Yan Zabolotnyi/stock.adobe.com
JANI MASU!
Kuleka Kuvwiya Marangu Kwaluta Panthazi Ukongwa Pacharu Chosi—Kumbi Bayibolu Likambanji?
Ku Haiti kwechimutimbaheka chamaseŵera cha ndipu atesa kulasana ndi futi. Viwawa vo vichitika ku South Africa, Mexico kweniso ku vyaru vinyaki vaku Latin America vachitisa kuti ŵanthu asuzgiki ukongwa. Ndipu chinanga nkhuvigaŵa vinyaki ko kulivi ukongwa viwawa nge mo venge pakwamba, ŵanthu atijivwa mbwenu kuti mbambula kuvikilirika kweniso afipa mtima chifukwa cha malipoti ngakukwaskana ndikuswa marangu ngo atuvwa.
Kumbi Bayibolu likambanji vakukwaskana ndi kuleka kuvwiya marangu ko kuchitika pacharu chosi?
Vo Bayibolu lingukambiya limu vakukwaskana ndi kuleka kuvwiya marangu
Bayibolu likukambiya limu kuti kuleka kuvwiya marangu chazamuja chisimikizu cha “kumala kwa nyengu yinu.” (Mateyu 24:3) Wachikamba visimikizu vakulongo mazuŵa ngakumaliya Yesu wangukamba kuti:
“Chifukwa chakuti ŵanthu anandi azamuleka kuvwiya marangu, chanju cha anandi chazamuzizira.”—Mateyu 24:12.
Bayibolu lingukambiya so limu kuti “mu mazuŵa ngakumaliya” ŵanthu azamuja “ambula kujiko, akofya, akutinkha vamampha.” (2 Timote 3:1-5) Mijalidu yeniyi ndiyu yichitiska ŵanthu kuleka kuvwiya marangu mazuŵa nganu.
Kweni te ndi vifukwa vakuvwika vakujaliya ndi chilindizga. Bayibolu lilayizga kuti pambula kuswera yapa kuleka kuvwiya marangu kwazamumala.
“Kwaja kanyengu kamanavi ndipu ŵanthu aheni azamuŵaku so cha; Wazamulereska po ajanga, Ndipu azamusanirikapu cha. Kweni akufwasa azamulonde charu chapasi, Ndipu azamukondwa ukongwa ndi chimangu chikulu.”—Masalimo 37:10, 11.
Sambirani vinandi vakukwaskana ndi uthenga wakupaska chilindizga wo we mu Bayibolu kweniso chifukwa cho tigomezge kuti visimikizu vo tiwona mazuŵa nganu vifiska uchimi wa mu Bayibolu. Wonani nkhani izi.
“Tiziyembekezera Kuti Zinthu Zidzakhala Bwino M’tsogolo”
“Kumbi ndi Vinthu Wuli vo Vilongo Kuti Tija mu “Mazuŵa Ngakumaliya” Pamwenga ‘Nyengu za Umaliru’?”