TICHITENGI VINTHU NGE AKHRISTU
Mo Tingagwiriskiya Ntchitu Mavidiyo ngo Ngatovya Ŵanthu Kuti Ayambi Kusambira Bayibolu
Pe mavidiyo nganayi ngo tigwiriskiya ntchitu mu uteŵeti. Kumbi vidiyo yeyosi yikupangika ndi chilatu wuli?
Ntchifukwa Wuli Tikhumbika Kusambira Bayibolu?—Vidiyo Yosi. Vidiyo iyi yikupangika kuti yiwovyi ŵanthu kuziŵa vo Bayibolu likamba kwambula kutole vo chisopa chawu chisambiza. Yitovya ŵanthu kuti afufuzengi mu Bayibolu kwamuka kwa mafumbu ngakukhumbika ukongwa pa umoyu. Yikonkhoska mo munthu wangapemphe sambiru la Bayibolu.
Ntchifukwa Wuli Tikhumbika Kusambira Bayibolu? (vidiyo yifupi) Vidiyo iyi yiyanana waka ndi vidiyo yakwamba kweni iyi njifupiku. Ndipu tingagwiriskiya ntchitu ukongwa mu chigaŵa cho ŵanthu ŵaki mbakutangwanika.
Kumbi Sambiru la Bayibolo Lichitika Wuli? Vidiyo iyi yikupangika kuti yikopengi ŵanthu kuti akhumbisiskengi kusambira Bayibolu, yimuka mafumbu ngo ŵanthu ŵe nangu kweniso yilongo mo angapemphe sambiru.
Vakukondwesa Kuti Mwayambapu Kusambira Bayibolu. Vidiyo iyi yikupangika kuti tiwonesengi ŵanthu asani tayamba waka kusambira nawu. Chinanga kuti vidiyo iyi ye pa peji 2 mu buku lakuti Kondwani ndi Umoyu Kwamuyaya!, kweni tingamuwonesa so munthu asani tisambira nayu kabuku kakuti Kondwani ndi Umoyu Kwamuyaya! Yikonkhoska vo ve mu buku kweniso vo vichitikengi pa nyengu yo wasambira.
Chinanga kuti vidiyo yeyosi ye ndi ntchitu yaki, kweni tingawonesa pamwenga kutumiza ku munthu asani tiwona kuti mphakwenere. Apharazgi achiskika kuti angaziŵi umampha mavidiyo ngenanga, venivi viwovyengi kuti angagwiriskiyengi ntchitu umampha mu uteŵeti.