Asayansi Andereze Kunthazi Nyengu pa Wachi Yakulongo Kuti Umaliru we Pafupi—Kumbi Bayibolu Likambanji?

Pa 24 January 2023, asayansi angundereze kunthazi nyengu pa Wachi ya Doomsdaya kulongo kuti sonu nyengu ye pafupi kufika 12 koloku usiku, vo vimiya kuti charu che pafupi kumala.

• “‘Wachi ya Doomsday’ yimiya vo ŵanthu achita vo vingachitiska kuti umoyu wawu uŵi pangozi. Pa Chiŵi asayansi anguyindereza ukongwa nyengu yeniyi kuti yije kufupi ukongwa ndi 12 koloku usiku kuluska mo yenge kuvuli. Anguchita viyo chifukwa cha nkhondu ya ku Ukraine, chifukwa cha kopa nkhondu ya nyukiliya yo yingachitika kweniso kusintha kwa nyengu.”—AFP International Text Wire.

• “Pa Chiŵi asayansi angukamba kuti ‘Wachi ya Doomsday’ ayindereza ndi masekondi 90 kulongo kuti kwaja kamanavi ukongwa kuti ŵanthu anangiyi limu charu.”​—ABC News.

• “Asayansi atcheŵeska kuti ŵanthu ajibayisengi ŵija chifukwa cha vo achita kuluska mo venge kali.”​—The Guardian.

Kumbi ŵanthu kweniso charu ve pafupi kumala? Kumbi tikhumbika kopa vo vichitikengi kunthazi? Kumbi Bayibolu likambanji?

Vo vichitikengi kunthazi

Nge mo Bayibolu likambiya, “charu chijengi mpaka muyaya” ndipu mwazamukuŵa ŵanthu wo “azamuja mwenimo kwamuyaya.” (Wakutawula 1:4; Salimo 37:29) Mwaviyo, ŵanthu azakuchinangiya limu cha charu pamwenga kuchichitiska kuti muŵevi vamoyu.

Kweni Bayibolu likamba za umaliru. Mwakuyeruzgiyapu, likamba kuti ‘charu chiluta.’​—1 Yohane 2:17.

• Kuti muziŵi vo Bayibolu likamba pa nkhani ya kumala kwa charu, ŵerengani nkhani ya mutu wakuti “Kumbi Charu che Pafupi Kumala? Kumbi Bayibolu Likukambiya Limu va Kumala kwa Charu?”

• Kuti muziŵi vo Bayibolu likamba vakukwaskana ndi vinthu vo vichitikengi pacharu, ŵerengani nkhani ya mutu wakuti “Kumbi Charu Chimalengi Zukwanji?”

Lutirizgani kuwona vinthu mwakwenere

Bayibolu lingatiwovya kuwona vinthu mwakwenere chinanga kuti pasonu panu pacharu pe masuzgu. Mu nthowa wuli?

• Bayibolu lipereka ulongozgi wo ungatiwovya pa umoyu widu wa zuŵa ndi zuŵa. (2 Timote 3:16, 17) Mwakuyeruzgiyapu, ŵerengani nkhani ya mutu wakuti “Vo Mungachita Kuti Mulekengi Kufipa Mtima Ukongwa” kuti muziŵi mo Bayibolu lingakuwovyiyani kuwona vinthu mwakwenere chinanga kuti mukumana ndi masuzgu.

• Bayibolu lititipaska chilindizga chamampha cha munthazi. (Aroma 15:4) Likonkhoska vo tingakhaza kuti vichitikengi pambula kuswera kweniso vo vazamuchitika kunthazi vo vititiwovya kuti tilekengi kunderezeka ndi vo vichitika mucharu mazuŵa nganu.

Kuti muziŵi vinandi kutuliya mu Bayibolu, titikupemphani kuti muyambi kusambira Bayibolu ndi Akaboni aku Yehova kwawezi.