Saniyani Anyinu Amampha Kuti Muleki Kuchita Phukwa—Kumbi Bayibolu Lingakuwovyani Wuli?

Mu chaka cha 2023, akaswiri akuwona va umoyu angusaniya kuti kuchita phukwa ndi suzgu likulu ukongwa lo likwaska umoyu wamunthu, ndipu pakhumbika kusaniya nthowa yakumalisiya suzgu lenili. Kumbi vingachitika nadi kulimalisa?

• “Dr. Vivek Murthy, yo wapanga ŵanthu maopaleshoni ku United States wangukamba kuti: “Kuchita phukwa kweniso kujipatuwa, ndi suzgu yikulu ukongwa yo yingananga umoyu kweniso liŵavu lidu ndipu tingakondwa cha. Kweni tingachitapu kanthu kuti vileki kufika penapa.” Tingachita wuli? Iyu wangukamba so kuti: “Zuŵa lelosi tikhumbika kuyesesa kuchita vinthu vinyaki vimanavimana nge kucheza ndi anyidu kweniso kukholesa ubwezi widu ndi yiwu.”a

Ndi nyengu zosi cha po munthu wachita phukwa chifukwa chakujipatuwa pamwenga kuja pakuyija. Anyaki angachita mbwenu phukwa chinanga angaŵa pagulu la ŵanthu. Kaya tichita phukwa pachifukwa wuli, kweni Bayibolu lingatiwovya kumalana ndi suzgu lenili. Ilu le ndi ulongozgi wa vo tingachita kuti tichezengi kweniso kukoliyana ndi anyidu, ndipu venivi vingatiwovya kuti suzgu yakuchita phukwa yimali.

Fundu za mu Bayibolu zo zingatiwovya

Mukambiskanengi umampha ndi anyinu. Mungakambiyanga ŵaka anyinu mo muvwiya cha, mumalu mwaki namwi mukhumbika kuvwisiya vo yiwu atikukonkhoskiyani. Asani muchitengi venivi, muyambengi kukoliyana nawu ukongwa.

• Fundu ya mu Bayibolu: “Mungaŵanaŵaniyanga vakukhumba vinu pe cha, kweni va ŵanthu anyaki so.”—Afilipi 2:4.

Muchezengi ndi ŵanthu akupambanapambana. Muyesesengi kucheza ndi ŵanthu wo mbarara pamwenga anamana kwinu, kweniso wo mupambana nawu mudawuku pamwenga ko mutuliya.

• Fundu ya mu Bayibolu: “Sanuzgani mitima yinu.”—2 Akorinto 6:13.

Kuti muziŵi vinandi vakukwaskana ndi vo mungachita kuti mukoliyanengi ukongwa ndi ŵanthu, ŵerengani nkhani ya mutu wakuti “Kupeza Anzathu Omwe Timalakalaka.”