanaŵana ndipuso vo ve m’mitima yawu. (Nthanthi 20:5) Kweniso, kuti ŵana aje ndi chigomezgu chakukho, apapi atenere kuzenga ndi vakuzenge vambula kuko motu. (1 Ŵakor. 3:10-15) Vidiyo yakuti “Mazu Yanga Ngaje Mumtima Waku,” yilongo kuti kusopa kwa pabanja nkhwakukhumbika ukongwa. Woneriyani pamoza nge banja ndipu pavuli paki, kambiskanani mafumbu yanga:

(1) Kumbi nchinthu wuli chinguchitika kuti banja la M’bali Roman liwere vuli mwauzimu? (2) Nchifukwa wuli nthowa yakwamba yakusambiziya ya M’bali Roman yenga yamampha cha? (3) Kumbi ndi nthowa niyi yakusambiziya ŵana yo muwona kuti njamampha ukongwa? (Mar. 6:6, 7) (4) Kumbi nchinthu wuli cho chingawovya kuti ŵanthu m’banja akambiskanengi umampha? (5) Kumbi ŵana akhumba kuti apapi ŵawu aŵachitiyengenji? (6) Kumbi banja la M’bali ndi Mzichi Barrow linguwovya wuli banja la M’bali Roman? (Nthanthi 27:17) (7) Kumbi mitu ya mabanja yitenere kuchitanji kuti kusopa kwawu kwa pabanja kujengi kwakunozga? (8) Kumbi M’bali Roman wanguchitanji kuti vinthu viyambi kwenda umampha m’banja laki? (9) Nchifukwa wuli tikhumbika cha kudumulizadumuliza kusopa kwa pabanja? (Ŵaef. 6:4) (10) Ndi vinthu wuli vinyaki vo vingawovya pa kusopa kwa pabanja? (11) Kumbi M’bali Roman wachitanga wuli pakuwovya Marcus kuti wawoni kuzirwa kwa kuchita cho nchamampha? (Yer. 17:9) (12) Kumbi M’bali ndi Mzichi Roman angumuwovya wuli Rabecca kuti wasankhi umampha pa nkhani ya chibwezi? (Marko 12:30; 2 Tim. 2:22) (13) Kumbi M’bali ndi Mzichi Roman angulongo wuli chivwanu pa nyengu yo asinthanga vinthu vinyaki pa umoyu wawu? (Mat. 6:33) (14) Kumbi vidiyo iyi yilongo wuli kuti mitu ya mabanja yitenere kusambiza mabanja ngawu vinthu vauzimu? (1 Tim. 5:8) (15) Kumbi muŵanaŵana kuti mutenere kuchitanji nge mutu wa banja?

MITU YA MABANJA ZIŴANI IVI: Vidiyo iyi yikutuliya pa seŵeru lo tinguwonere pa unganu wa chigaŵa wa 2011. Pa nyengu iyi, kumbi munguwona kuti mukhumbika kusintha vinthu vinyaki kuti kusopa kwinu kwa pabanja kuyambi kwenda umampha? Nanga sonu muwona wuli? Asani muwona kuti mukhumbika so kusintha vinthu vinyaki, rombani ndipu gwiriyanipu ntchitu kuti banja linu lilutirizgi kuyanduwa.​—Ŵaef. 5:15-17.