Chanju Chaku Chiuta Ntchamuyaya

1-2. Kumbi isi nge Akhristu tingavwa wuli asani takumana ndi masuzgu?

YERUZGIYANI kuti muwona boti lo le panyanja yo yayuka. Mayiŵa ngakulungakulu kweniso nganthazi ngatilitutuziya uku ndi uku. Boti lo lingaluta kwekosi ko mayiŵa ngangalitutuziya. Kweni lingama pijapija asani munthu wangaponya ndondowa pamwenga kuti anka mumaji. Ndondowa yingawovya boti lo kuti lileki kwendakwenda ndi kututuzgika ndi mayiŵa nganthazi.

² Asani mwakumana ndi masuzgu ngakulu, mungayanana ndi boti lo le panyanja yo yayuka. Namwi maŵanaŵanu nginu ngangajalikiskika cha. Nyengu yinyaki mungajikhwimisa ndi kusimikiza mtima kuti Yehova watikuyanjani. Kweni mu kanyengu kamanavi so, mungayamba kukayikiya asani iyu wawona nadi vo mukumana navu. (Salimo 10:1; 13:1) Mwakuyeruzgiyapu, asani munyinu wakuchiskani mungayamba kuvwa umampha. (Nthanthi 17:17; 25:11) Kweni asani pajumpha kanyengu, mungayamba so kukayikiya. Mungayamba kuwona kuti Yehova watikuyanjani cha. Kumbi ntchinthu wuli cho chingakuwovyani kuti mumi gwa nge boti lo le ndi ndondowa? Pamwenga ntchinthu wuli cho chingakuwovyani kuti mulekengi kukayikiya kuti Yehova watikuyanjani kweniso wakuwovyeningi asani mwakumana ndi masuzgu?

3. (a) Kumbi mazu ngakuti “chanju chambula kumala,” ngo nge pa Salimo 31:7 ndipuso pa 136:1 ngang’anamuwanji? (b) Ntchifukwa wuli tingakamba kuti Yehova ndiyu walongo ukongwa chanju chenichi? (Wonaniso chithuzi.)

³ Kukumbuka kuti chanju chaku Yehova ntchambula kumala kungakuwovyani kuti mukunthiyengepu mayeseru. (Ŵerengani Salimo 31:7; 136:1.) Mazu ngakuti “chanju chambula kumala” ngang’anamuwa chanju chikulu ndipuso chambula kumala cho chiŵapu pakati pa ŵanthu ŵawi. Ndipu Yehova ndiyu walongo ukongwa chanju cha viyo. Mphaki Bayibolu likamba kuti Yehova “wakuzaza ndi chanju chambula kumala.” (Eki. 34:​6, 7) Bayibolu likamba so vakukwaskana ndi Yehova kuti: “Wosi wo adaniya paku yimwi, mutiŵalongo chanju chikulu chambula kumala.” (Salimo 86:5) Kumbi malemba yanga ngang’anamuwanji? Ngang’anamuwa kuti Yehova watiŵajowo cha ateŵeti ŵaki akugomezgeka! Kukumbuka kuti Yehova ngwakugomezgeka kungakuwovyani kuti mukunthiyengepu masuzgu ngakulu ngo mukumana nangu.—Salimo 23:4.

MUKUMBUKENGI KUTI FUNDU YAKUTI YEHOVA WATITIYANJA YE MUGULU LA FUNDU ZO TINGWAMBA KUSAMBIRA

4. Kambani fundu zinyaki za mu Bayibolu zo mungwamba kusambira, nanga ntchifukwa wuli titizigomezga?

⁴ Fundu yakuti Yehova watitiyanja njimoza mwa fundu za mu Bayibolu zo munthu watamba kusambira. Kukumbuka fundu yeniyi kungakuwovyani kuti mukunthiyengepu. Kumbi mukumbukanji asani mwavwa mazu ngakuti “fundu za mu Bayibolu zo tingwamba kusambira”? Panyaki mukumbuka fundu zikuluzikulu zo mukusambira, nge yakuti zina laku Chiuta ndi Yehova, Yesu ndi Mwana wapade waku Chiuta, akufwa aziŵa kanthu cha kweniso kuti charu chapasi chazamuja paradayisu ndipu ŵanthu azamuja mwenimo kwamuyaya. (Salimo 83:18; Waku. 9:5; Yoha. 3:16; Chivu. 21:​3, 4) Mwati mwasimikiza kuti fundu zenizi zauneneska nadi, pengavi munthu yo watingi wakutondekeseningi kuzigomezga. Chifukwa wuli? Chifukwa munguwamu kuti fundu zenizi zaboza cha kweni zauneneska nadi. Sonu tiyeni tiwoni mo kukumbuka kuti fundu yakuti Yehova watitiyanja njimoza mwa fundu zo titamba kusambira, kungakuwovyiyani kuti mulekengi kukayika kuti Yehova wawona kweniso watikuphweriyani asani mwakumana ndi masuzgu.

5. Konkhoskani mo munthu wagadabuliya visambizu vaboza.

⁵ Mwati mwayamba kusambira Bayibolu, kumbi ntchinthu wuli cho chingukuwovyani kukana visambizu vaboza? Panyaki mutenere kuti mwapambanisanga vo mwasambizikanga kutchalitchi kwinu ndi vo Malemba ngasambiza. Tiyeni tiwoni chakuyeruzgiyapu ichi: Tiyeruzgiyi kuti pakwamba mwagomezganga kuti Yesu ndi Chiuta Wanthazizosi. Kweni mwati mwayamba kusambira Bayibolu mungwamba kujifumba kuti, ‘Kumbi fundu yeniyi njauneneska nadi?’ Mwati mwasambira kutuliya mu Bayibolu, munguwamu kuti Yesu ndi Chiuta cha. Pavuli paki, mumalu mwakugomezga fundu yaboza yeniyi, mungwamba kugomezga fundu yauneneska ya m’Malemba yakuti Yesu “ndiyu wakwamba kuwaku pa chilengedu chosi” kweniso ndi “Mwana wapade waku Chiuta.” (Ako. 1:15; Yoha. 3:18) Mbuneneska kuti fundu zaboza zingajinthika ‘mwanthazi,’ vo vingachitiska kuti viŵi vakusuzga kuzigadabuwa. (2 Akori. 10:​4, 5) Kweni asani mwasambira uneneska, muleka kugomezga fundu zaboza.—Afi. 3:13.

6. Ntchifukwa wuli mutenere kusimikiza kuti ‘chanju chaku Yehova chambula kumala ntchamuyaya’?

⁶ Mungachita vakuyanana ŵaka asani mukhumba kuti mulekengi kukayikiya vo Bayibolu lisambiza vakukwaskana ndi chanju chaku Yehova. Asani mwakumana ndi masuzgu ndipu mwayamba kukayikiya kuti Yehova watikuyanjani, mungajifumba kuti, ‘Kumbi ndiŵanaŵana umampha penapa?’ Pavuli paki, muŵanaŵaniyengi vo Bayibolu likamba pa Salimo 136:​1, lo ndi lemba lo patuliya mutu wa nkhani iyi. Ntchifukwa wuli Yehova wakonkhoska kuti chanju chaki “ntchambula kumala”? Ntchifukwa wuli mazu ngakuti “chanju chaki chambula kumala ntchamuyaya” ngakuwerezeka maulendu 26 mu Salimo lenili? Nge po tawone, fundu yakuti Yehova watanja ŵanthu ŵaki njimoza mwa fundu zakukhumbika ukongwa zo munthu watamba kusambira. Ndipu ye mugulu la fundu zinyaki za mu Bayibolu zo tawona kali zo munguzigomezga mwati mwazisambira. Fundu yakuti Yehova watikuwonani kuti mwe ambula kukhumbika kweniso wangakuyanjani cha ndi boza likulu ukongwa. Mwaviyo mutenere kukana kugomezga fundu yeniyi nge mo mungakaniya kugomezga fundu yinyaki yeyosi yaboza!

7. Kumbi ndi malemba nganyaki nanga ngo ngatikusimikiziyani kuti Yehova watikuyanjani?

⁷ Mu Bayibolu mwe malemba so nganyaki ngo ngatitisimikiziya kuti Yehova watitiyanja. Mwakuyeruzgiyapu, Yesu wangukambiya akusambira ŵaki kuti: “Mwe akuzirwa ukongwa kuluska mpheta zinandi.” (Mate. 10:31) Yehova nayu wangukambiya ŵanthu ŵaki kuti: “Ndikukholesengi, ndikuwovyengi, ndikukongi ndi janja langu lamaryi la urunji.” (Yesa. 41:10) Mazu ngo ngasanirika pa malemba yanga nganthazi ukongwa. Wonani kuti Yehova kweniso Yesu angukayikiyapu cha ndi kukamba kuti ‘Panyaki mwe akuzirwa ukongwa,’ pamwenga kuti ‘Panyaki ndikuwovyeningi.’ Mumalu mwaki yiwu angukamba kuti: “Mwe akuzirwa ukongwa” kweniso “Ndikuwovyengi.” Asani mwakumana ndi masuzgu ndipu mwayamba kukayikiya kuti Yehova watikuyanjani, malemba yanga ngangakuwovyani kuti muvwengi umampha mumtima. Kweniso kuluska penapa ngangakuwovyani kuti musimikizengi kuti Chiuta watikuyanjani. Ve viyo chifukwa malemba yanga ngakamba fundu za uneneska. Mwaviyo, kupemphera kweniso kuŵanaŵaniyapu malemba ngenanga kungakuwovyani kuti mukambi mazu ngo ngakulembeka pa 1 Yohane 4:16 ngakuti: “Isi taziŵa kweniso tagomezga kuti Chiuta watitiyanja.”a

8. Kumbi mungachita wuli asani nyengu zinyaki mukayikiya kuti Yehova watikuyanjani?

⁸ Kweni kumbi mungachita wuli asani nyengu zinyaki mukayikiya mbwenu kuti Yehova watikuyanjani? Muŵanaŵaniyengi ukongwa vo muziŵa mumalu mwa mo muvwiya mumtima. Mo tivwiya mumtima chifukwa cha masuzgu kungasintha nyengu yeyosi, kweni fundu ya uneneska ya mu Malemba yakuti Yehova watitiyanja, yingasintha cha. Mwaviyo, asani tikayikiya kuti Yehova watitiyanja, ndikuti tikankhiya pamphepeti chanju chaki lo ndi jalidu laki likulu ukongwa.—1 Yoha. 4:8.

MUKUMBUKENGI KUTI YEHOVA ‘WATIKUYANJANI UKONGWA’

9-10. Kumbi Yesu wakambanganji po wangukamba mazu ngakuti “Ada atikuyanjani ukongwa,” pa lemba la Yohane 16:​26, 27? (Wonaniso chithuzi.)

⁹ Tingaziŵa kuti Yehova watitiyanja ukongwa asani tingaŵanaŵaniya mazu ngo Yesu wangukambiya akusambira ŵaki ngakuti: “Ada atikuyanjani ukongwa.” (Ŵerengani Yohane 16:​26, 27.) Yesu wangukamba mazu yanga kuti wakondwesi ŵaka akusambira ŵaki cha. Kweni asani tiŵerenga mavesi ngakuvuli muchaputala chenichi, tiwona kuti pa nyengu iyi Yesu waŵasambizanga vakukwaskana ndi pempheru.

¹⁰ Wechendakambi mazu yanga, Yesu ndipu waŵakambiya kali akusambira ŵaki kuti atenere kupemphera kuziya mwaku iyu kweni atenere kupemphera kwaku iyu cha. (Yoha. 16:​23, 24) Penga pakwenere kuti Yesu waŵasambizi nadi fundu yeniyi akusambira ŵaki. Tikamba viyo chifukwa chakuti panyaki Yesu wati wayuskika, akusambira ŵaki atingi ayambengi kupemphera kwaku iyu. Kumbukani kuti yiwu angumuziŵiriya ukongwa Yesu ndipu wenga bwezi lawu. Mwaviyo, yiwu atingi aŵanaŵanengi kuti pakuti Yesu watiŵayanja ukongwa, asani angapemphera kwaku iyu wangatondeka cha kuthuliya Yehova masuzgu ngawu. Kweni yapa Yesu wanguŵakambiya kuti akhumbika cha kuchita venivi. Chifukwa wuli? Iyu wanguti: “Ada atikuyanjani ukongwa.” Mazu yanga ngo Yesu wangukamba ntchigaŵa cha fundu yinyaki ya mu Bayibolu yo munthu watamba kusambira yakukwaskana ndi pempheru. Kumbi musambiranji penapa? Kusambira Bayibolu kwakuwovyani kuti mumuziŵi umampha ukongwa Yesu kweniso kuti mumuyanjengi. (Yoha. 14:21) Ndipu mwakuyanana ndi akusambira aku Yesu, namwi mungapemphera kwaku Chiuta kwambula kukayikiya chifukwa muziŵa kuti “Ada atikuyanjani ukongwa.” Ndipu nyengu yeyosi asani mupemphera kwaku Yehova, mulongo kuti mutingagomezga mazu ngenanga.—1 Yoha. 5:14.

MUZIŴENGI CHO CHICHITISKA KUTI MUKAYIKIYENGI

11. Ntchifukwa wuli Satana wakondwa asani tikayikiya kuti Yehova watitiyanja?

¹¹ Kumbi ndiyani yo wachitiska kuti tikayikiyengi kuti Yehova watitiyanja? Panyaki mungamuka kuti ndi Satana, ndipu wenuwu mbuneneska nadi chinanga kuti pe vinthu vinyaki so vo vititichitiska kuti tiŵanaŵanengi venivi. Dyaboli ‘wapenja kutimeza’ ndipu wakondwa asani tikayikiya kuti Yehova watitiyanja. (1 Petu. 5:8) Yehova wakupereka sembi yaku Yesu chifukwa chakuti watitiyanja kweni Satana wakhumba kuti tijiwonengi kuti te akubuda ukongwa ndipu te akwenere cha kulonde sembi yeniyi. (Ahe. 2:9) Kweni kumbi ndiyani yo wakondwa ukongwa asani tikayikiya kuti Yehova watitiyanja? Ndi Satana. Nanga tifiska khumbu laku yani asani taleka kuteŵete Yehova chifukwa cha masuzgu? Laku Satana. Satana wakhumba kuti tiŵanaŵanengi kuti Yehova watitiyanja cha. Kweni ili ndi boza chifukwa iyu ndiyu Yehova wangamuyanja so cha. Mwaviyo, iyu wakhumba kuti tijivwengi kuti isi ndisi Yehova wangatiyanja cha kweniso tingaja nayu cha pa ubwezi nge mo viliri ndi iyu. Ndipu wenuwu ngumoza mwa “mauryarya” ngaki ngo wagwiriskiya ntchitu. (Aefe. 6:11) Asani tangaziŵa mauryarya nga murwani widu, vingatiwovya kuti ‘timususki Dyaboli.’—Yako. 4:7.

12-13. Ntchifukwa wuli ubudi wo tikuhara kwaku Adamu utitichitiska kuti tikayikiyengi kuti Yehova watitiyanja?

¹² Pe chinthu chinyaki so cho chititichitiska kuti tikayikiyengi kuti Yehova watitiyanja. Kumbi ntchinthu wuli? Mbubudi wo tikuhara kwaku Adamu. (Salimo 51:5; Aro. 5:12) Ubudi uchitiska kuti ŵanthu aleki kuja pa ubwezi ndi Mlengi wawu. Ndipu ukutimbanyiza so mo tiŵanaŵaniya, mo tivwiya mumtima ndipuso uchitiska kuti titamengi kweniso tikotengi.

¹³ Ubudi uchitiska kuti tijimbengi mulandu, tifipengi mtima, tijikayikiyengi kweniso tichitengi soni. Tituvwa viyo mumtima ukongwa asani tachita ubudi. Kweni tingayamba so kuvwa viyo mumtima chifukwa chakuti tiziŵa kuti te ambula kufikapu ndipu Yehova wangutilenga viyo cha. (Aro. 8:​20, 21) Ŵanaŵaniyani chakuyeruzgiyapu ichi: Galimotu yo ye ndi teyala lakuphwa yitondeka kwenda umampha. Nasi nge ŵanthu ambula kufikapu, titondeka kuchita vinthu umampha, chifukwa tikulengeka viyo cha. Mwaviyo, tingazizwa cha asani nyengu zinyaki tikayikiya asani Yehova watitiyanja. Asani venivi vatichitikiya, tikumbukengi kuti Yehova ndi “mukulu kweniso wakuchitiska mantha, . . . yo walongo chanju chambula kumala ku ŵanthu wo atimuyanja ndi kusunga marangu ngaki.”—Nehe. 1:5.

14. Kumbi kuŵanaŵaniya sembi yaku Yesu kungatiwovya wuli kuti tilekengi kukayikiya kuti Yehova watitiyanja? (Aroma 5:8) (Wonaniso bokosi lakuti “Phweriyani ndi ‘Nthazi Yachinyengu ya Ubudi.’”)

¹⁴ Mbuneneska kuti nyengu zinyaki tingayamba kujiwona kuti te ambula kwenere kuyanjika ndi Yehova. Kukamba uneneska, te akwenere nadi cha kuyanjika ndi Yehova ndichu chifukwa chaki chanju chaki ntchapade ukongwa. Palivi cho tingachita pakutija kuti Yehova watiyanji. Kweni chifukwa chakuti Yehova watitiyanja, iyu wakupereka sembi yaku Yesu kuti tigowokereki maubudi ngidu. (1 Yoha. 4:10) Kumbukani kuti Yesu wanguza kuzitaska ŵanthu akufikapu cha, kweni akubuda. (Ŵerengani Aroma 5:8.) Palivi munthu yo wangachita vinthu mwakufikapu ndipu Yehova nayu wakhaza kuti tichitengi vinthu mwakufikapu cha. Mwaviyo, kuziŵa kuti ubudi wo tikuhara kwaku Adamu ungatichitiska kuti tikayikiyengi kuti Yehova watitiyanja, kutitiwovya kuti tiyesesengi kulimbana nawu kuti uleki kutichitiska kuŵanaŵana venivi.—Aro. 7:​24, 25.

LUTIRIZGANI KUJA WAKUGOMEZGEKA

15-16. Kumbi tingasimikizanji asani tilutirizga kuja akugomezgeka kwaku Yehova, nanga ntchifukwa wuli? (2 Samuyeli 22:26)

¹⁵ Yehova wakhumba kuti tilutirizgi “kumudemetere.” (Doto. 30:​19, 20) Asani tichitengi viyo, tikayikiyengi cha kuti Yehova nayu walutirizgengi kuja wakugomezgeka kwaku isi. (Ŵerengani 2 Samuyeli 22:26.) Asani tilutirizgengi kuja akugomezgeka kwaku Yehova, iyu watiwovyengi asani takumana ndi masuzgu pa umoyu widu.

¹⁶ Nge mo tawone munkhani iyi, tawona kuti te ndi vifukwa vakuvwika vo vingatiwovya kuti tikunthiyengepu mayeseru ngo tikumana nangu. Tiziŵa kuti Yehova watitiyanja ukongwa ndipu watiwovyengi chifukwa ndivu Bayibolu lisambiza. Asani tayamba kukayikiya kuti Yehova watitiyanja, tiŵanaŵaniyengi vo tiziŵa vakukwaskana ndi chanju chaki mumalu mwakuŵanaŵaniya ŵaka mo tivwiya mumtima. Tiyeni tilutirizgi kugomezga fundu ya mu Bayibolu yakuti chanju chaku Yehova chambula kumala ntchamuyaya.