Kumbi World Cup Yingachitiska Kuti Ŵanthu Akoliyanengi Nadi?—Kumbi Bayibolu Likambanji?

Kafukufuku walongo kuti ŵanthu pafufupi 5 biliyoni awoneriyengi FIFA World Cup yo yikwamba pa 20 November mpaka pa 18 December 2022. Ŵanthu anandi awona kuti masaza ngenanga ngangawovya munthowa zinandi mumalu mwakuchitiska waka kuti ŵanthu akoliyanengi asani awonere masaza yanga.

• “Masaza nge ndi nthazi yakusintha charu. Nge ndi nthazi yakuchiska ŵanthu. Nge ndi nthazi yakuwovya kuti ŵanthu akoliyanengi munthowa yapade ukongwa.”—Nelson Mandela, pulezidenti wakali wa ku South Africa.

• “Bola . . . litovya kuti ŵanthu akoliyanengi chifukwa litiŵachitiska kuti aje ndi chilindizga, akondwengi, aliyanjengi, ayanjengi anyawu, kweniso kuti awonengi kuti ayanana mu vinthu vinyaki.”—Gianni Infantino, pulezidenti wa FIFA.a

Kumbi World Cup pamwenga masaza nganyaki ngengosi ngangafiska kuchita venivi? Kumbi pe chilindizga chechosi chakukwaskana ndi chimangu kweniso kukoliyana?

Kumbi World Cup yingachitiska kuti ŵanthu akoliyanengi nadi?

World Cup ya chaka chinu yachitiska ŵanthu kuŵanaŵaniya vinandi kuluska kuŵanaŵaniya waka bola. World Cup yeniyi yachitiska kuti ŵanthu akambiskanengi ukongwa vakukwaskana ndi mo vinthu vitende mucharu kweniso pa nkhani ya ndali. Yiwu akambiskana vakukwaskana ndi ŵanangwa wa ŵanthu, kusankhana mitundu, ndipuso mo chuma chitende.

Chinanga kuti veviyo, ŵanthu anandi akondwa asani awonere masaza nga pacharu chosi nge World Cup. Kweni masaza ngenanga ngangachitiska cha kuti ŵanthu akoliyani mpaka muyaya, chinanga kuti ndivu ŵanthu anandi akhumba. Mumalu mwaki, kanandi yiwu alongo mtima wakuleka kukoliyana kweniso vo Bayibolu likukambiya limu kuti vazamuchitika mu nyengu yo yidanika kuti “mazuŵa ngakumaliya.”—2 Timote 3:1-5.

Chilindizga chayichu pa nkhani ya kukoliyana

Bayibolu likamba za chilindizga chayichu chakukoliyana kwa pacharu chosi. Lilayizga kuti ŵanthu wosi pacharu chapasi azamukoliyana asani aziyamba kulamulika ndi boma lakuchanya lo lidanika kuti “Ufumu waku Chiuta.”—Luka 4:43; Mateyu 6:10.

Fumu ya Ufumu wenuwu, Yesu Khristu, wazamuwoneseska kuti pacharu chosi chapasi pe chimangu. Bayibolu likamba kuti:

• “Ŵanthu arunji azamubiriŵira, ndipu chimangu chazamuja chikulu.”—Salimo 72:7.

• “Iyu wazamutaska akavu wo apempha chovyu . . . Wazakuŵataska ku ŵanthu ankhaza kweniso achiwawa.”—Salimo 72:12, 14.

Vo Yesu wasambizanga vawovya kuti ŵanthu mamiliyoni nganandi mazuŵa nganu akoliyani muvyaru 239. Yiwu akusambira mo angachitiya kuti aleki kutinkhana. Kuti muziŵi vinandi, ŵerengani nkhani zakupambanapambana zo ze ndi mutu wakuti “Tingamalisa Jalidu Lakutinkhana.”