Kumbi Ndingachita Wuli Kuti Ndifiskengi Kusambiriya Kunyumba?

Achinyamata anandi asambira munthowa zakupambanapambana kunyumba kwawu. Asani namwi ndivu muchita, kumbi mungachita wuli kuti muyanduwengi ndi masambiru nginu? Wonani masachizgu nganyaki ngo ngangakuwovyani.a

• Nthowa 5 zo zingakuwovyani kuti mufiskengi kusambiriya kunyumba

• Vo achinyamata anyinu akamba

Nthowa 5 zo zingakuwovyani kuti mufiskengi kusambiriya kunyumba

• Mujengi ndi ndondomeku. Muyesesengi kuja ndi ndondomeku ya vinthu vo mungafiska kuchita nge mo mwachitiyanga mwe ku sukulu. Mupatuwengi nyengu yakuchitiya homuweki, ntchitu zapakhomu kweniso vinthu vinyaki vakukhumbika. Mungasintha ndondomeku yinu asani pakhumbika kuchita viyo.

  Fundu ya mu Bayibolu: Kweni vinthu vosi vichitikengi . . . mwandondomeku.”—1 Akorinto 14:40.

  “Muchitengi vinthu nge kuti mwe kusukulu. Mumalizengi ntchitu zinu za kusukulu pa nyengu yaki.”—Katie.

  Ŵanaŵaniyani fundu iyi: Ntchifukwa wuli mbumampha kuja ndi ndondomeku kweniso kuyiŵika pamalu ngambula kusuzga kuyiwona?

• Mujisambizengi. Kuti mulongo kuti muchita vinthu mwazeru, mutenere kuyesesa kuchita ntchitu yo yilipu pa nyengu yeniyo chinanga kuti yingaŵa yakusuzga. Ndipu mungaziŵanizanga cha.

  Fundu ya mu Bayibolu: “Mugwirengi ntchitu mwaphamphu, mungachitanga ulesi cha.”—Aroma 12:11.

  “Kujisambiza nkhwakusuzga ukongwa. Ntchipusu kujigowoke ndi kukamba kuti, ‘Ndilembengi nyengu yinyaki homuweki.’ Pavuli paki mungaleka kulemba ndipu mungaŵa ndi vakuchita vinandi.”—Alexandra.

  Ŵanaŵaniyani fundu iyi: Ntchifukwa wuli kulemba homuweki pa nyengu yeniyo mwapasikiya kulongo kuti mwe akujisambiza?

• Mujengi ndi malu ngakusambiriya. Mujengi ndi vipangizu vosi vo mukhumba kugwiriskiya ntchitu. Malu ngo mwasankha kuti muŵerengiyengi ngajengi ngamampha kweni ngangachitisanga kuti musiwengi cha. Nyengu iyi nja kusiwiya cha kweni ndi nyengu yakuŵerenge va sukulu! Asani mulivi malu chayingu ngakuŵerenge, mungasankha mukhitchini pamwenga kuchipinda kuti muchitiyengemu va sukulu.

  Fundu ya mu Bayibolu: “Vinthu vo munthu waphamphu waŵanaŵana vichitiska kuti vinthu viyendi umampha.”—Nthanthi 21:5.

  “Mungatchayanga bola cha pa nyengu iyi, mungaseŵenga magemu cha, mafoni nginu mungathyengi kuti ngaleki kukutimbanyizgani ndipuso muŵikengi patali vidya vakumbiya sumu. Kuja pamalu ngambula vakutimbanyizga kutovya ukongwa.”—Elizabeth.

  Ŵanaŵaniyani fundu iyi: Kumbi ndi vinthu wuli vo mungasintha kuti muyanduwengi ndi pamalu po mwasankha kuŵerenge?

• Muŵikiyengepu mtima pa vo musambira. Muŵanaŵaniyengi ukongwa vo musambirengi pa nyengu yeniyo ndipu mutenere cha kuchita vinthu vinyaki. Asani muchitengi vinthu vinandi nyengu yimoza, munganangisa vinthu vinandi kweniso vingakutoliyani nyengu kuti mumalizi ntchitu yinu.

  Fundu ya mu Bayibolu: “ Nyengu yinu muyigwiriskiyengi ntchitu mwakwenere.”—Aefeso 5:16.

  “Asani nde ndi foni pafupi vandisuzganga kuti ndisambirepu kanthu pa vo ndiŵerenga. Ndamaliyanga nyengu yinandi pa vinthu vambula kwenere.”—Olivia.

  Ŵanaŵaniyani fundu iyi: Kumbi vingachitika kuti mumaliyengi nyengu yinu yikulu pa ntchitu yo mukhumbika kuchita?

• Mupumuwengi. Mupangengi masaza nge kwendesa njinga ndipuso muyendengeku kuti munyolongeku malundi. Masaza ngangakuwovyani kuti muje ndi nthazi. Buku linyaki la School Power lingukamba kuti, “Mumalizengi dankha ntchitu yinu. Asani mwamaliza ntchitu yinu ndipu muŵengi ndi nyengu yinandi yakuchitiya vo mukhumba.”

  Fundu ya mu Bayibolu: “Kupumuwa kamanavi nkhwamampha kuluska kugwira ntchitu mwaphamphu ndi kutchimbiza mphepu.”—Wakutawula 4:6.

  “Kanandi kusukulu tisambira mo tingajambuliya pamwenga mo tingagwiriskiya ntchitu vidya vakumbiya sumu. Ndaziŵanga cha kuti nani ndakhumbikanga kuchitaku venivi mpaka po ndingumaliziya sukulu. Mbumampha kuchitangaku masaza asani muŵerenga.”—Taylor.

  Ŵanaŵaniyani fundu iyi: Kumbi ndi masaza wuli ngo ngangakuwovyani kuti mujengi ndi nthazi zakufiskiya kulemba homuweki?