VO VINGAKUWOVYANI PAKUSAMBIRA

Mugwiriskiyengi Ntchitu Vithuzi Pakusambira

Mumabuku ngidu musanirika vithuzi vinandi vo vititisambiza fundu zakukhumbika ukongwa. Kumbi mungachita wuli kuti muyanduwengi ukongwa ndi vithuzi venivi?

• Muwonengi vithuzi mwechendaŵerengi nkhani. Vithuzi venivi vingakuwovyani kuti muje ndi mtima wakukhumbisiska kuŵerenga nkhani yo. Venivi viyanana ŵaka ndi vo vichitika asani mwawona chakurya chakunowa, chifukwa mutichilaŵa dankha. Mwaviyo, mujifumbengi kuti, ‘Kumbi ndiwonanji?’—Amosi 7:​7, 8.

• Asani muŵerenga nkhani, mujifumbengi kuti, ntchifukwa wuli akuŵikamu chithuzi cho? Ŵerengani mazu nga pa chithuzi kweniso mazu ngakukonkhoska chithuzi asani ngalipu. Ŵanaŵaniyani mo chithuzi cho chikoliyana ndi nkhani yo muŵerenga kweniso mo mungagwiriskiya ntchitu vo musambirapu pa chithuzi cho.

• Asani mwamala kuŵerenga, gwiriskiyani ntchitu vithuzi kuti muweriyemu mu fundu zikulu zo ze munkhani yo. Yesani kuwona vithuzi vo mumaŵanaŵanu nginu kweniso kukumbuka vo mwasambira kutuwa pa vithuzi vo.

• Yesani kuwona so vithuzi vo ve mumagazini iyi kuti muwoni asani mungakumbuka fundu zo mwasambira.