Kumbi Ndiyani yo Wataskengi Ŵanthu Bweka Asani Kwe Nkhondu?—Kumbi Bayibolu Likambanji?

Lipoti la wupu wa United Nations likamba kuti:

• Kwambiya pa 7 mpaka pa 23 October 2023, nkhondu yo yichitika ku Gaza ndi Israel yachitiska kuti ŵanthu akujumpha 6,400 afwi ndipu ŵanthu 15,200 akupwetekeka. Anandi mwa ŵanthu ŵenaŵa mbasilikali cha. Kusazgiyapu yapa, ŵanthu masawuzandi nganandi akuthaŵa munyumba zawu.

• Kufika pa 24 September 2023, nkhondu ya pakati pa Russia ndi Ukraine yachitiska kuti ŵanthu akukwana 9,701 wo mbasilikali cha afwi ndipu ŵanthu anyaki akukwana 17,748 akupwetekeka ku Ukraine.

Kumbi Bayibolu lipereka chilindizga wuli ku ŵanthu wo asuzgika chifukwa cha nkhondu?

Chifukwa chakujaliya ndi chilindizga

Bayibolu likukambiya limu kuti Chiuta ‘wazamumalisa nkhondu pacharu chosi chapasi.’ (Salimo 46:9) Iyu wazamugwiriskiya ntchitu boma lakuchanya pamwenga kuti ufumu waki kuti uzituzgepu maboma ngosi nga ŵanthu. (Daniyeli 2:44) Kukamba uneneska, Ufumu waku Chiuta wazamutuzgapu masuzgu ngosi ngo ŵanthu akumana nangu.

Wonani vo Yesu Khristu, yo ndi Fumu ya Ufumu waku Chiuta wazamuchita:

• “Iyu wazamutaska akavu wo apempha chovyu, ndipuso ŵanthu akusika kweniso weyosi yo walivi wakumuwovya. Iyu wazamuchitiya chitima ŵanthu akusika ndi akavu, ndipu wazamutaska maumoyu nga ŵanthu akavu. Wazakuŵataska ku ŵanthu ankhaza kweniso achiwawa.”—Salimo 72:12-14.

Mwakugwiriskiya ntchitu Ufumu waki, Chiuta wazamutuzgiyapu limu masuzgu ngosi ngo ŵanthu akumana nangu chifukwa cha nkhondu kweniso viwawa.

• “Iyu wazamuleska masozi ngosi mumasu mwawu, ndipu nyifwa yazamuŵaku so cha, kwazamuŵavi kuliya, kukuta pamwenga urwirwi. Vinthu vakali vatuwapu.”—Chivumbuzi 21:4.

Pambula kuswera yapa, Ufumu waku Chiuta wazamusintha vinthu pacharu chapasi. Bayibolu lingukambiya limu za “viwawa vankhondu ndi mbiri zankhondu” zo tiwona mazuŵa nganu. (Mateyu 24:6) Vinthu venivi kweniso vinthu vinyaki vilongore limu kuti tija “mu mazuŵa ngakumaliya” nga ulamuliru wa ŵanthu.—2 Timote 3:1.