Mary_Ukraine/stock.adobe.com
JANI MASU!
Ŵanthu Anandi Aleka Kugomezga Andali—Kumbi Bayibolu Likambanji?
Mu chaka cha 2024 muvyaru vinandi pacharu chapasi muchitikengi mavoti. Kweni ŵanthu anandi aleka kugomezga alongozgi andali.
Kafukufuku munyaki walongo kuti ŵanthu anandi a ku America akamba kuti “alongozgi anandi andali achita vinthu chifukwa chakujiyanja” mumalu mwakovya ŵanthu wo akuŵavote.a—Pew Research Center, September 19, 2023.
Achinyamata anandi nawu aleka kugomezga alongozgi andali.
“Mazuŵa nganu achinyamata akhumbisiska kusaniya nthowa zo angamalisiya masuzgu kweni asani afumbika akamba kuti andali atondeka kuchita venivi.”—The New York Times, January 29, 2024.
“Kafukufuku walongo kuti achinyamata agomezga ukongwa ŵanthu wo apanga mavidiyo nga pa YouTube kuphara alongozgi andali.”—The Korea Times, January 22, 2024.
Kumbi tingagomezga andali kuti anozgengi vinthu kuti vije umampha? Kumbi tingagomezga yani?
Muphweriyengi ndi ŵanthu wo mugomezga
Mbumampha kuti ŵanthu aphweriyengi ndi ŵanthu wo atiŵagomezga. Bayibolu likamba kuti “munthu wambula kuziŵa vinandi wagomezga mazu ngengosi, kweni munthu wakuchenje waŵanaŵaniya mo watende.”—Nthanthi 14:15.
Kuti muziŵi fundu zo zingakuwovyani kuziŵa kuti nkhani iyi njaboza pamwenga cha, ŵerengani nkhani yamutu wakuti “Vikiliyani Maŵanaŵanu Nginu ku Nkhani Zaboza.”
Chinanga mbandali wo awoneka kuti achita vinthu mwauneneska ndipuso ŵe ndi vilatu vamampha, pe vinthu vinyaki vo angafiska cha kuchita. Ndichu chifukwa chaki Bayibolu litititcheŵesa kuti:
“Mungaŵagomezganga cha alongozgi a ŵanthu; palivi munthu yo wangakutaskani.”—Salimo 146:3, Good News Translation.
Mulongozgi yo mungamugomezga
Bayibolu likamba kuti Chiuta wakusankha Yesu Khristu yo ndi mulongozgi wakwenere kweniso wakuthembeka. (Luka 1:32, 33) Yesu ndi Fumu ya Ufumu waku Chiuta, boma lo lilamuliya kutuliya kuchanya.—Mateyu 6:10.
Ziŵani chifukwa cho mungagomezge Yesu kweniso vo iyu wazamuchita kuti wazituzgepu masuzgu ngo tikumana nangu. Ŵerengani nkhani yakuti “Kumbi Fumu ya Ufumu Waku Chiuta Ndiyani?” kweniso yakuti “Kumbi ndi Vinthu Wuli vo Ufumu Waku Chiuta Ufiskengi?”
a Pew Research Center, “Americans’ Dismal Views of the Nation’s Politics,” September 2023.