Viwawa vo Vichitika Chifukwa cha Ndali—Kumbi Bayibolu Likambanji?

Muvyaru vinandi ŵanthu achitiyana vachiwawa kweniso nkhaza chifukwa cha ndali.

Ntchifukwa wuli kuchitika viwawa vinandi chifukwa cha ndali? Kumbi venivi vazamumala? Kumbi Bayibolu likambanji?

Bayibolu lingukambiya limu kuti ŵanthu azamugaŵikana chifukwa cha ndali

Bayibolu lingukambiya limu kuti nyengu yinu yo ndi “mazuŵa ngakumaliya,” ŵanthu anandi azamuja ndi mijalidu yo yazamuchitiska kuti aje achiwawa kweniso alekengi kukoliyana ndi anyawu.

• “Mu mazuŵa ngakumaliya, kuŵengi nyengu zakusuzga ukongwa. Pakuti ŵanthu azamuja . . . ambula kuwonga, ambula kugomezgeka, . . . ambula kukoliyana ndi anyawu, . . . akofya, . . . akupereka anyawu, ambula kuvwa va anyawu, akujitukumuwa.”—2 Timote 3:1-4.

Bayibolu lingukambiya so limu kuti vinthu nge kugarukiya boma kweniso viwawa vo vichitika chifukwa cha ndali vazamukuŵa visimikizu va nyengu yinu. (Luka 21:9) Kweni viwawa vo vichitika chifukwa cha ndali kweniso kugaŵikana vazamumala.

Mo viwawa vo vichitika chifukwa cha ndali vazamumaliya

Bayibolu likamba kuti boma laku Chiuta ndilu lazamusere mumalu mwa maboma ngosi nga ŵanthu.

• “Chiuta wakuchanya wazamujalikiska ufumu wo . . . wazamuphwanya ndi kutuzgapu maufumu [nganyaki] ngosi ngenanga, ndipu ufumu wenuwu pe ndiwu wazamuŵaku mpaka muyaya.”—Daniyeli 2:44.

Ufumu waku Chiuta ndiwu wazamuchitiska kuti ŵanthu akoliyanengi kweniso kuti pacharu chosi pazije chimangu.

• Yesu Khristu ndiyu Fumu ya Ufumu wenuwu ndipu wadanika kuti “Mulongozgi Wachimangu.” Iyu wazamuwonesesa kuti ‘chimangu, chimala cha.’—Yesaya 9:6, 7.

• Chinanga mphasonu panu ŵanthu wo alamulika ndi Ufumu wenuwu asambiramo angajaliya mwachimangu. Ndichu chifukwa chaki Bayibolu likamba kuti: “Yiwu azamusula malipanga ngawu kuti ngaje mayembi nga pulawu ndipuso azamusula mikondu yawu kuti yije vidya vakuphatiya vimiti. Mtundu wazamunyamuwa lipanga cha kuti uyukiyi mtundu unyaki, ndipu ŵanthu azamusambira so nkhondu cha.”—Yesaya 2:3, 4.

Kuti muziŵi vinandi ŵerengani nkhani ya mutu wakuti “Kumbi ndi Vinthu Wuli vo Ufumu Waku Chiuta Ufiskengi?” kweniso woneriyani vidiyo yakuti Kumbi Ufumu Waku Chiuta Ntchinthu Wuli?