MO TINGAMALISIYA JALIDU LAKUTINKHANA

2 | Mungaweziyanga Cha

Vo Bayibolu Lisambiza:

“Mungaweziyanga cha chiheni pa chiheni ku munthu weyosi. . . . Asani nkhwamachitika, jani mwachimangu ndi ŵanthu wosi, nge mo mungafiskiya. . . . Mungaweziyanga mwija cha, . . . pakuti kukulembeka kuti: Yehova watiti; ‘Kuweze nduzga nkhwangu, ndazamuweze ndini.’”—AROMA 12:17-19.

Vo Ling’anamuwa:

Chinanga kuti mwakawi tikwiya asani munthu munyaki watinangiya, kweni Chiuta wakhumba cha kuti tiweziyengi. Mumalu mwaki, watitipempha kuti tilindizgengi iyu chifukwa pambula kuswera watuzgengepu vinthu vambula urunji.—Salimo 37:7, 10.

Vo Mungachita:

Asani ŵanthu ambula kufikapu aweze, kutinkhana kuluta panthazi ukongwa. Mwaviyo, asani munthu munyaki wakunangiyani pamwenga kukupwetekani, mungaweziyanga cha. Muyesesengi kumuka mwachimangu kweniso muwukongi mtima. Nyengu zinyaki, vingaŵa umampha kuvileka waka. (Nthanthi 19:11) Kweni nyengu zinyaki vingaŵa umampha kuchitapu kanthu. Mwakuyeruzgiyapu, asani akuchitiyani nkhaza, mungasankha kuchimangala ku polisi pamwenga ku ŵanthu anyaki amazaza.

Kuweze kunangiya limu vinthu

Nanga mungachita wuli asani muwona kuti palivi nthowa ya chimangu yakumaliyana ndi suzgu lenili? Pamwenga mungachita wuli asani mwayesesa kali kuti mumalani ndi suzgu lenili mwachimangu? Mungaweziyanga cha. Kuweze kunganangiya limu vinthu. Mumalu mwaki, malisani jalidu la kutinkhana. Mugwiriskiyengi ntchitu fundu zaku Chiuta pakumaliska suzgu. ‘Mumuthembengi ndipu iyu wakuwovyeningi.’—Salimo 37:3-5.

Vo Vinguchitika Nadi—ADRIÁN

Wanguleka Kuweze

Pa nyengu yo Adrián wenga mnyamata, wenga wankhaza kweniso watinkhanga ŵanthu anyaki ndipu waweziyanga. Iyu wanguti: “Kanandi ndachitanga ndewu mwakugwiriskiya ntchitu futi ndipu liŵavu langu laŵanga waka ndopa pe, mwakuti andilekanga mumsewu nde pafupi kufwa.”

Adrián wangwamba kusambira Bayibolu we ndi vyaka 16. Iyu wangukamba so kuti: “Ndichilutirizga kusambira Bayibolu, ndinguwona kuti ndakhumbikanga kusintha umunthu wangu.” Wakhumbikanga kuleka kutinkha ŵanthu kweniso nkhaza. Iyu wanguyanduwa ukongwa ndi vo wangusambira pa Aroma 12:17-19 pa nkhani ya kuleka kuweze. Iyu wanguti: “Ndinguzomereza kuti Yehova wazamumalisa vinthu vambula urunji mu nthowa yaki kweniso pa nyengu yaki. Kamana ndi kamana, ndinguleka jalidu lankhaza.”

Ndi usiku unyaki, gulu la anyamata wo kali wapumananga nawu lingumuyukiya. Mulongozgi wa gulu ili wangudaniriza kuti: “Jivikiliyi!” Adrián wanguti: “Ndingufya mtima ndipu ndakhumbanga kuweze.” Kweni mumalu mwa kuweze, iyu wangupemphera chamumtima kwaku Yehova ndipu wangutuwapu.

Adrián wangukamba so kuti: “Mawa laki, ndingukumana ndi mulongozgi wa gulu la anyamata ŵa. Ndingukwiya ukongwa mwakuti ndakhumbanga kuweze, kweni ndingupempha so Yehova chamumtima kuti wandiwovyi kuti ndijiko. Ndinguzizwa ukongwa kuti mnyamata mwenuyu wanguza kwaku ini ndi kundikambiya kuti: ‘Ndigowoke pa vo ndingukuchitiya zana. Uneneska ngwakuti, ndikhumba kuja nge yiwi. Ndikhumba kusambira Bayibolu.’ Ndingukondwa ukongwa kuti ndinguwuko mtima! Chifukwa cha venivi ndingwamba kusambira nayu Bayibolu.”