Ŵanthu Abayana ndi Futi Mwankhaza Pacharu Chosi—Kumbi Bayibolu Likambanji?

Mu July 2022, nkhani zakupaska mantha zakukwaskana ndi kubayana ndi futi zinguchitika pacharu chosi:

• Nyuzipepala ya The Japan Times yo yingutuwa pa 10 July 2022, yingukamba kuti: “Kubayika kwa Nduna yakali ya ku Japan, a Shinzo Abe, kungukwiyiska charu cha Japan ndipu venivi vinguchitiska mantha ŵanthu wosi pacharu chosi, chifukwa chakuti charu cha Japan chilivi milandu yinandi yakukwaskana ndi vachiwawa ndipuso charu ichi chikhwimisa ukongwa marangu ngaki pankhani yakugwiriskiya ntchitu futi.”

•  Nyuzipepala ya Reuters yo yingutuwa pa 4 July 2022, yingukamba kuti: “Ŵanthu a ku Denmark anguchita mantha chifukwa chakuti ŵanthu atatu angulasika ndi futi mushopu yinyaki ku Copenhagen.”

•  Nyuzipepala ya The Guardian yo yingutuwa pa 10 July 2022, yingukamba kuti: “Ku South Africa: Ŵanthu 15 akubayika ndi futi panyengu yo anthulumi anyaki alasanga ŵanthu ndi futi mu bala linyaki mutawuni ya Soweto.”

•  Nyuzipepala ya CBS yo yingutuwa pa 5 July 2022, yingukamba kuti: “Ŵanthu akujumpha 220 akubayika ndi futi ku United states pa holide yo yinguchitika pa 4 July.”

Kumbi te ndi chifukwa chakugomezge kuti vinthu vachiwawa vo vichitika vazamumala? Kumbi Bayibolu likambanji?

Vinthu Vachiwawa Vazamumala

Bayibolu likamba kuti tija mu “mazuŵa ngakumaliya,” ngo ŵanthu achita vinthu viheni ukongwa ndipuso vakofya. (2 Timote 3:1, 3) Vinthu viheni venivi vichitiska kuti ŵanthu ajengi mwamantha. (Luka 21:11) Kweni Bayibolu lilayizga kuti pambula kuswera yapa, vinthu vachiwawa vimalengi ndipu ŵanthu “azamuja mumalu ngachimangu, azamuja mumalu ngakuvikilirika kweniso mumalu ngakupumuliyamu ngachimangu.” (Yesaya 32:18) Kumbi vinthu vachiwawa vazamumala wuli?

Chiuta wazamutuzgapu ŵanthu aheni ndipu wazamunangiya limu vidya vosi vankhondu.

•  “Kweni ŵanthu aheni adumulikengemu mucharu.”—Nthanthi 2:22.

•  “[Chiuta] wamalisa nkhondu pacharu chosi chapasi. Wafyo uta ndi kuvikita mkondu; kweniso watotcha magaleta ngankhondu ndi motu.”—Salimo 46:9.

Chiuta wazamusambiza ŵanthu kuti ajengi mwachimangu ndipu wazamumalisa vinthu vachiwawa.

•  “Vazamupwetekana cha pamwenga kusakazana muphiri langu losi lakupaturika, chifukwa charu chapasi chazamuzaza ndi kuziŵa Yehova nge mo maji ngazaziya nyanja.”—Yesaya 11:9.

•  Chinanga mphasonu panu, Chiuta wasambiza ŵanthu pacharu chosi kuti alekengi kuchitaku vinthu vachiwawa ndipuso kugwiriskiya ntchitu vidya vankhondu. Yiwu ‘asula malipanga ngawu kuti ngaje mayembi nga pulawu ndipuso asula mikondu yawu kuti yije vidya vakuphatiya vimiti.’—Mika 4:3.

Kuti muziŵi vinandi vakukwaskana ndi vo Bayibolu lilayizga pa nkhani ya mo taŵanthu tazamujaliya mwambula mantha, ŵerengani nkhani ya Chichewa yakuti “Kodi N’zotheka Kukhala Mopanda Mantha?”

Kuti muziŵi vinandi pa nkhani ya mo vinthu vachiwawa vazamumaliya limu, ŵerengani nkhani ya Chichewa yakuti “Mtendere Udzabweradi Padziko Lapansi!”