Ntchifukwa Wuli Ndali Zigaŵaniska Ŵanthu?—Kumbi Bayibolu Likambanji?

Pacharu chosi chapasi, ŵanthu anandi mbakugaŵikana chifukwa cha ndali. Mwakukoliyana ndi kafukufuku wa mu 2022 wo kawupu ka Pew Research Center kanguchita, “ŵanthu arara 65 pa 100 ŵewosi wo aja muvyaru 19 vakupambanapambana angukamba kuti muvyaru vawu, ŵanthu wo asapota vipani vakupambana akoliyana cha kweniso asuskana ukongwa.”

Kumbi muwona kuti ko muja ŵanthu agaŵikana ukongwa chifukwa cha ndali? Ntchifukwa wuli ve viyo? Kumbi suzgu lenili lazamumala wuli? Wonani vo Bayibolu likamba.

Vo vichitiska

Bayibolu likukambiya limu kuti mu nyengu yidu yinu, kung’anamuwa “mazuŵa ngakumaliya,” ŵanthu azamuja ndi mijalidu yo yazamuchitiska kuti kuŵi kwakusuzga kukoliyana.

• “Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja akujiyanja, . . . ambula kukoliyana ndi anyawu.”—2 Timote 3:1-3.

Chinanga kuti ŵanthu anandi atesesa kuti boma liyendengi umampha, kweni vichitika cha. Ŵanthu wo ŵe ndi maŵanaŵanu ngakupambana ndi anyawu, vitiŵasuzga kweniso awona kuti vingachitika cha kuchitiya vinthu limoza ndi anyawu kuti amalisi masuzgu. Ndipu venivi visimikiziya vo Bayibolu lingukambiya limu vyaka vinandi kuvuli.

• “Munthu wapweteka munthu munyaki pakumulamuliya.”—Wakutawula 8:9.

Kweni Bayibolu likamba kuti pe boma linyaki, lo lilongozgeka ndi munthu munyaki yo wazamumalisa masuzgu ngosi ngo ngachitiska kuti ŵanthu asuzgikengi.

Mulongozgi wakwenere yo watitiŵanaŵaniya

Bayibolu likamba kuti Yesu Khristu ndi mulongozgi yo ngwakwenere kumalisa masuzgu ngosi. Yesu we ndi nthazi, mazaza kweniso wakhumbisiska kuzisa chimangu kweniso kovya ŵanthu wosi kuti akoliyanengi.

• “Mu mazuŵa ngaki, ŵanthu arunji azamubiriŵira, ndipu chimangu chazamuja chikulu.”—Salimo 72:7.

• “Mitundu yosi yazakumuteŵete.”—Salimo 72:11.

Yesu ndi mulongozgi wakwenere chifukwa waŵanaŵaniya kweniso wakhumbisiska kuwovya ŵanthu, ukongwa wo ŵanthu anyaki atiŵachitiya vinthu vambula urunji.

• “Iyu wazamutaska akavu wo apempha chovyu, ndipuso ŵanthu akusika kweniso weyosi yo walivi wakumuwovya. Iyu wazamuchitiya chitima ŵanthu akusika ndi akavu, ndipu wazamutaska maumoyu nga ŵanthu akavu. Wazakuŵataska ku ŵanthu ankhaza kweniso achiwawa.”—Salimo 72:12-14.

Ziŵani vinandi vakukwaskana ndi Ufumu waku Chiuta lo ndi boma lakuchanya lo Yesu walamuliya. Wonani mo mungayanduliya ndi boma lenili kweniso mo mungalongore kuti mwe kuchigaŵa cha ulamuliru waki.

• Woneriyani vidiyo yakuti Kumbi Ufumu Waku Chiuta Ntchinthu Wuli?

• Ŵerengani nkhani yakuti “Ufumu wa Mulungu Ndi Boma Lopanda Chinyengo.”