Kumbi Akhristu Atenere Kuchitaku Nkhondu?—Kumbi Bayibolu Likambanji?

Nge mo viliri ndi nkhondu yo yichitika ku Ukraine, alongozgi anandi a visopa va Chikhristu achiska ŵanthu kuti achitengeku nkhondu. Wonani mo alongozgi atovye vigaŵa vosi ko kuchitika nkhondu:

• Nge mo nyuzipepala ya The Jerusalem Post yo yingutuwa pa 16 March 2022 yingukambiya. Metropolitan Epiphanius I wa ku Kyiv wangukamba kuti: “Unkhankhu ndi viwongu viluti kwa asilikali wosi wo avilikiya charu chawu cha Ukraine kwa arwani ŵawu . . . Nyengu zosi mapempheru ngidu ngakutuliya pasi pa mtima kweniso chovyu chidu ve kwaku yimwi.”

• Nyuzipepala ya Reuters yo yingutuwa pa 3 April 2022 yingukamba kuti: “Pa Sabata mulongozgi wa Tchalitchi la Orthodox ku Russia wanguchitiska unganu wapade kuti wachiski asilikali kuti avilikiyi charu chawu, po charu chawu cha Russia chilutirizga kuchita nkhondu ndi charu cha Ukraine.”

Kumbi Akhristu akhumbika kuchitaku nkhondu? Kumbi Bayibolu likambanji?

Vo Bayibolu likamba

Bayibolu lilongo kuti ŵanthu wo alondo Yesu Khristu akhumbika cha kuchitaku nkhondu.

• “Weze lipanga laku mumalu ngaki, chifukwa weyosi yo wapinga lipanga wazamukufwa ndi lipanga.”—Mateyu 26:52.

  Kumbi munthu yo wachiska nkhondu pamwenga wachitaku nkhondu wavwiya nadi mazu ngaku Yesu?

• “Nditikupaskani dangu lasonu, kuti muyanjanengi. Nge mo ini ndakuyanjiyani, yimwi namwi muyanjanengi. Pa chifukwa chenichi, ŵanthu wosi azamuziŵa kuti ndimwi akusambira ŵangu, asani mwaŵeni mutanjana.”—Yohane 13:34, 35.

  Kumbi munthu yo wachitaku nkhondu walongo jalidu la chanju lo Yesu wangukamba kuti akusambira ŵaki azamuziŵika nalu?

Kuti muziŵi vinandi ŵerengani nkhani yamutu wakuti, “Kodi Akhristu Ayenera Kumenya Nawo Nkhondo?”

Kumbi Akhristu atenere kuchitaku nkhondu mazuŵa nganu?

Kumbi mphakuvwika kuti Akhristu mazuŵa nganu atenere cha kuchitaku nkhondu? Hinya. Bayibolu likukambiya limu kuti “mu mazuŵa ngakumaliya,” kwazamukuŵa ŵanthu akutuliya mu mitundu yosi wo “azamusambira so nkhondu cha,” mwakukoliyana ndi vo Yesu wakusambiza.—Yesaya 2:2, 4.

• Kuti muziŵi vinandi ŵerengani nkhani ya mu Chigongwi cha Mlinda ya mutu wakuti “Kodi Mulungu Amagwirizana Ndi Zoti Anthu Azimenya Nkhondo?”

Pambula kuswera yapa, Yehovaa yo ndi “Chiuta wachimangu,” wazamutaska ŵanthu ŵaki ku “ŵanthu ankhaza kweniso achiwawa” mwakugwiriskiya ntchitu boma laki lakuchanya.—Afilipi 4:9; Salimo 72:14.

• Kuti muwoni mo wazamuchitiya venivi woneriyani vidiyo yakuti, Kumbi Ufumu Waku Chiuta Ntchinthu Wuli?