Kumbi Masaza Ngangawovya Nadi Kuti Ŵanthu Akoliyanengi?—Kumbi Bayibolu Likambanji?

Munyengu ya masaza ngakupambanapambana (Olympics) nga mu 2024, ŵanthu pafufupi 5 biliyoni awoneriyengi ŵanthu wo achitengi masaza ngenanga wo atuwengi muvyaru 206. Thomas Bach yo ndi pulezidenti wa Komiti yakuwona masaza ngakupambanapambana pacharu chosi wangukamba kuti: “Nasi tekuchigaŵa cho chitovya ŵanthu kuti akoliyanengi kweniso achitengi vinthu mwachimangu pacharu. Tiyeni tikondwi ndi masaza ngenanga chinanga kuti te akupambana.”

Kumbi masaza ngakupambanapambana ngangawovya kuti ŵanthu akoliyanengi? Kumbi pe chilindizga cheneku cha chimangu ndi kukoliyana?

Kumbi Masaza ngangazisa chimangu ndi kukoliyana?

Chaka chinu ŵanthu anandi awona kuti masaza ngakupambanapambana ngo nge mugulu la olimpiki ndingu ngamampha ukongwa kuluska masaza nganyaki. Masaza ngenanga ngalongo mo ŵanthu achitiya vinthu kweniso ndali vo vichitiska kuti ŵanthu agaŵikanengi. Vinthu venivi visazgapu wanangwa wa ŵanthu, sankhu, kusankhana mitundu chifukwa chakupambana visopa kweniso kwanjiya.

Masaza ngenanga ngo ngachitika pacharu chosi ngatovya ŵanthu kuti akondwengi. Kweni masaza ngenanga ngachitiska so kuti ŵanthu aŵanaŵanengi kweniso kuchita vinthu mwambula kukoliyana mumalu mwakuŵanaŵaniya nthowa zo zingazisa chimangu ndi kukoliyana.

Bayibolu lingukambiya limu vo vazamuchitisa kuti ŵanthu aleki kukoliyana. (2 Timote 3:1-5) Kuti muziŵi vinandi ŵerengani nkhani yo yikamba za uchimi wenuwu mu Bayibolu ya mutu wakuti “Kumbi Bayibolu Lingukambiya Limu Vakukwaskana ndi Maŵanaŵanu Kweniso Vakuchita va Ŵanthu Mazuŵa Nganu?”

Chilindizga cheneku cha chimangu ndi kukoliyana pacharu

Bayibolu likamba za chilindizga cheneku cho mwazamuja chimangu kweniso kukoliyana. Ilu lilayizga kuti ŵanthu pacharu azamukoliyana chifukwa cha boma lakuchanya lo ndi “Ufumu waku Chiuta.”—Luka 4:43; Mateyu 6:10.

Fumu ya Ufumu wenuwu yo ndi Yesu Khristu wazamuzisa chimangu pacharu chosi. Bayibolu likamba kuti:

•  “Ŵanthu arunji azamubiriŵira, ndipu chimangu chazamuja chikulu.”—Masalimo 72:7.

•  “Iyu wazamutaska akavu wo apempha chovyu. . . Wazakuŵataska ku ŵanthu ankhaza kweniso achiwawa.”—Masalimo 72:12, 14.

Chinanga ndi mazuŵa nganu, vo Yesu wasambizanga vachitiska kuti ŵanthu mamiliyoni kutuliya muvyaru 239 akoliyanengi. Nge Akhristu, Akaboni aku Yehova kuzunguliya pacharu chosi asambira mo angajaliya mwachimangu. Kuti muziŵi vinandi wonani nkhani ya mu Chigongwi cha Mlinda ya mutu wakuti “Tingamalisa Jalidu Lakutinkhana.”