Mungakayikiyanga Cha Kuti Yehova Watikuyanjani

1. Ntchifukwa wuli mukujipereka kwaku Yehova? (Wonaniso chithuzi.)

KUMBI mukumbuka zuŵa lo mungujipereke kwaku Yehova mupempheru? Mungusankha kuchita venivi chifukwa chakuti mutimuziŵa umampha kweniso mutimuyanja. Mwaviyo, mungumulayizga kuti kuchita khumbu laki ndichu chijengi chinthu chakukhumbika ukongwa pa umoyu winu. Mungumulayizgaso kuti mulutirizgengi kumuyanja ndi mtima winu wosi, umoyu winu wosi, maŵanaŵanu nginu ngosi kweniso nthazi zinu zosi. (Mariko 12:30) Kwambiya pa zuŵa lenili, mulutirizga kumuyanja ukongwa Yehova. Kweni kumbi mungamuka wuli asani sonu munthu munyaki wangakufumbani kuti, “Kumbi mutimuyanja nadi Yehova?” Tikayika cha kuti penipo ndi penipo mungamumuka kuti, “Hinya, nditimuyanja ukongwa kuluska munthu pamwenga chinthu chechosi!”

2-3. Kumbi Yehova wakhumba kuti tigomezgengenji, nanga tikambiskanengenji munkhani iyi? (Yeremiya 31:3)

² Kweni kumbi mungamuka wuli asani munthu munyaki wangakufumbani kuti,“Kumbi Yehova watikuyanjani nadi?” Kumbi mungasweriyapu kumuka fumbu lenili ndi kwamba kujikayikiya kuti Yehova watikuyanjani? Mzichi munyaki yo apapi ŵaki amuchitiyanga nkhaza wangukamba kuti: “Ndiziŵa kuti nditimuyanja Yehova. Ndikayikiyapu cha venivi. Kweni kanandi ndikayikiya asani Yehova watindiyanja nadi.” Sonu ntchinthu wuli cho chingakuwovyani kuziŵa kuti Yehova watikuyanjani nadi?

³ Yehova wakhumba kuti mungakayikanga cha kuti iyu watikuyanjani. (Ŵerengani Yeremiya 31:3.) Uneneska ngwakuti Yehova wakukuguziyani kwaku iyu. Ndipu mwati mwajipereka ndipuso kubatizika, Yehova wakukupaskani mphasu yapade ukongwa yo ntchanju chaki chambula kumala. Venivi ving’anamuwa kuti iyu watikuyanjani ukongwa ndipu wazakukujowonipu cha. Chanju chaki chitimuwovya kuti wawonengi ateŵeti ŵaki akugomezgeka kusazgapu yimwi kuti ‘ntchuma chaki chakuzirwa.’ (Mala. 3:​17, mazu ngamumphata) Yehova wakhumba kuti musimikizengi kuti iyu watikuyanjani ukongwa nge mo wakutumika Paulo wangusimikiziya. Paulo wangulemba kuti: “Ndasimikiza mtima kuti kwali ndi nyifwa, kwali mbumoyu, kwali mbangelu, kwali ndi maboma, kwali ndi vinthu vo vilipu sonu, kwali ndi vinthu vo vituza, kwali ndi nthazi, kwali mbutali wamuchanya, kwali mbutali wapasi, pamwenga chinthu chinyaki chechosi chakulengeka, chingatipatuska cha ku chanju chaku Chiuta.” (Aro. 8:​38, 39) Munkhani iyi, tiwonengi chifukwa cho titenere kugomezge kuti Yehova watitiyanja nadi kweniso vo vingatiwovya kuchita venivi.

NTCHIFUKWA WULI MUTENERE CHA KUKAYIKIYA KUTI YEHOVA WATIKUYANJANI?

4. Kumbi Satana wakhumba kuti tigomezgengi boza nili, nanga tingachita wuli kuti tikani boza lenili?

⁴ Asani tikayika cha kuti Yehova watitiyanja, vititiwovya kuti ‘tilimbani ndi mauryarya’ ngaku Satana. (Aefe. 6:11) Satana wakhumba kuti tileki kuteŵete Yehova. Iyu wachita vosi vo wangafiska kuti venivi vichitiki. Ndipu nthowa yimoza yo wachitiya venivi nkhutichitiska kuti tiŵanaŵanengi kuti Yehova watitiyanja cha. Kweni lenili ndi boza likulu ukongwa. Bayibolu liyeruzgiya Satana ndi nkharamu. (1 Petu. 5:​8, 9) Nkharamu zitanja kuko nyama zo zalopwa kweniso zo zingajivikiliya cha. Mwakuyanana ŵaka, kanandi Satana walimbana nasi asani talopwa, tavuka pamwenga asani taguŵa chifukwa cha vinthu viheni vo vikutichitikiyapu kuvuli, masuzgu ngo tikumana nangu sonu pamwenga asani tifipiya mtima vinthu va kunthazi. (Nthanthi 24:10) Satana waŵanaŵana kuti wangatichitiska kuti tilopwi ukongwa mpaka kuleke limu kuteŵete Yehova. Kweni ‘tingamususka Dyaboli’ kweniso kukana mauryarya ngaki asani tichita vosi vo tingafiska kuti tigomezgengi kuti Yehova watitiyanja.—Yako. 4:7.

5. Ntchifukwa wuli kuziŵa kuti Yehova watitiyanja kweniso watitiwona kuti te akuzirwa nkhwakukhumbika ukongwa?

⁵ Asani tikayika cha kuti Yehova watitiyanja, vititiwovya kuja nayu pa ubwezi. Ntchifukwa wuli tikamba viyo? Yehova wakutilenga ndi mtima wakwanja anyidu kweniso kuti tikondwengi asani nawu atitiyanja. Asani munthu munyaki watitiyanja, vititiwovya kuti nasi timuyanjengi. Mwaviyo, asani tikayikiya cha kuti Yehova watitiyanja kweniso watitiwona kuti te akuzirwa, nasi titimuyanja ukongwa. (1 Yoha. 4:19) Ndipu asani titimuyanja ukongwa, nayu watitiyanja ukongwa. Ndichu chifukwa chaki Bayibolu likamba kuti: “Ndereni kufupi ndi Chiuta, ndipu nayu wanderengi kufupi ndi yimwi.” (Yako. 4:8) Kweni kumbi tingachita wuli kuti tilekengi kukayika kuti Yehova watitiyanja nadi?

VO VINGATIWOVYA KUTI TILEKENGI KUKAYIKA KUTI YEHOVA WATITIYANJA

6. Kumbi mungachita wuli asani mukayikiya kuti Yehova watikuyanjani nadi?

⁶ Lutirizgani kupempha Yehova kuti wakuwovyeni kugomezga kuti watikuyanjani. (Luka 18:1; Aro. 12:12) Zuŵa lelosi ndipuso kaŵikaŵi mupemphengi Yehova kuti wakuwovyeni kuti mujiwonengi nge mo iyu watikuwoniyani. Mbuneneska kuti nyengu zinyaki mungayamba kujikayikiya mwakuti vingaŵa vakusuzga kugomezga kuti Yehova watikuyanjani. Kweni mukumbukengi kuti Yehova ndi mukulu kuluska mtima winu. (1 Yoha. 3:​19, 20) Iyu watikuziŵani umampha ukongwa kuluska mwaŵeni kweniso wawona mijalidu yamampha yo mwenayu yo yimwi mungayiwona cha. (1 Samu. 16:7; 2 Mbiri 6:30) Mwaviyo mumukambiyengi mo muvwiya mumtima ndipu mumupemphengi kuti wakuwovyeni kugomezga kuti iyu watikuyanjani. (Salimo 62:8) Pavuli paki, muchitengi vinthu mwakukoliyana ndi mapempheru nginu mwakugwiriskiya ntchitu masachizgu ngo nge mundimi zakulondopu.

7-8. Kumbi buku la Masalimo lititiwovya wuli kusimikiziya kuti Yehova watitiyanja?

⁷ Mugomezgengi vo Yehova wakamba. Yehova wanguwovya wo alembanga Bayibolu kuti alembi vinthu vauneneska vakukwaskana ndi iyu. Mwakuyeruzgiyapu, mu salimo linyaki Davidi wangukonkhoska mwakuvwika umampha kuti Yehova watitiŵanaŵaniya. Iyu wangulemba kuti. “Yehova we pafupi ndi wo asweka mtima; iyu wataska wo agongoweseka.” (Salimo 34:​18, mazu ngamumphata.) Asani mwaguŵa mungajiwona nge kuti mwe mwija. Kweni Yehova wakulayizga kuti asani mwaguŵa, iyu wajengi namwi pafupi chifukwa waziŵa kuti mukhumbika chovyu chaki. Ndipu mu salimo linyaki Davidi wangulemba kuti: “Wunganisani masozi ngangu mubotolu linu lachikopa.” (Salimo 56:8) Lemba ili lilongo kuti Yehova wawona asani mukumana ndi masuzgu. Iyu watikuŵanaŵaniyani ukongwa kweniso vitimuŵaŵa ukongwa kukuwonani kuti musuzgika. Mwakuyeruzgiyapu, munthu yo watenda muchipululu wawona kuti maji ngo wapinga mubotolu laki lachikopa ngakuzirwa ukongwa. Mwakuyanana ŵaka, Yehova nayu wawona kuti masozi nginu ngakuzirwa ukongwa ndipu wakumbuka nyengu yeyosi yo muliya. Ndipu pa Salimo 139:​3, pakamba kuti: “Nthowa zangu zosi mutiziziŵa umampha.” Lemba ili lilongo kuti Yehova wawona nthowa zinu zosi, kweni iyu waŵanaŵaniya ukongwa vinthu vamampha vo muchita. (Ahe. 6:10) Ntchifukwa wuli tikamba viyo? Chifukwa chakuti iyu wawona kuti vosi vo mutesesa kuchita kuti mumukondwesengi vakuzirwa kwaku iyu.a

⁸ Yehova watitichiska kuziya mu Mazu ngaki. Ndipu vija nge kuti watitikambiya kuti: “Ndikhumba kuti uziŵi kuti nditikuyanja ukongwa kweniso kuti nditikuŵanaŵaniya.” Kweni nge mo tawone kukwamba kwa nkhani iyi, Satana wakhumba kuti mugomezgengi boza lakuti Yehova watikuyanjani cha. Mwaviyo, asani nyengu zinyaki mukayikiya kuti Yehova watikuyanjani, mujifumbengi kuti, ‘Kumbi ndigomezgengi yani? Ndigomezgengi Satana yo ndi “wisi wa boza” pamwenga ndigomezgengi Yehova yo ndi “Chiuta wauneneska”?’—Yoha. 8:44; Salimo 31:5.

9. Kumbi Yehova watiŵasimikiziyanji ŵanthu wo atimuyanja? (Ekisodo 20:​5, 6)

⁹ Muŵanaŵaniyengi vo Yehova wachitiya ŵanthu wo atimuyanja. Kumbukani vo Yehova wangukambiya Mozesi kweniso Ayisirayeli. (Ŵerengani Ekisodo 20:​5, 6.) Yehova wangulayizga kuti walutirizgengi kuŵalongo chanju chaki chambula kumala ŵanthu wo atimuyanja. Chifukwa chakuti Chiuta ngwakugomezgeka, iyu walekengepu cha kuŵayanja ŵanthu wo atimuyanja. (Nehe. 1:5) Mwaviyo, asani nyengu zinyaki mukayikiya kuti Yehova watikuyanjani, mujifumbengi kuti, ‘Kumbi ini nditimuyanja Yehova?’ Pavuli paki mukumbukengi fundu iyi: Asani yimwi mutimuyanja Yehova ndipuso muyesesa kuchita vo vitimukondwesa, mbwenu palivi chifukwa chakuti mukayikiyengi kuti nayu watikuyanjani. (Dani. 9:4; 1 Akori. 8:3) Yapa fundu njakuti, asani yimwi mukayikiya cha kuti mutimuyanja Yehova, mungakayikiyanga so cha kuti nayu watikuyanjani! Iyu walutirizgengi kukuyanjani ndipu wakujowoningipu cha.

10-11. Kumbi Yehova wakhumba kuti muyiwonengi wuli sembi yaku Yesu? (Agalatiya 2:20)

¹⁰ Muwonengi kuti sembi yaku Yesu ndi mphasu yapade. Sembi yeniyi ndi mphasu yapade ukongwa yo Yehova wakupaska ŵanthu. (Yoha. 3:16) Kweni kumbi namwi muwona kuti Yesu wakukufwiyani pakumwija? Tiyeni tikambiskani chakuwoniyapu chaku Paulo. Iyu wechendaje Mkhristu wanguchitapu maubudi ngakulungakulu ndipu wati waja Mkhristu walimbananga mbwenu ndi vinthu vo wanangisanga. (Aro. 7:​24, 25; 1 Timo. 1:​12-14) Chinanga kuti venga viyo, Paulo wawonanga kuti Yesu wakumufwiya iyu pakuyija. (Ŵerengani Agalatiya 2:20.) Ndipu kumbukani kuti Yehova ndiyu wanguwovya Paulo kulemba mazu ngenanga kweniso vosi vo ve mu Bayibolu vikulembeka kuti vitisambizi. (Aro. 15:4) Vo Paulo wakulemba vilongo kuti Yehova wakhumba kuti yimwi muwonengi kuti sembi yaku Yesu ndi mphasu yo Yehova wakukupaskani yimwi pakumwija. Asani sembi yaku Yesu mutiyiwona munthowa yeniyi, vikuwovyeningi kugomezga kuti Yehova watikuyanjani yimwi pakumwija.

¹¹ Titimuwonga ukongwa Yehova chifukwa wangutuma Yesu pacharu kuti wazitifwiyi. Kweni Yesu wanguza so pacharu kuti wazisambizi ŵanthu uneneska wakukwaskana ndi Chiuta. (Yoha. 18:37) Ndipu vo iyu wangusambiza vingulongo so kuti Yehova watitiyanja ukongwa.

MO YESU WAKUTIWOVYE KUTI TILEKENGI KUKAYIKA KUTI YEHOVA WATITIYANJA

12. Ntchifukwa wuli titenere kugomezga vo Yesu wangukamba vakukwaskana ndi Yehova?

¹² Po wenga pacharu chapasi, Yesu wakambiyanga ŵanthu mijalidu yo Yehova wenayu. (Luka 10:22) Titenere kugomezga vo Yesu wangukamba vakukwaskana ndi Yehova chifukwa chakuti iyu wanguja ndi Yehova kuchanya kwa nyengu yitali wechendazi pacharu. (Ako. 1:15) Mwaviyo, Yesu wangujiwone yija mo Yehova wamuyanjiyanga ndipuso mo wayanjiyanga angelu kweniso ŵanthu akugomezgeka pacharu chapasi. Kumbi Yesu wakutiwovya wuli kuti tigomezgengi kuti Yehova watitiyanja?

13. Kumbi Yesu wakhumba kuti timuwonengi wuli Yehova?

¹³ Yesu wakhumba kuti tiwonengi Yehova nge mo iyu watimuwone. Mumabuku nga Uthenga Wamampha, Yesu wakugwiriskiya ntchitu mazu ngakuti “Ada” maulendu ngananandi ŵaka pakudana Yehova. Asani wakambiskana ndi akusambira ŵaki, kanandi wagwiriskiyanga ntchitu mazu ngakuti “Awusemwi” pamwenga ngakuti “Awusemwi akuchanya.” (Mate. 5:16; 6:26) Kweni Yesu wechendazi pacharu chapasi, ateŵeti akugomezgeka aku Yehova agwiriskiyanga ntchitu mazina nga ulemu pakudana Yehova nge ngakuti ‘Wanthazizosi,’ ‘Wapachanya Limu,’ ‘Mlengi Mura’ ndipuso nganyaki. Kweni kanandi, Yesu wadananga Yehova kuti “Awusefwi” pamwenga kuti Ada. Mazu yanga ngalongo kuti Yehova wakhumba kuti timuwonengi nge mo mwana wawone awisi wo atimuyanja. Venivi vilongo kuti Yesu wakhumba kuti tiwonengi Yehova nge Ada ŵidu achanju wo atitiyanja. Tiyeni tikambiskani vakuwoniyapu viŵi vo Yesu wangugwiriskiya ntchitu mazu ngakuti “Awusemwi” ndipuso ngakuti “Ada.”

14. Kumbi Yesu wangulongo wuli kuti Awusefwi akuchanya awona kuti weyosi ngwakuzirwa? (Mateyu 10:​29-31) (Wonaniso chithuzi.)

¹⁴ Chakwamba, tiyeni tikambiskani vo Yesu wangukamba pa Mateyu 10:​29-31. (Ŵerengani.) Mpheta nthiyuni timanatimana ukongwa to titimuyanja cha kweniso titimusopa cha Yehova. Kweni Awusefwi awona kuti mpheta yeyosi njakuzirwa mwakuti aziŵa asani yawa pasi. Asani Yehova wachita viyo ndi mpheta, kwewuli mteŵeti waki weyosi wakugomezgeka yo watimuteŵete chifukwa chakuti watimuyanja? Yesu wangukamba so kuti Awusefwi aziŵa unandi wa sisi lo munthu weyosi wenalu. Pakuti Yehova waziŵa tinthu timanatimana takukwaskana ndi isi, tingasimikiza kuti iyu watitiŵanaŵaniya ukongwa. Venivi vilongo kuti Yesu wakhumba kuti tingakayikiyanga cha kuti Awusefwi akuchanya awona kuti weyosi waku isi ngwakuzirwa.

15. Kumbi vo Yesu wangukamba pa Yohane 6:44 vitikusambizaninji vakukwaskana ndi Awusemwi akuchanya?

¹⁵ Sonu tiyeni tikambiskani chakuwoniyapu chachiŵi po Yesu wangugwiriskiya ntchitu mazu ngakuti “Ada.” (Ŵerengani Yohane 6:44.) Awusemwi akuchanya ndiwu angukuguzani kuti musambiri uneneska. Ntchifukwa wuli yiwu angukuguzani? Ntchifukwa chakuti anguwona mijalidu yamampha yo mwenayu. (Machi. 13:48) Pa nyengu yo Yesu wakambanga mazu ngo nge pa Yohane 6:44 watenere kuti wanguko mazu ngo ngasanirika pa Yeremiya 31:3. Pa lemba ili Yehova wangukambiya ŵanthu ŵaki kuti: “Ndakundereze kwaku ini chifukwa cha chanju chambula kumala [pamwenga kuti, Ndichu chifukwa chaki ndalutirizga kukulongo chanju chambula kumala].” (Yere. 31:3; mazu nga mumphata; yeruzgiyani ndi Hoseya 11:4.) Kumbi fundu yeniyi ying’anamuwanji? Awusefwi akuchanya wo atitiyanja alutirizga kuwona vinthu vamampha mwaku yimwi vo mwaŵeni mungaviwona cha.

16. (a) Kumbi Yesu watitikambiyanji, nanga ntchifukwa wuli titenere kumugomezga? (b) Kumbi mungachita wuli kuti mugomezgengi kuti Yehova mbada amampha ukongwa? (Wonani bokosi lakuti “Mbada Wo Tosi Tikhumbikiya.”)

¹⁶ Pakukamba kuti Yehova mbawusefwi, Yesu wang’anamuwanga kuti: “Yehova mbada ŵangu pe cha, kweni namwi mbawisemwi. Ndipu nditikusimikiziyani kuti yiwu atikuyanjani ukongwa kweniso atikuŵanaŵaniyani yimwi pakumwija.” Mwaviyo, asani nyengu zinyaki mukayikiya kuti Yehova watikuyanjani, mukumbukengi vo Yesu wangukamba kweniso mumugomezgengi chifukwa nyengu zosi wakamba uneneska kweniso watiŵaziŵa umampha ukongwa Awusefwi.—1 Petu. 2:22.

LUTIRIZGANI KUGOMEZGA KUTI YEHOVA WATIKUYANJANI

17. Ntchifukwa wuli tikhumbika kulutirizga kugomezga kuti Yehova watitiyanja?

¹⁷ Tikhumbika kulutirizga kuchita vosi vo tingafiska kuti tilekengi kukayikiya kuti Yehova watitiyanja. Nge mo tawone kukwamba kwa nkhani iyi, Satana yo ndi murwani widu ndi muryarya ndipu walutirizgengi mbwenu kutigongowesa kuti tileki kuteŵete Yehova. Kuti wafiski chilatu chaki chenichi, iyu walutirizgengi kutipusisa kuti tiŵanaŵanengi kuti Yehova watitiyanja cha. Kweni tingazomerezanga cha kuti Satana wawini!—Yobu 27:5.

18. Kumbi mungachita wuli kuti mugomezgengi kuti Yehova watikuyanjani?

¹⁸ Nge mo tawone munkhani iyi, kuti mugomezgengi kuti Yehova watikuyanjani, chakwamba lutirizgani kumupempha kuti mujiwonengi nge mo iyu watikuwoniyani. Chachiŵi, muŵanaŵaniyengi malemba ngo ngalongo kuti Yehova watiŵayanja ukongwa ŵanthu wo atimuyanja. Chachitatu, mukumbukengi kuti Yehova walekengepu cha kwanja ŵanthu wo atimuyanja. Chachinayi, mungaluwanga cha kuti Yehova wakupereka mwana waki nge sembi chifukwa chaku yimwi. Kweniso chakumaliya, mugomezgengi fundu yo Yesu wakukamba yakuti Yehova Mbawusemwi akuchanya. Ndipu asani munthu munyaki wangakufumbani kuti, “Kumbi Yehova watikuyanjani nadi?” mumukengi ndi mtima wosi kuti, “Hinya watindiyanja! Ndipu zuŵa lelosi nani ndichitengi vosi vo ndingafiska kuti ndilongo kuti nditimuyanja!”