Yehova Watikuyanjani Ukongwa

1. Kumbi ntchinthu wuli cho chituza mumaŵanaŵanu nginu asani muŵanaŵaniya vaku Yehova?

KUMBI mukuŵanaŵaniyapu kuti Yehova ndi munthu wa mtundu wuli? Kumbi ntchinthu wuli cho chituza mumaŵanaŵanu mwinu asani mupemphera kwaku iyu? Chinanga kuti tingamuwona cha Yehova, kweni Bayibolu litimukonkhoska mu nthowa zakupambanapambana. Yehova wadanika kuti ndi “lumwi kweniso ntchishangu” ndipuso “motu wakupiriza.” (Salimo 84:11; Ahe. 12:29) Muchiwona cho Ezekiyeli wanguwona, wangukonkhoska Yehova kuti wawonekanga nge mwa wa safiro, chisulu chakuŵala kweniso chiŵingavuwa chakutowa ukongwa. (Ezeki. 1:​26-28) Venivi vingatichitiska kuti tichitengi mantha pamwenga kujiwona kuti te akuzirwa cha kwaku iyu.

2. Kumbi ndi vinthu wuli vo vingatondekesa ŵanthu anyaki kuja pa ubwezi ndi Yehova?

² Chifukwa chakuti tingamuwona cha Yehova, vingatisuzga kugomezga kuti iyu watitiyanja. Ŵanthu anyaki vitiŵasuzga kugomezga kuti Yehova watiŵayanja chifukwa cha vinthu viheni vo vikuŵachitikiyapu. Vingaŵa kuti awusewu aŵayanjanga cha. Yehova wavwisa mo tivwiya kweniso mo venivi vititikwaskiya. Kuti watiwovyi kumuziŵa umampha, wativumbuliya mo iyu waliri kuziya mu Mazu ngaki.

3. Ntchifukwa wuli tikhumbika kusambira vinandi vakukwaskana ndi chanju chaku Yehova?

³ Bayibolu likonkhoska kuti Yehova ntchanju. (1 Yoha. 4:8) Ndipu lenili ndilu jalidu laki likulu ukongwa. Chechosi cho iyu wachita watichichita chifukwa cha chanju. Chanju chaku Chiuta ntchikulu mwakuti watanja ŵanthu wosi kusazgapu wo aleka kumuyanja. (Mate. 5:​44, 45) Mu nkhani iyi tikambiskanengi ukongwa vaku Yehova kweniso chanju chaki. Kusambira vinandi vakukwaskana ndi Chiuta widu kutiwovyengi kuti timuyanjengi ukongwa.

YEHOVA WATITIYANJA UKONGWA

4. Kumbi mutuvwa wuli chifukwa chakuziŵa kuti Yehova we ndi chanju chikulu ukongwa? (Wonani so chithuzi.)

⁴ “Yehova ngwachanju chikulu ukongwa.” (Yako. 5:11) Iyu watijiyeruzgiya ndi ama wo atanja ukongwa mwana wawu. (Yesa. 66:​12, 13) Ŵanaŵaniyani ama wo atanja kweniso kuŵanaŵaniya ukongwa mwana wawu. Yiwu atimufukatiya kweniso aŵereŵereta nayu mwachanju. Asani waliya pamwenga watuvwa urwirwi, awonesesa kuti amupaska vo wakhumba. Mwakuyanana ŵaka, asani nasi tasuzgika maŵanaŵanu tingasimikiza kuti Yehova watitiyanja. Wamasalimo wakulemba kuti: “Vinthu vakufipiska mtima vati vandimala nthazi, yimwi mungundipembuzga kweniso mungundisisipuwa.”—Salimo 94:19.

5. Kumbi chanju chambula kumala chaku Yehova chingakuwovyani wuli?

⁵ Yehova ngwakugomezgeka. (Salimo 103:8) Iyu waleka cha kutiyanja asani tanangisa. Ayisirayeli amuguŵisanga kananandi ŵaka. Kweni asani alapa iyu waŵalongonga chanju chambula kumala. Mwakuyeruzgiyapu, iyu wanguŵakambiya kuti: “Waja wakuzirwa mu masu mwangu, ungutumbikika ndipu ndakuyanja.” (Yesa. 43:​4, 5) Chanju chaku Chiuta chikusintha cha. Nyengu zosi tingamugomezga kuti watitiyanja. Chinanga tingachita ubudi ukulu, Yehova watitijowo cha. Asani talapa ndi kuwere kwaku Yehova, tiwona mbwenu kuti wechekutiyanja. Iyu walayizga kuti “wagowokengi ukongwa.” (Yesa. 55:7) Bayibolu likamba kuti asani iyu watigowoke, “nyengu zakusisipuwa [zizengi] kutuliya kwaku Yehova.”—Machi. 3:19.

6. Kumbi lemba la Zekariya 2:8 lititisambizanji vakukwaskana ndi Yehova?

⁶ Ŵerengani Zekariya 2:8. Chifukwa chakuti Yehova watitiyanja, waswera cha kuziŵa mo tivwiya ndipu wakhumbisiska kutivikiliya. Iyu waguŵa asani tasuzgika maŵanaŵanu. Mwaviyo tingasimikiza kuti iyu watimukengi asani tapemphera kuti: “Ndivikiliyeni nge mboni ya jisu linu.” (Salimo 17:8) Jisu ntchiŵalu chakuzirwa ukongwa cha liŵavu, ndipu liswera cha kuziŵa asani mwakwaska pamwenga mwasere kanthu. Mwaviyo asani Yehova watitiyeruzgiya ndi mboni ya jisu laki, ve nge kuti wakamba kuti, ‘Weyosi yo wakupwetekani mwaŵanthu ŵangu, wapweteka chinthu chakuzirwa chaku ini.’

7. Ntchifukwa wuli tikhumbika kusimikiza kuti Yehova watitiyanja?

⁷ Yehova wakhumba kuti tigomezgengi kuti watitiyanja weyosi pakuyija. Kweni waziŵa kuti chifukwa cha vo vingutichitikiyapu kuvuli, tingakayikiya asani iyu watitiyanja. Pamwenga pasonu panu tikumana ndi vinthu vinyaki vo vingachitiska kuti tikayikiyengi asani Yehova watitiyanja. Ntchinthu wuli cho chingatiwovya kuti tigomezgengi ukongwa kuti Yehova watitiyanja? Tiyeni tiwoni mo Yehova walongore kuti watanja Yesu, akusankhika kweniso tosi.

MO YEHOVA WALONGORE KUTI WATITIYANJA

8. Ntchifukwa wuli Yesu wasimikizanga kuti Awisi atimuyanja?

⁸ Yehova ndi Mwana waki ajaliya limoza kwa nyengu yitali ukongwa kuluska munthu weyosi. Ndipu kwa vyaka mabiliyoni nganandi vo ajaliya limoza kuchanya, aja pa ubwezi wakukho kweniso atanjana ukongwa. Mphakuvwika kuti Yehova wangukonkhoska mo watimuyanjiya Yesu pa Mateyu 17:5. Yehova watingi wakambengi ŵaka kuti ‘Munthu uyu ndiyu watindikondwesa.’ Kweni iyu wakhumbanga kuti isi tiziŵi kuti watimuyanja ukongwa Yesu. Mwaviyo wangumudana kuti, “Mwana wangu, mweniyo nditanja.” Yehova wamuyanjanga ukongwa Yesu chifukwa chakuti wangukhumbisiska kupereka umoyu waki. (Aefe. 1:7) Ndipu Yesu wakayikiyanga cha kuti Awisi atimuyanja. Chanju chaku Yehova paku Yesu chenga chayichu mwakuti wachitanga kusimikiza venivi mumtima mwaki. Ndipu mwakuwerezawereza wangukambiya ŵanthu kuti Awisi atimuyanja.—Yoha. 3:35; 10:17; 17:24.

9. Kumbi ndi mazu nanga ngo ngalongo kuti Yehova watanja akusankhika? Konkhoskani. (Aroma 5:5)

⁹ Yehova walongo so kuti watanja akusankhika. (Ŵerengani Aroma 5:5.) Wonani mazu ngakuti “chapungulikiya.” Buku linyaki lakukonkhoska Bayibolu likamba kuti mazu ngenanga ngang’anamuwa kuti “chaza paku isi nge msinji.” Mazu ngenanga ngalongo kuti Yehova watiŵayanja ukongwa akusankhika. Akusankhika aziŵa kuti “atanjika ndi Chiuta.” (Yuda 1) Wakutumika Yohane wangukonkhoska mo yiwu avwiya po wangulemba kuti: “Ŵanaŵaniyani chanju cho Ada akutilongo, kuti tidaniki ŵana aku Chiuta!” (1 Yoha. 3:1) Kumbi Yehova watanja akusankhika pe? Awa! Yehova walongo so kuti watanja tosi.

10. Kumbi ntchinthu wuli cho chilongo kuti Yehova watikuyanjani ukongwa?

¹⁰ Kumbi Yehova walongo wuli kuti watitiyanja nadi? Iyu wakupereka sembi yakuwombole ndipu wakulongo kuti watitiyanja ukongwa kuluska mo ŵanthu atitiyanjiya. (Yoha. 3:16; Aro. 5:8) Yehova wakutipaska Mwana waki wapade ndipu wanguzomereza kuti wafwiyi ŵanthu wosi kuti maubudi ngidu ngagowokereki kweniso kuti tije nayu pa ubwezi. (1 Yoha. 4:10) Asani tiŵanaŵaniya ukongwa vo Yehova ndi Yesu akutichitiya tingavwisa kuti yiwu atanja weyosi waku isi. (Aga. 2:20) Sembi yaku Yesu yinguperekeka chifukwa chakuti Yehova wakhumbanga kuti urunji uwoneki ŵaka cha. Kweni ndi mphasu yo yilongo kuti watitiyanja. Yehova wakulongo kuti watitiyanja ukongwa pakupereka Yesu, yo ndi Mwana waki wakuzirwa ukongwa. Yehova wanguzomereza kuti Mwana waki wasuzgiki ndi kufwa chifukwa chaku isi.

11. Kumbi tisambiranji pa Yeremiya 31:3?

¹¹ Nge mo tawone, Yehova watuvwa ŵaka mumtima cha kuti watitiyanja kweni watitikambiya kuti watitiyanja ukongwa. (Ŵerengani Yeremiya 31:3.) Yehova watiguziya kwaku iyu chifukwa chakuti watitiyanja. (Yeruzgiyani ndi Dotoronome 7:​7, 8.) Palivi chinthu chechosi pamwenga munthu weyosi yo wangatipatuska ku chanju chaku iyu. (Aro. 8:​38, 39) Kumbi mutuvwa wuli kuziŵa kuti Yehova watikuyanjani? Ŵerengani Salimo 23 ndipu wonani mo Davidi wavwiyanga kuziŵa kuti Yehova watimuyanja ndipuso kumuphwere kweniso mo namwi mungavwiya.

KUMBI MUTUVWA WULI CHIFUKWA CHA KUZIŴA KUTI YEHOVA WATIKUYANJANI?

12. Kumbi mungalikonkhoska wuli lemba la Salimo 23?

¹² Ŵerengani Salimo 23:​1-6. Salimo 23 ndi sumu yo yilongo kuti Davidi wagomezganga kuti Yehova watimuyanja kweniso watimuphwere. Davidi yo wangulemba Salimo lenili wangukonkhoska kuti wenga pa ubwezi wakukho ndi Mliska waki Yehova. Davidi wajivwanga kuti ngwakuvikilirika chifukwa wanguzomereza kuti Yehova wamulongozgengi ndipu wamuthembanga ukongwa. Iyu waziŵanga kuti Yehova wamuyanjengi zuŵa lelosi kwa umoyu waki wosi. Ntchifukwa wuli wamugomezganga ukongwa viyo Yehova?

13. Ntchifukwa wuli Davidi wangusimikiza kuti Yehova wamuphweriyanga?

¹³ “Ndisoŵengi kanthu cha.” Davidi wajivwanga kuti Yehova watimuphwere chifukwa nyengu zosi wamupaskanga vinthu vo wakhumbikanga. Iyu waziŵanga so kuti Yehova ndi mubwezi waki kweniso kuti watimuyanja. Ndichu chifukwa chaki wangusimikiza kuti kwali wakumani ndi suzgu wuli kunthazi, Yehova walutirizgengi mbwenu kumuphwere. Chifukwa chakuti Davidi wagomezganga kuti Yehova watimuyanja kweniso kuti wamuphweriyengi, vamuwovyanga kuti walekengi kufipa mtima ndipu iyu wakondwanga kweniso wakhorwanga.—Salimo 16:11.

14. Kumbi Yehova wangatiphwere wuli?

¹⁴ Yehova watitiphwere, ukongwa asani vinthu viheni vatichitikiya. Claire,a yo wateŵete pa Beteli kwa vyaka vakujumpha 20, waziŵanga cha kuti waŵawovyengi wuli ŵanthu a mu banja laki ŵati akumana ndi masuzgu ngakundondozana ŵaka. Awisi anguchita sitiroku, muvurwa waki wangusezgeka ndipu bizinesi ya banja lawu yinguwa kweniso ŵengavi pakuja. Kumbi Yehova wangulongo wuli kuti waŵayanjanga kweniso kuŵaphwere? Claire wangukamba kuti: “Yehova wawonesesanga kuti nyengu zosi ŵanthu a mubanja langu ŵe ndi vinthu vakhumbika zuŵa lelosi. Yehova watiwovyanga kusaniya vinthu vinandi kuluska vo takhumbikiyanga. Kanandi ndiŵanaŵaniya mo Yehova wangutiwovye ndipu ndiluwengi cha chanju chaki. Venivi vandiwovya kuti ndilutirizgengi kuteŵete mwalikondwa chinanga ndingakumana ndi suzgu linyaki lelosi.”

15. Ntchifukwa wuli Davidi wajivwanga kuti wasisipulika? (Wonani so chithuzi.)

¹⁵ “Iyu watindisisipuwa.” Nyengu zinyaki Davidi wasuzgikanga maŵanaŵanu chifukwa cha masuzgu kweniso mayeseru ngo wakumananga nangu. (Salimo 18:​4-6) Kweni iyu wasisipulikanga chifukwa chakuti Yehova wamuyanjanga kweniso kumuphwere. Yehova wangulongozge mubwezi waki yo wanguthamba ku “uteka wakubiriŵira” kweniso “kumalu ngakupumuliya ko kwe maji nganandi.” Venivi vinguchitiska kuti Davidi wasaniyi so nthazi kweniso walutirizgi kuteŵete Yehova.—Salimo 18:​28-32.

16. Kumbi chanju chaku Yehova chakusisipuwani wuli?

¹⁶ Mazuŵa nganu napu asani takumama ndi mayeseru kweniso masuzgu nganyaki, ‘timaliya limu cha chifukwa cha chanju chambula kumala chaku Yehova.’ (Chite. 3:22; Ako. 1:11) Tiyeni tiwoni vo vinguchitikiya Rachel. Mu nyengu ya mlili wa COVID-19, vingumuŵaŵa ukongwa mumtima mulumu waki wati wamuleka kweniso wati waleka kuteŵete Yehova. Kumbi Yehova wangumuchitiyanji? Iyu wangukamba kuti: “Yehova wanguwonesesa kuti ndijivwengi kuti nditanjika. Iyu wangundipaska mabwezi ngo ngachezanga nani, ngandipaskanga chakurya, nganditumiziyanga mameseji nga chanju ndi malemba ngakuchiska, ngasekanga nani kweniso ngandikumbusanga kuti Yehova watindiŵanaŵaniya. Nyengu zosi nditimuwonga Yehova chifukwa chakundipaska banja likulu lauzimu lo litindiyanja ukongwa.”

17. Ntchifukwa wuli Davidi ‘wawopanga chechosi cha’?

¹⁷ “Nditopa chechosi cha, pakuti yimwi, mwe nani.” Kanandi umoyu waku Davidi waŵanga pa ngozi ndipu wenga ndi arwani ŵaki anandi anthazi. Kweni iyu wajivwanga kuti ngwakuvikilirika chifukwa chakuti Yehova wamuyanjanga. Davidi waziŵanga kuti Yehova wenayu pa suzgu yeyosi yo wangakumana nayu ndipu venivi vamusimikiziyanga kuti Yehova watimuyanja. Ndichu chifukwa chaki wangulemba kuti: “[Yehova] wangunditaska ku vinthu vosi vo ndawopanga.” (Salimo 34:4) Chinanga kuti nyengu zinyaki Davidi wachitanga mantha ukongwa, kweni iyu wamalananga ndi mantha ngenanga chifukwa chakuti waziŵanga kuti Yehova watimuyanja.

18. Kumbi kuziŵa kuti Yehova watikuyanjani kungakuwovyani wuli asani muchita mantha?

¹⁸ Kumbi kuziŵa kuti Yehova watitiyanja kutitichiska wuli asani takumana ndi vinthu vakuchitiska mantha? Mpayiniya munyaki zina laki Susi wangukonkhoska mo iyu ndi mulumu waki anguvwiya mwana wawu wati wajibaya. Iyu wangukamba kuti: “Asani chinthu chinyaki chakupaska chitima ukongwa chakuchitikiya pa umoyu, vitikukwaska ukongwa ndipu utijivwa kuti palivi yo wangakuwovya. Kweni chanju chikulu chaku Yehova chatiwovya kujivwa kuti te akuvikilirika.” Rachel yo tamuzumbuwapu kali wangukamba kuti: “Zuŵa linyaki ndi usiku ndati ndaguŵa ukongwa kweniso kufipa mtima ndi kuchita mantha, ndingumuliriya Yehova mu pempheru. Ndati ndamaliza ŵaka kupemphera, ndinguvwa kuti iyu wandipembuzga kweniso wazikisa mtima wangu nge mo ma wachitiya ndi mwana waki ndipu ndingugona. Ndiyiluwengepu cha nyengu yeniyi.” Mura munyaki zina laki Tasos wanguja vyaka vinayi mujeri chifukwa chakukana kusere usilikali. Kumbi Yehova wangulongo wuli kuti watimuyanja kweniso kumuphwere? Iyu wangukamba kuti: “Yehova wandipaskanga vinthu vinandi kuluska vo ndakhumbikiyanga. Venivi vingundiwovya kusimikiza kuti ndingamuthemba ukongwa Yehova. Kweniso mwakugwiriskiya ntchitu mzimu waki, Yehova wandiwovyanga kuti ndikondwengi chinanga kuti ndenga mumalu ngo ngatingi ngandichitiskengi kuti ndisuzgikengi maŵanaŵanu. Venivi vingundiwovya kusimikiza kuti asani nditimuthemba ukongwa Yehova vindiwovyengi kuti ndiwonengi kuti iyu watindiyanja ukongwa. Mwaviyo, ndingwamba kuchita upayiniya wa nyengu zosi nde mujeri.”

NDERENI KUFUPI NDI CHIUTA WA CHANJU CHIKULU

19. (a) Kumbi tingapemphera wuli asani tiziŵa kuti Chiuta watitiyanja? (b) Kumbi ndi mazu nanga ngakukonkhoska chanju chaku Yehova ngo ngatikufikani pamtima? (Wonani bokosi lakuti, “Malemba Ngo Ngatitiwovya Kuziŵa kuti Yehova Watitiyanja Ukongwa.”)

¹⁹ Vo vinguchitikiya ŵanthu wo takambiskana mu nkhani iyi, vilongo kuti Yehova “Chiuta wachanju” we nasi! (2 Akori. 13:11) Iyu watanja weyosi waku isi pakuyija. Tisimikiza kuti ‘tazingilizika ndi chanju Chaki chambula kumala.’ (Salimo 32:10) Asani tiŵanaŵaniya ukongwa mo iyu walongore kuti watitiyanja, tisimikiza kuti iyu watitiŵanaŵaniya ndipu titijivwa kuti te nayu pafupi ukongwa. Tingapemphera kwaku iyu kwambula kopa ndi kumukambiya kuti tikhumbisiska kuti watiyanjengi. Tingamukambiya vosi vo vititifipiska mtima chifukwa tisimikiza kuti watitivwisa kweniso kuti wakhumbisiska kutiwovya.—Salimo 145:​18, 19.

20. Kumbi chanju chaku Yehova chititiwovya wuli kundere kufupi ndi iyu?

²⁰ Nge mo tindelere kufupi ndi motu asani kwazizira, tindere kwaku Yehova chifukwa chakuti watitiyanja. Chanju chaku Yehova ntchikulu ukongwa. Mwaviyo mukondwengi chifukwa chakuti watikuyanjani. Ndipu chifukwa chakuti Yehova watitiyanja, tiyeni tosi tikambengi kuti: “Nditanja Yehova”!—Salimo 116:1.