Kumbi Ntchinthu Wuli cho Chingakuwovyani Kuti Muzije ndi Umoyu Wamampha Kunthazi?
Ŵanthu anandi agomezga kuti nthazi yambula kuwoneka yingaŵawovya kuziŵa vo viŵachitikiyengi kunthazi. Chifukwa chakuti agomezga venivi, achita vinthu vo awona kuti vingaŵawovya kuja ndi umoyu wamampha.
VO ANANDI AGOMEZGA
AKUSANDA NYENYEZI: Ŵanthu anyaki agomezga kuti pamalu po nyenyezi zenga pa nyengu yo munthu wawangaku, vingawovya kuziŵa vo vimuchitikiyengi kunthazi. Yiwu afumba akusanda nyenyezi kuti aziŵi vo viŵachitikiyengi kunthazi ndipu pavuli paki agwiriskiya ntchitu vo aŵakambiya kuti asankhi vakuchita.
FENG SHUI: Ŵanthu anyaki agomezga kuti asani angazenga nyumba mu nthowa yinyaki ndikuti vinthu viŵayendiyengi umampha pa umoyu. Lo Wing,a yo waja ku Hong Kong wanguti: “Kaswiri wa feng shui wangundikambiya kuti asani ndingaŵika mwa wapade wakulangala pamalu nganyaki musitolu yangu, undiwovyengi kuti ndisaniyengi ndalama zinandi.”
KUSOPA ŴANTHU AKUFWA: Penipo anyaki agomezga kuti akhumbika kukondwesa apapi ŵawu wo akufwa pamwenga kusopa achiuta anandi kuti avikiliriki kweniso kutumbikika. Van, yo waja ku Vietnam wanguti: “Ndagomezganga kuti asani nditiŵapaska ulemu apapi ŵangu wo akufwa, ndijengi ndi umoyu wamampha sonu ndipuso ini ndi ŵana ŵangu tazamuja ndi umoyu wamampha kunthazi.”
KUCHIBALIKA SO KUNYAKI: Anandi agomezga kuti asani munthu wafwa, watachibalika so kunyaki ndipu venivi vichitika kananandi ŵaka. Yiwu agomezga kuti vinthu vamampha pamwenga viheni vo vitiŵachitikiya sonu, ntchifukwa cha vo anguchita pa nyengu yo angubalikiya kunyaki.
Kweni anandi awona kuti venivi vamasenga. Chinanga kuti anandi akamba kuti ativigomezga cha, kweni agwiriskiya ntchitu thabwa la ouija lakuwombeze, makadi ngamasenga, asanda nyenyezi, awona mizeri yo ye mukati mwa janja ndi vinyaki va viyo. Yiwu awona kuti panyaki venivi vingaŵawovya kuziŵa vinthu vo vazakuŵachitikiya kunthazi.
KUMBI VENIVI VITIŴAWOVYA?
Kumbi ŵanthu wo agomezga venivi ndipuso kuvichita, aja ndi umoyu wamampha kweniso vinthu vazakuŵayende nadi umampha kunthazi?
Wonani vo vinguchitikiya Hào yo waja ku Vietnam. Iyu wasandanga nyenyezi, wagwiriskiyanga ntchitu feng shui kweniso wasopanga ŵanthu akufwa, kuti waziŵi vakunthazi. Kumbi vingumuwovya nadi? Hào wanguti: “Ndinguluza ndalama zinandi, ndingusere mungongoli, mu banja langu takoliyananga cha kweniso ndasuzgikanga ukongwa maŵanaŵanu.”
Qiuming wa ku Taiwan, nayu wagomezganga akusanda nyenyezi, kuchibalika so kunyaki, nthazi yambula kuwoneka, feng shui kweniso kusopa ŵanthu akufwa. Wati wafufuza vinthu venivi mwakuphwere, iyu wanguti: “Ndinguziŵa kuti visambizu kweniso midawuku yeniyi visuskana ndipuso vakutimbanyizga. Ndingusaniya kuti vo akusanda nyenyezi akamba kuti vichitikengi, kanandi vaŵanga vaboza. Pa nkhani yakuchibalika so kunyaki, ndingujifumba kuti asani uziŵa cha vo vingukuchitikiya mu umoyu wakuvuli, kumbi ungasintha wuli ndi kuchita vamampha mu umoyu unyaki?”
“Ndinguziŵa kuti visambizu kweniso midawuku yeniyi visuskana ndipuso vakutimbanyizga.”—QIUMING, TAIWAN
Nge mo Hào, Qiuming ndipuso ŵanthu anyaki anandi aziŵiya, vinthu vo vitichitikiyengi kunthazi vithemba pa nthazi yambula kuwoneka cha, nyenyezi, ŵanthu wo akufwa pamwenga kuchibalika so kunyaki. Kumbi venivi ving’anamuwa kuti tingachita cha vinthu vo vingatiwovya kuti vinthu vizitiyende umampha kunthazi?
Anandi awona kuti nthowa yamampha yo yingaziŵawovya kuja ndi umoyu wamampha kunthazi, nkhuja ndi masambiru nga pachanya kweniso chuma. Kumbi ndi vinthu wuli vo vachitikiya ŵanthu anyaki wo angusankha venivi?
a Mu nkhani iyi kweniso zinyaki zakulondopu, mazina nganyaki ngasinthika.
b Fundu iyi yisanirika mu Malemba Ngakupaturika pa Agalatiya 6:7. Fundu yeniyi njakuziŵika ukongwa ku Asia, chifukwa nthanthi yinyaki yikamba kuti, Panda vimwelu, uvunengi vimwelu; panda ntchunga, uvunengi ntchunga.