Ŵanthu Anandi Achita Phukwa—Kumbi Bayibolu Likambanji?

Kafukufuku yo wanguchitika pambula kuswera yapa mu vyaru vakupambanapambana pacharu chosi,a walongo kuti munthu yumoza pa ŵanthu anayi wachita phukwa.

• “Weyosi, kwali ngwa msinkhu wuli pamwenga waja pani, wangachita phukwa.”—Chido Mpemba, wachiŵi kwaku cheyamani wa World Health Organization’s Commission on Social Connection.

Mwakupambana ndi vo ŵanthu anandi aŵanaŵana, phukwa liko arara pe cha pamwenga wo ŵe ŵija. Uneneska ngwakuti chinanga mbanthu wo vinthu vitiŵayende umampha, wo ŵe pabanja, ŵana kweniso wo ŵe ndi maliŵavu nganthazi nawu achita phukwa. Kujipatuwa kweniso kuchita phukwa kungachitisa kuti munthu wayambi kutama.

• Dokotala munyaki yo wachita ma opaleshoni ku U.S. wangukamba kuti: “Kuchita phukwa kwe ndi masuzgu nganandi ukongwa. Kungachitiska kuti umoyu wa munthu uje pangozi ndipu ngozi yaki yingayanana ŵaka ndi yo yingaŵapu ku munthu yo wakweŵa ndudu 15 pa zuŵa.”—Dr. Vivek Murthy.

Vo Bayibolu likamba

Mlengi widu wakhumba cha kuti tijipatuwengi. Kwamba kali, Chiuta wakhumba kuti ŵanthu akondwengi kuchitiya vinthu limoza ndi anyawu.

• Fundu ya mu Bayibolu: “Chiuta wangukamba kuti: ‘Mbumampha cha kuti munthu wajengi yija. Ndimupangiyengi wakumovya, nge munyaki wakumuyenere.’”—Genezesi 2:18.

Chiuta wakhumba kuti tijengi nayu pa ubwezi. Iyu walayizga kuti wanderengi kufupi ndi isi, asani titesesa kundere kufupi ndi iyu.—Yakobe 4:8.

• Fundu ya mu Bayibolu: “Mbakukondwa wo aziŵa kuti akhumbika Chiuta, chifukwa Ufumu wakuchanya ngwawu.”—Mateyu 5:3.

Chiuta wakhumba kuti timusopengi limoza ndi anyidu. Asani tichita venivi, tikondwa.

• Fundu ya mu Bayibolu: “Tiyeni tiŵanaŵaniyanengi kuti tichiskiyani ku chanju ndi ku ntchitu zamampha, ndipu tingalekanga cha kuwungana pamoza, . . . kweni tichiskanengi.”—Aheberi 10:24, 25.

Kuti muziŵi kukhumbika kwa kuyesesa kuti muleki kuchita phukwa, ŵerengani nkhani yakuti “Anthu Ambiri Amasungulumwa Ngakhale Kuti Pali Njira Zambiri Zolankhulirana.”