Vo Tingachita Asani Tisambiza Ŵanthu ndi Buku la Bayibolo Lisambizanji

Wakusambira wakuwa ukongwa mwauzimu asani wayamba kugwiriskiya ntchitu vo wasambira. (Sumu 1:1-3) Buku la Bayibolu Lisambizanji le ndi vinthu vinyaki vo tingawovye wakusambira kuti waluti panthazi mwauzimu.

Mafumbu ngo nge Pakwamba pa Mutu: Kukwamba kwa mutu wewosi kwe mafumbu ngo ngamukika m’nkhani. Mungamufumba mafumbu ngenanga kuti mumuwovyi kuja ndi khumbu lakusambira. Pamwenga mungamufumba mafumbu yanga kuti wakambepu maŵanaŵanu ngaki. Asani wamuka vaboza mungamususkanga cha. Vo wangamuka vingakuwovyani kuti muziŵiyi limu fundu zo mukhumbika kukonkhoska umampha.​—Nthanthi 16:23; 18:13.

Fundu Zakukumaliya: Asani muwona kuti wakusambira wavwisa nkhani yo mukambiskana, mungamupempha kuti wakaŵerengi yija fundu zakukumaliya zo zikoliyana ndi nkhani yo mukambiskana. Asani mwaweriyaku, kambiskanani so fundu zinyaki zo mungusambira ulendu wajumpha kuti muwoni asani wakuvwisisa. Nyengu zinyaki vingaja umampha kuŵerenge limoza fundu zakumaliya pa nyengu yo muchitiya sambiru. Munozgekiyengi limu mafumbu ngo mungachimufumba.

Bokosi la Fundu Zakuweriyamu: Bokosi lo lija pakumaliya pa mutu limuka mafumbu ngo nge pakwamba pa mutu. Bokosi ili lingakuwovyani kuti muziŵi asani wakusambira wavwisa vo wasambira ndipuso asani wangakonkhosa fundu zikulu. Ŵerengani fundu ndipuso malemba nga m’kabokosi. Mupempheni kuti wakonkhoski kukoliyana kwa lemba ndi fundu yo mukambiskana.​—Mac. 17:2, 3.