Kumbi Mungapemphera Wuli Kuti Chiuta Wavwengi Mapempheru Nginu?
Yehova ndi Chiuta “Wakuvwa pempheru.” (Salimo 65:2) Tingalongoro nayu kwekosi, nyengu yeyosi, mwakutuza mazu pamwenga mwachisisi. Yehova wakhumba kuti timudanengi kuti “Awusefwi” ndipu iyu, Mbawusefwi amampha ukongwa wo tingaja nawu. (Mateyu 6:9) Mwachanju, Yehova watitisambiza mo tigapemphere kuti iyu wavwengi mapempheru ngidu.
MUPEMPHERENGI KWAKU YEHOVA CHIUTA KUZIYA MU ZINA LAKU YESU
“Asani mupempha chinthu chechosi kwa Ada azakukupaskani mu zina langu.”—Yohane 16:23.
Mazu ngaku Yesu, ngalongore limu kuti Yehova wakhumba kuti tipempherengi kwaku iyu kuziya mu vikozgu cha, atuŵa mtima, angelu pamwenga ŵanthu wo akufwa, kweni kuziya mu zina laku Yesu Khristu. Asani tipemphera kwaku Chiuta kuziya mu zina laku Yesu, tilongo kuti tiziŵa vo Yesu wakutichitiya. Yesu wangukamba kuti: “Palivi munthu yo watuza kwa Ada kwambula kuziya mwaku ini.”—Yohane 14:6.
MUPEMPHERENGI KUTULIYA PASI PA MTIMA
“Mujuliyeni mitima yinu.”—Salimo 62:8.
Asani tipemphera kwaku Yehova, tikambiskanengi nayu nge mo tingakambiskiyana ndi awusefwi achanju. Mumalu mwakuchita ŵaka kuŵerenga mubuku mapempheru pamwenga kukamba ŵaka ngo tikuchita kuloŵeza, tikambiskanengi nayu mwaulemu kweniso kutuliya mumtima.
MUPEMPHERENGI MWAKUKOLIYANA NDI KHUMBU LAKU CHIUTA
“Chechosi cho tingapempha mwakukoliyana ndi khumbu laki watitivwa.”—1 Yohane 5:14.
Kuziya mu Bayibolu, Yehova Chiuta watitikambiya vo wazakutichitiya kweniso vo wakhumba kuti isi, timuchitiyengi. Mwakuyeruzgiyapu, kuti Chiuta wavwengi mapempheru ngidu, titenere kupemphera “mwakukoliyana ndi khumbu laki.” Kuti tichiti venivi, tikhumbika kusambira Bayibolu kuti timuziŵi umampha. Ndipu asani tachita viyo, iyu wakondwengi ndi mapempheru ngidu.
KUMBI TINGAPEMPHERE VINTHU NIVI?
Mupemphengi Vinthu vo Mukhumbikiya. Tingapemphera kwaku Chiuta kuti watiwovyi kusaniya vinthu vo tikhumbikiya zuŵa lelosi nge chakurya, vakuvwala ndi nyumba. Tingapempha so kuti watipasi zeru zo zingatiwovya kuti tisankhi umampha vinthu kweniso kuti tisaniyi nthazi zo zingatiwovya kuti tikunthiyepu mayeseru. Ndipuso tingapemphera kuti Chiuta watiwovyi kuja ndi chivwanu, watigowoke kweniso kuti watiwovyi.—Luka 11:3, 4, 13; Yakobe 1:5, 17.
Mupempheriyengi Anyinu. Apapi achanju, akondwa asani ŵana ŵawu atanjana. Yehova nayu, wakhumba kuti ŵana ŵaki a pacharu chapasi ayanjanengi. Mwaviyo, nkhwakukhumbika kupemphere munthu yo tikutorana nayu, ŵana ŵidu, ŵanthu a mu banja lidu kweniso mabwezi ngidu. Wakutumika Yakobe wangulemba kuti: “Pempheriyanani.”—Yakobe 5:16.
Mumuwongengi Chiuta. Pakukamba za Mlengi widu Bayibolu likamba kuti: “Wachita vinthu vamampha, watikupaskani vuwa kutuliya kuchanya ndipuso nyengu za vipasu, watikupaskani so vakurya vinandi kweniso wazaza mitima yinu ndi likondwa.” (Machitidu 14:17) Asani tiŵanaŵaniya vinthu vosi vo Chiuta watichitiya, vitichitiskengi kuti timuwongengi asani tipemphera. Kusazgiyapu yapa, tingalongo so kuti titimuwonga Chiuta asani titimuvwiya.—Akolose 3:15.
MUZIKIRENGI NDIPU LUTIRIZGANI KUPEMPHERA
Nyengu zinyaki, tingaguŵa chifukwa chakuti mapempheru ngidu ngakutuliya pasi pa mtima ngamukika nyengu yeniyo cha. Kumbi venivi, ving’anamuwa kuti Chiuta watitiŵanaŵaniya cha? Awa! Wonani vakuyeruzgiyapu vo vilongo kuti tikhumbika kulutirizga kupemphera.
Steve yo tamukamba mu nkhani yakwamba wangukamba kuti: “Nkhalekengi kulutirizga kupemphera, mphanyi sonu ndikondwa cha.” Kumbi ntchinthu wuli chingumuwovya kuti wakondwengi? Iyu wangwamba kusambira Bayibolu ndipu wangusambira kukhumbika kwa kupemphera kweniso kufwiyapu. Steve wangukamba kuti: “Ndapempheranga kwaku Chiuta kuti ndimuwongi, chifukwa chakuti wandiwovyanga kuziya mwa abwezi ŵangu. Sonu ndikondwa ukongwa kuluska kali.”
Nanga wuli Jenny yo wajiwonanga kuti ngwambula kwenere kuti Chiuta wavwengi mapempheru ngaki? Iyu wangukamba kuti: “Asani ndayamba kujiwona kuti nde wambula kwenere ukongwa, ndapemphanga Chiuta kuti wandiwovyi kuvwisa chifukwa cho ndajiwoniyanga viyo.” Kumbi pempheru lingumuwovya wuli? Jenny wangukamba kuti: “Kukambiskana ndi Chiuta kwandiwovya kuti ndijiwonengi nge mo iyu watindiwone. Ndipu chinanga kuti mtima wangu ungandisuska, iyu watindiwona viyo cha. Kweniso pempheru landiwovya kuti ndileki kuwere vuli.” Kumbi venivi vamuwovya wuli? Iyu wangukamba kuti: “Pempheru landiwovya kuti ndi muwonengi Yehova nge munthu chayiyu, ngwachanju, ndi Chiuta wakuŵanaŵaniya, Mbada ŵangu kweniso Mubwezi wangu. Iyu wangandiwovya nyengu zosi asani nditesesa kuchita vo wakhumba.”
Isabel wangukamba kuti, asani ndiwona mwana wangu Gerard wakondwa ndi umoyu chinanga kuti wakupunduka, “ndiziŵa kuti Yehova wakumuka mapempheru ngangu kuziya mwaku iyu.”
Wonani so vo vinguchitikiya Isabel. Iyu wati wame nthumbu, madokotala ngangumukambiya kuti wazamubala mwana wakupunduka. Venivi vingumuguŵiska ukongwa. Ndipu ŵanthu anyaki amukambiyanga kuti watuzi ŵaka nthumbu. Isabel wangukamba kuti: “Ndajivwanga nge kuti ndifwengi chifukwa cha urwirwi wo wenga mumtima mwangu.” Kumbi iyu wanguchita wuli? Iyu wangukamba kuti: “Ndingupemphera, ndingupemphera kwaku Chiuta kuti wandiwovyi.” Pati pajumpha nyengu, Isabel wangubala mwana munthulumi zina laki Gerard, ndipu wanguwa wakupunduka nadi. Kumbi Isabel wangujivwa kuti Chiuta wamuka mapempheru ngaki? Hinya. Munthowa wuli? Iyu wangukamba kuti: “Asani ndiwona mwana wangu yo sonu we ndi vyaka 14 wakondwa chinanga kuti ngwakupunduka, ndiziŵa kuti Chiuta wakumuka mapempheru ngangu kuziya mwaku iyu. Ndipu iyu ndi mphasu yikulu yo Yehova Chiuta wakundipaska.”
Mazu ngakutuliya pasi pa mtima ngo ŵanthu yaŵa angukamba, ngatitichitiska kuŵanaŵaniya mazu ngo munthu munyaki yo wangulembaku buku la Masalimo wangukamba. Iyu wangukamba kuti: “Yimwi Yehova, muvwengi pemphu la ŵanthu akufwasa. Mukhwimisengi mitima yawu, kweniso muŵavwisiyengi.” (Salimo 10:17) Venivi ndi vifukwa vakuvwika vo vititichitiska kuti tifwiyengepu kupemphera.
Mu Bayibolu mukulembeka mapempheru nganandi ngaku Yesu. Ndipu pempheru lakuziŵika ukongwa, ndi lo iyu wangusambiza akutumika ŵaki. Kumbi pempheru lenili lititisambizanji?