NKHANI YAKUSAMBIRA YA NAMBALA 20
SUMU 67 “Pharazga Mazu”
Chanju Chikuchiskeningi Kulutirizga Kupharazga!
“Uthenga wamampha utenere kupharazgika dankha ku mitundu yosi.”—MARIKO 13:10.
FUNDU YIKULU
Mo chanju chititichiskiya kuti tipharazgengi mwaphamphu kweniso ndi mtima wosi.
1. Kumbi tingusambiranji pa unganu wa pachaka wa 2023?
PA UNGANU wa pachaka wa 2023,a tinguvwa za kusintha kwa vinthu vinyaki vo tagomezganga kweniso pangupharazgika za vinthu vakukondwesa vakukwaskana ndi uteŵeti widu. Mwakuyeruzgiyapu, tingusambira kuti ŵanthu anyaki angazija ndi mwaŵi wakuja ku chigaŵa cha ŵanthu aku Yehova chinanga mphavuli pakuti Babiloni Mukulu wabwangandulika. Tingusambira so kuti kwambiya mu November 2023, apharazgi wosi a Ufumu akhumbikengi so cha kupereka lipoti la vinthu vosi vo achita mu uteŵeti wa kumunda. Kumbi venivi vichitiska kuti tiwonengi kuti ntchitu yakupharazga njambula kukhumbika kweniso kuti yikhumbika kugwirika mwaliŵi cha? Awa ndimu vilili cha!
2. Ntchifukwa wuli ntchitu yakupharazga yikhumbika kugwirika mwaliŵi ukongwa pasonu panu? (Mariko 13:10)
2 Asani zuŵa lelosi lijumphapu, ntchitu yidu yakupharazga nayu yikhumbika kugwirika mwaliŵi ukongwa. Chifukwa wuli? Chifukwa chakuti nyengu yimala. Ŵanaŵaniyani vo Yesu wangukambiya limu vakukwaskana ndi ntchitu yakupharazga mu mazuŵa ngakumaliya. (Ŵerengani Mariko 13:10.) Mwakukoliyana ndi nkhani zo ze mu buku la Mateyu, Yesu wangukamba kuti uthenga wamampha wazamupharazgika pacharu chosi chapasi ko kwe ŵanthu “umaliru” wechendazi. (Mate. 24:14) Mazu ngakuti umaliru, ngakamba za kumaliya limu kwa charu chaku Satana. Yehova wakuŵika “zuŵa ndi ora” lo venivi vazamuchitikiya. (Mate. 24:36; 25:13; Machi. 1:7) Asani zuŵa lelosi lijumphapu, ndikuti tindere ukongwa ku zuŵa lenili. (Aro. 13:11) Pasonu panu, tikhumbika kulutirizga kupharazga mpaka po umaliru uziyengi.
3. Kumbi ntchinthu wuli cho chititichiska kuti tipharazgengi?
3 Asani tiŵanaŵaniya za uteŵeti widu, tingachita umampha kujifumba fumbu lakuti: Ntchifukwa wuli tipharazga uthenga wamampha? Chifukwa chaki ntchapatali cha, chanju ndichu chititichiska kuti tipharazgengi. Vo tichita asani tipharazga, vilongo kuti titanja uthenga wamampha, titanja ŵanthu ndipu chikulu ukongwa, titanja Yehova ndi zina laki. Tiyeni tikambiskani vinthu venivi, chechosi pakuchija.
TIPHARAZGA CHIFUKWA CHAKUTI TITANJA UTHENGA WAMAMPHA
4. Kumbi tichita wuli asani tavwa uthenga wakukondwesa?
4 Kumbi mukumbuka mo munguvwiya mwati mwavwa uthenga wakukondwesa? Kaya nkhuwaku kwa mwana mubanja linu pamwenga mwaŵi wa ntchitu yo mwayipenjanga ukongwa. Tikayika cha kuti mwakhumbisiskanga kukambiyaku ŵanthu a mu banja linu pamwenga anyinu za nkhani yeniyi. Kumbi venivi ndivu so vingukuchitikiyani mwati mwavwa uthenga wamampha wa Ufumu waku Chiuta wo ngwamampha ukongwa kuphara uthenga wewosi?
5. Kumbi munguvwa wuli mwati mwasambira kakwamba uneneska wa mu Mazu ngaku Chiuta? (Wonani so vithuzi.)
5 Kumbukani mo munguvwiya pa nyengu yo mungusambira uneneska wa mu Mazu ngaku Chiuta kakwamba. Mungusambira kuti Awusemwi akuchanya atikuyanjani ukongwa ndipu akhumba kuti muje mubanja lawu la ŵanthu wo atiŵasopa. Yiwu akulayizga kuti azamumalisa masuzgu ngosi ndi vakupweteka. Mungusambira so kuti mungaja ndi chilindizga chakuziwona abali ŵinu kweniso anyinu wo akufwa pa nyengu yo azamuyuskika mucharu chifya kweniso mungusambira vinthu vinyaki vinandi. (Mariko 10:29, 30; Yoha. 5:28, 29; Aro. 8:38, 39; Chivu. 21:3, 4) Kukamba uneneska, vo mungusambira vingukukondwesani ukongwa. (Luka 24:32) Munguviyanja vo mwasambiranga, ndipu mwakhumbanga so kukambiyaku ŵanthu anyaki!—Yeruzgiyani ndi Yeremiya 20:9.
Tati tasambira uneneska wa mu Bayibolu kakwamba, tingukondwa ukongwa ndipu takhumbanga kukambiyaku anyidu vo tasambira! (Wonani ndimi 5)
6. Kumbi musambiranji pa vo vinguchitikiya Ernest ndi Rose?
6 Tiyeni tikambiskani vo vinguchitikiya mubali munyaki zina laki Ernest.b Iyu wenga ndi vyaka pafufupi 10 pa nyengu yo awisi angutayikiya. Ernest wangukamba kuti: “Ndajifumbanga kuti: ‘Kumbi aluta kuchanya? Pamwenga afwiya limu mwakuti azamuyuskika so cha?’ Ndachitiyanga sanji ŵana anyangu wo awusewu ŵenga ŵeche amoyu.” Kanandi Ernest walutanga ku masanu, wajikamanga pa muwunda wa awisi ndi kupemphera kuti: “Chondi a Chiuta, ndikhumba kuti ndiziŵi kuti ada ŵepani.” Pati pajumpha vyaka pafufupi 17 kutuliya po awisi angufwiya, Akaboni aku Yehova angumupempha Ernest kuti asambirengi nayu Bayibolu, ndipu iyu wanguzomera ndi mtima wosi. Iyu wangukondwa ukongwa wati wasambira kuti akufwa aziŵa chechosi cha, nge munthu yo wagona tulu takufwa natu kweniso kuti Bayibolu lilayizga kuti kwazamuja chiyuka kunthazi. (Waku. 9:5, 10; Machi. 24:15) Pakumaliya, wangusaniya kwamuka kwa mafumbu ngo wenga nangu ngo ngamusuzganga kwa nyengu yitali! Ernest wangukondwa ukongwa ndi uneneska wa mu Bayibolu wo wasambiranga. Muwolu waki Rose nayu wangwamba kusambira, ndipu wangwamba kuwuyanja uthenga wa Ufumu wo wasambiranga. Yiwu angubatizika mu 1978. Yiwu apharazgiyanga mwaphamphu ŵanthu a mu banja lawu, anyawu kweniso munthu weyosi yo wakhumba kuvwisiya uneneska wakuzirwa wo yiwu angusambira. Chifukwa cha venivi, Ernest ndi Rose anguwovya ŵanthu akujumpha 70 kuti aluti panthazi ndi kubatizika.
7. Kumbi ntchinthu wuli chichitika asani uneneska wa mu Bayibolu wame misisi mumtima mwidu? (Luka 6:45)
7 Asani uneneska wa mu Bayibolu wame misisi mumtima mwidu, tikhumbisiskengi kukambiyaku anyidu. (Ŵerengani Luka 6:45.) Tivwengi nge mo akusambira aku Yesu anguvwiya. Yiwu angukamba kuti: “Tilekengepu cha kulongoro vinthu vo tikuwona ndi kuvwa.” (Machi. 4:20) Chifukwa chakuti titiwuyanja ukongwa uneneska, tiyesesengi kupharazgiya ŵanthu anandi uthenga wenuwu.
TIPHARAZGA CHIFUKWA CHAKUTI TITANJA ŴANTHU
8. Kumbi ndi vinthu wuli vo vititichiska kuti tipharazgiyengi anyidu uthenga wamampha? (Wonani bokosi lakuti, “Muyanjengi Ŵanthu—Kuti Aje Akusambira.”) (Wonani so chithuzi.)
8 Nge Yehova kweniso Mwana waki, nasi titanja ŵanthu. (Nthanthi 8:31; Yoha. 3:16) Titiŵavwiya lisungu ukongwa ŵanthu wo ‘alivi Chiuta’ kwenso wo ‘alivi chilindizga.’ (Aefe. 2:12) Chifukwa cha masuzgu ngo akumana nangu, yiwu angajivwa nge kuti ŵe muchizenji chitali. Kweni isi te ndi chingwi cho tingaŵaguziya, kung’anamuwa uthenga wamampha wa Ufumu waku Chiuta. Chanju chidu kweniso lisungu lidu ku ŵanthu aviyo, vititichiska kuti tichiti vosi vo tingafiska kuti tiŵapharazgiyi uthenga wamampha. Uthenga wakuzirwa wenuwu ungaŵawovya kuti aje ndi chilindizga, ajengi umoyu wamampha pasonu panu kweniso mwaŵi wakuzija ndi “umoyu weneku” mucharu chifya chaku Chiuta.—1 Timo. 6:19.
Kwanja ŵanthu kweniso kuŵachitiya lisungu, vitichiskengi kuti tichiti vosi vo tingafiska kuti tiŵapharazgiyi uthenga wamampha (Wonani ndimi 8)
9. Kumbi ŵanthu titiŵatcheŵeska kuti kunthazi kuchitikengenji, nanga ntchifukwa wuli? (Ezekiyeli 33:7, 8)
9 Kwanja ŵanthu kutitichitiska kuti tiŵatcheŵeskengi kuti umaliru wa charu ichi we pafupi. (Ŵerengani Ezekiyeli 33:7, 8.) Titiŵavwiya lisungu ukongwa ŵanthu wo tija nawu pafupi kweniso abali ŵidu wo mbakaboni cha. Ŵanthu anandi, achita ŵaka vinthu vawu va zuŵa ndi zuŵa kwambula kuziŵa kuti kutuzga “chisuzgu chikulu cho chechendachitikepu kutuwa po charu chikulengeke mpaka sonu, ndipu chazamuchitikapu so cha.” (Mate. 24:21) Tikhumba kuti aziŵi vo vazamuchitika pa nyengu ya cheruzgu, kuti chisopa chaboza chazamutuzgikapu ndipu pavuli paki charu chiheni chaku Satana ichi chazamubwangandulika pa Aramagedoni. (Chivu. 16:14, 16; 17:16, 17; 19:11, 19, 20) Tipemphera kuti ŵanthu anandi, avwisiyi uthenga wakutcheŵeska ndi kwamba kusopa Yehova pasonu panu. Nanga wuli ŵanthu wo avwisiyengi cha uthenga wakutcheŵeska pasonu panu kusazgapu abali ŵidu?
10. Kumbi ntchifukwa wuli kulutirizga kutcheŵeska ŵanthu nkhwakukhumbika ukongwa pasonu panu?
10 Nge mo takambiya mu nkhani yajumpha, Yehova wangazitaska ŵanthu wo azamulongo chivwanu mwaku iyu asani aziwona kuti Babiloni Mukulu wabwangandulika. Asani ndi viyo, ndikuti nkhwakukhumbika ukongwa kulutirizga kuŵatcheŵeska ŵanthu ŵenaŵa kweche sonu. Mutenere kukumbuka fundu iyi: Vo titiŵakambiya pasonu panu, angazivikumbuka asani nyengu yeniyi yafika. (Yeruzgiyani ndi Ezekiyeli 33:33.) Panyaki azamukumbuka vinthu vo tinguŵatcheŵeska ndipu vazakuŵachitiska kuti ayambi kusopa nasi Yehova nyengu yechendamaliyi limu. Nge mo mulonda wa jeri ku Filipi wangusinthiya kwati kwachitika “chidilirisi” vingazichitika kuti ŵanthu wo aleka kuvwisiya pasonu panu angazisintha asani aziwona kubwangandulika kwa Babiloni Mukulu.—Machi. 16:25-34.
TIPHARAZGA CHIFUKWA CHAKUTI TITANJA YEHOVA NDI ZINA LAKI
11. Kumbi titimupaska wuli Yehova unkhankhu, ulemu kweniso nthazi? (Chivumbuzi 4:11) (Wonani so vithuzi.)
11 Chifukwa chikulu ukongwa cho tipharazgiya ŵanthu uthenga wamampha ntchakuti titanja Yehova Chiuta kweniso zina laki lakupaturika. Uteŵeti widu titiwuwona kuti ndi nthowa yakuthamikiya Chiuta yo titimuyanja. (Ŵerengani Chivumbuzi 4:11.) Ndi mtima wosi, tikoliyana ndi fundu yakuti Yehova Chiuta ngwakwenere kulonde unkhankhu, ulemu kweniso nthazi kutuliya ku ŵanthu wo atimusopa mwakugomezgeka. Tipereka unkhankhu kweniso ulemu kwaku Chiuta asani tikambiya ŵanthu ukaboni wambula kususkika wakulongo kuti iyu ndiyu ‘wakulenga vinthu vosi’ kweniso kuti isi tiliku chifukwa chakuti iyu wakutipaska umoyu. Tipereka nthazi zidu kwaku Yehova asani tigwiriskiya ntchitu nyengu yidu, nthazi zidu kweniso vinthu vosi vo te navu kuti tipharazgiyi ŵanthu mwakukoliyana ndi mo vinthu vilili pa umoyu widu. (Mate. 6:33; Luka 13:24; Ako. 3:23) Tingakamba ŵaka kuti titanja kukamba vakukwaskana ndi Chiuta yo titanja. Tichiskika so kukambiyaku anyidu vakukwaskana ndi zina laki kweniso vo ling’anamuwa. Chifukwa wuli?
Tipereka nthazi zidu kwaku Yehova asani tigwiriskiya ntchitu nyengu, nthazi kweniso vosi vo te navu kuti tipharazgiyi ŵanthu mwakukoliyana ndi mo vinthu vilili pa umoyu widu (Wonani ndimi 11)
12. Kumbi titowesa wuli zina laku Yehova mu upharazgi?
12 Kwanja Yehova kutitichiska kuti titowesengi zina laki. (Mate. 6:9) Mwaviyo, tikhumba kuti tikambiyi ŵanthu kuti vo Satana wakamba vakukwaskana ndi Yehova vaboza. (Gene. 3:1-5; Yobu 2:4; Yoha. 8:44) Asani tipharazga tikhumbisiska kukambiya ŵanthu wosi wo avwisiya uneneska wakukwaskana ndi Chiuta kuti amuziŵi. Tikhumba kuti weyosi waziŵi kuti jalidu likulu ukongwa laku Yehova ntchanju, iyu walamuliya mwaurunji kweniso mwakwenere. Ndipu pambula kuswera yapa Ufumu waki umalisengi masuzgu ngosi ndi kuzisa chimangu kweniso likondwa ku ŵanthu. (Salimo 37:10, 11, 29; 1 Yoha. 4:8) Asani tikambiya ŵanthu vinthu venivi vakukwaskana ndi Yehova ndikuti titowesa zina laki. Tikondwa so ukongwa chifukwa chakuti tiziŵa kuti tichita vinthu vo tikhumbika nadi kuchita nge Akaboni aku Yehova. Ntchifukwa wuli tikamba viyo?
13. Ntchifukwa wuli timalika kudanika kuti Akaboni aku Yehova? (Yesaya 43:10-12)
13 Yehova wakutisankha isi kuti tije “akaboni” ŵaki. (Ŵerengani Yesaya 43:10-12.) Vyaka vo vajumpha, kalata yakutuliya ku Wupu Wakulongozga yingukamba kuti: “Tikutumbikika ukongwa ndi Yehova chifukwa chakuti tidanika kuti Akaboni ŵaki.” Ntchifukwa wuli ve viyo? Tiyeruzgiyi kuti mukhumba kusankha munthu munyaki kuti wakaje kaboni pa mulandu winu ku khoti. Mungasankha munthu yo mutimuziŵa kweniso kumuthemba, munthu yo we ndi mbiri yamampha vo vingachitiska kuti vo wamukamba, ŵanthu akavigomezgi. Yehova pakusankha isi kuja Akaboni ŵaki, vilongo kuti iyu watitiziŵa umampha kweniso watitithemba kuti tingakambiya ŵanthu kuti iyu ndiyu yija Chiuta wauneneska. Titijivwa kuti te akutumbikika ukongwa kuziŵika kuti te Akaboni ŵaki. Ndipu tikhumba kugwiriskiya ntchitu mpata wewosi wo tingaŵa nawu kuziŵikisa zina laki kweniso kususka maboza ngosi ngo ŵanthu akamba ngakukwaskana ndi iyu. Asani tichita viyo, ndikuti tichita mwakukoliyana ndi zina lidu lo timalika nalu lakuti Akaboni aku Yehova!—Salimo 83:18; Aro. 10:13-15.
TILUTIRIZGENGI KUPHARAZGA MPAKA PAKUMALIYA
14. Kumbi ndi vinthu vakukondwesa nivi vo vichitikengi kunthazi pambula kuswera yapa?
14 Tikhaza vinthu vakukondwesa ukongwa vo vichitikengi kunthazi! Yehova watumbika ntchitu yaki, mwakuti tikhaza kuwona ŵanthu anandi achizomera uneneska chisuzgu chikulu chechendayambi. Tikondwa kuti chinanga mphanyengu ya chisuzgu chikulu, nyengu yo yazamukuŵa yakusuzga ukongwa, ŵanthu anyaki angazituwaku kucharu chaku Satana ndi kwamba kuthamikiya nasi limoza Yehova!—Machi. 13:48.
15-16. Kumbi tilutirizgengi kuchitanji, nanga mpaka zukwanji?
15 Pasonu panu te ndi ntchitu yakuti tigwiri. Te ndi mwaŵi wapade, wakugwiraku ntchitu yakupharazga uthenga wamampha wa Ufumu waku Chiuta pacharu chosi chapasi yo yazamugwirika so cha kunthazi. Pa nyengu yeniyi pe, tikhumbika kulutirizga kutcheŵeska ŵanthu. Ŵanthu akhumbika kuziŵa kuti umaliru wa charu chiheni ichi we pafupi ukongwa. Ndipu asani nyengu ya cheruzgu yazifika, yiwu azamuziŵa kuti uthenga wo tapharazganga watuliyanga kwaku Yehova Chiuta.—Ezeki. 38:23.
16 Sonu kumbi tasimikiza kuchitanji? Chifukwa cha kwanja uthenga wamampha, kwanja ŵanthu ndipu chikulu ukongwa kwanja Yehova Chiuta ndi zina laki, tilutirizgengi kupharazga ndi mtima wosi, mwaliŵi kweniso mwaphamphu mpaka po Yehova wakambiya kuti, “Mbwenu lekani kupharazga!”
SUMU 54 “Nthowa Ndi Iyi”
a Unganu wa pachaka unguchitika pa October 7, 2023, ku Malu nga Unganu nga Akaboni aku Yehova nga Newburgh ku New York, U.S.A. Pavuli paki, pulogilamu yosi yingutuzgika mu JW Broadcasting. Chigaŵa chakwamba chingutuzgika mu Broadcasting ya November 2023 ndipu chigaŵa chachiŵi mu Broadcasting ya January 2024.
b Wonani nkhani ya mutu wakuti “Baibulo Limasintha Anthu—Ndinapeza Mayankho Ogwira Mtima a Mafunso Anga,” mu Chigongwi cha Mlinda cha Chichewa cha February 1, 2015.