Kwawotcha Ukongwa Pacharu Chosi—Kumbi Bayibolu Likambanji?

Mu July 2022, nkhani yakukwaskana ndi kotcha ukongwa yikupharazgika pacharu chosi:

• Nkhani yo yingupharazgika pa CNN Wire Service, yo yingutuwa pa 25 July 2022 yingukamba kuti: “Kachiŵi mu mwezi wunu pe, charu cha China chingutcheŵeska kuti matawuni pafufupi 70 ngawotchengi so ukongwa.”

• Nyuzipepala ya The Guardian yo yingutuwa pa 17 July 2022 yingukamba kuti: “Motu ubuka muthundu ku Europe chifukwa cha kotcha ko kusazgikiyaku.”

• Nyuzipepala ya The New York Times yo yingutuwa pa 24 July 2022 yingukamba kuti: “Pa Sabata matawuni nganandi ku United States ngangotcha ukongwa kuluska kali chifukwa cha mphepu yakotcha yo yinguchifika Kuvuma ndipuso muvigaŵa vinyaki va Kumwera ndi Kuzambwi.”

Kumbi venivi ving’anamuwanji? Kumbi mucharu mwazamuŵavi chamoyu chechosi chakujamu? Kumbi Bayibolu likambanji?

Kumbi kotcha ukongwa kufiska mauchimi nga mu Bayibolu?

Hinya. Kotcha ko kuchitika pacharu chosi munyengu yidu yinu, kufiska vo Bayibolu likukambiya limu. Mwakuyeruzgiyapu, Yesu wangukambiya limu kuti tazamuwona “vinthu vakofya” pamwenga “vinthu vachilendu ndipuso vakuchitiska mantha.” (Luka 21:11; Good News Translation) Kotcha ko kusazgikiyaku pacharu chosi, kuchitiska ŵanthu anandi kuti achitengi mantha kuti ŵanthu anangengi charu.

Kumbi mucharu mwazamuŵavi chamoyu chechosi chakujamu?

Awa. Chiuta wakulenga charu kuti ŵanthu ajengemu kwamuyaya. (Salimo 115:16; Wakutawula 1:4) Mumalu mwakuzomereza kuti ŵanthu anangi charu, iyu ‘wanangengi wo ananga charu chapasi,’ nge mo wakulayizgiya.—Chivumbuzi 11:18.

Wonani mauchimi ngaŵi ngo ngalongo vinyaki mwa vinthu vo Chiuta wakulayizga:

• “Chipululu ndipuso charu chakumira, vazamukondwa, ndipu chipalamba chazamukondwa kweniso kuchita maluŵa.” (Yesaya 35:1) Chiuta wazomerezengi cha kuti charu chije chipalamba chakuti vamoyu vitondeki kujamu, kweni wachinozgengi.

• “Yimwi muphwere charu chapasi, mutichichitiska kuti chije ndi vipasu vinandi kweniso chije chakukhupuka.” (Salimo 65:9) Chiuta wazamuchitiska kuti charu chije paradayisu.

Kuti muziŵi vinandi vakukwaskana ndi mo kusintha kwanyengu kufiskiya mauchimi nga mu Bayibolu, ŵerengani nkhani yakuti “Kumbi Bayibolu Likambanji pa Nkhani Yakusintha kwa Nyengu Ndipuso vo Vazamuchitika Munthazi?”

Kuti muziŵi vinandi vakukwaskana ndi vo Bayibolu lilayizga kuti chilengedu chazamuja so chamampha, ŵerengani nkhani yakuti “Kodi Ndi Ndani Amene Adzapulumutse Dzikoli?”