Kumbi Akaboni aku Yehova Achita Wuli Vinthu ndi Ŵanthu wo Kali Ŵenga Muchisopa Chawu?

Titesesa kuchita vo tingafiska kuti tiyanjengi, tilongongi lisungu kweniso kutumbika munthu weyosi. Asani yumoza wa Akaboni aku Yehova wawere vuli pa nkhani yakusopa pamwenga waleke limu kusopa Yehova titesesa kukambiskana nayu, kumusimikiziya kuti titimuyanja ndipuso kumuwovya mwauzimu kuti wayambi so kusopa Yehova.—Luka 15:4-7.

Nyengu zinyaki munthu wangachita vinthu viheni vo vingachitiska kuti wamikiki dankha mu mpingu. (1 Akorinto 5:13) Kweni chifukwa chakuti titiŵayanja ukongwa Akhristu anyidu, titesesa kumuwovya munthu waviyo kuti panyaki wangasintha nthowa zaki ziheni ndi chilatu chakuti waleki kumikika mumpingu. Ndipu chinanga wangamikika, tilongo mbwenu kuti titimuyanja kweniso kumutumbika chifukwa venivi ndivu Bayibolu lititichiska kuti tichitengi.—Mariko 12:31; 1 Peturo 2:17.

Kumbi ndi vinthu wuli vo vichitiska kuti munthu wamikiki dankha mumpingu?

Bayibolu likamba mwakuvwika umampha kuti asani Mkhristu wachita ubudi ukulu ndipu wakhumba cha kusintha, watenere kumikika dankha mumpingu.a (1 Akorinto 5:11-13) Bayibolu likonkhoska maubudi ngakulungakulu ngo ngangachitiska munthu kuti wamikiki dankha. Mwakuyeruzgiyapu, maubudi nge kuchita ureŵi, kuloŵe, kubaya, kuchitiya nkhaza munthu ndipuso kuba.—1 1 Akorinto 6:9, 10; Agalatiya 5:19-21; 1 Timote 1:9, 10.

Chinanga kuti veviyo, munthu yo wachita ubudi ukulu wamikika penipo ndi penipo cha mumpingu. Chakwamba, ŵara mumpingub atimuwovya dankha kuti wasinthi nthowa zaki. (Aroma 2:4) Yiwu achita venivi mwachanju, mwakuzikira kweniso mwalisungu. (Agalatiya 6:1) Kuchita venivi kungawovya munthu yo kuziŵa vo wanangisa kweniso kuti walapi. (2 Timote 2:24-26) Asani munthu yo wakhumba cha kuvwiya fundu za mu Bayibolu ndipuso kulapa chinanga kuti wawovyeka mwakuwerezawereza, iyu watenere kumikika dankha mumpingu. Ŵara mumpingu apharazga waka mwakudumuwa kuti ngana wamikika dankha.

Ŵara ŵaŵi achiska wachinyamata ndipu akambiskana nayu fundu za mu Bayibolu. Yumoza wamuko paphewa uku walongoro nayu. — Ŵara atesesa kuwovya munthu yo wabuda mwachanju, mwakuzikira kweniso mwalisungu

Kumbi patuŵa phindu wuli asani munthu yo wachita ubudi ukulu wamikika dankha mumpingu? Chakwamba, ŵanthu mumpingu atumbika fundu za mijalidu yamampha zaku Chiuta kweniso atoliyaku cha nkharu yiheni ya munthu yo. (1 Akorinto 5:6; 15:33; 1 Peturo 1:16) Kusazgiyapu yapa, kuchita venivi kutovya munthu yo wabuda kuti wayambi kutinkha vinthu viheni kweniso kuti wasinthi.—Aheberi 12:11.

Kumbi Akaboni aku Yehova achita nawu wuli vinthu ŵanthu wo amikika dankha mumpingu?

Bayibolu likamba kuti Akhristu atenere ‘kuleka kuchitiya vinthu limoza’ ndi munthu yo wamikika dankha mumpingu, “chinanga nkhurya nayu munthu waviyo.” (1 Akorinto 5:11) Mwaviyo ticheza cha ndi munthu weyosi yo wamikika dankha. Kweni tileke limu cha kuchita nayu vinthu vinyaki. Titimutumbika ndipu titimulondere mwalikondwa asani waza ku maunganu ngidu. Kwenuku Akaboni aku Yehova angamutawuzga.c Asani wangakhumba kuwovyeka mwauzimu, iyu wangakambiya ŵara kuti amuwovyi.

Banja linyaki litawuzga mwalikondwa munthukazi yo wangumikika dankha mu mpingu ndipu waza ku Nyumba ya Ufumu. — Ŵanthu wo amikika dankha mumpingu mbakulondereka kuza ku maunganu ngidu

Wuli asani munthu yo wamikika dankha mumpingu we pa nthengwa kweniso we ndi ŵana wo ŵeche Akaboni aku Yehova? Yiwu aleka kuchitiya nayu limoza vinthu vakukwaskana ndi kusopa, kweni ubali wawu usintha cha. Ndipu chifukwa chakuti aja munyumba yimoza alutirizga kuchita vinthu nge banja ndipu akhumbika kulutirizga kuyanjana.

Munthu yo wamikika dankha wangapempha ŵara kuti amuwovyi ndipu yiwu angamupaska ulongozgi wa mu Malemba wo ungamuwovya kuti walapi kweniso kuti wawere kwaku Chiuta. (Zekariya 1:3) Asani waleka vinthu viheni vo wachitanga ndipu wakhumbisiska kwamba so kuchita vinthu mwakukoliyana ndi fundu za mu Bayibolu, iyu wangalondereka so mumpingu. Mpingu ‘umugowokiyengi ndi mtima wosi kweniso kumupembuzga,’ nge mo Akhristu aku Korinto anguchitiya ndi munthu yo wangusintha nthowa zaki ziheni.—2 Akorinto 2:6-8.

Kumbi ŵanthu wo angumikika dankha mumpingu atuvwa wuli mumtima pasonu panu?

Wonani vo Akaboni aku Yehova anyaki wo nyengu yinyaki angumikika dankha mumpingu ndipu pavuli paki angusankha kuwere kwaku Chiuta angukamba.

“Ndati ndasankha kuwere so mumpingu, ndaŵanaŵananga kuti ŵara akhumbengi kuziŵa chechosi cho ndachitanga pa nyengu yosi yo ndingumikika dankha. Mumalu mwaki, yiwu angukamba waka kuti, ‘Tikhumba kuti muŵanaŵaniyengi ukongwa vo muchitengi sonu kuti muje pa ubwezi wamampha ndi Chiuta, kuŵanaŵaniya vakali cha.’ Ŵati akamba venivi ndinguvwa umampha ukongwa mumtima.”—Maria, United States.

“Mpingu wosi wakhazanga waka kuti ndiwere kwaku Chiuta. Ndingujivwa kuti andiŵanaŵaniyanga ukongwa. Akhristu anyangu angundiwovya kuti ndijivwengi kuti ndagowokereka ndipu ndingaweriyanga vuli cha. Ŵara mumpingu nyengu zosi andiwovyanga. Yiwu andichiskanga kweniso kundiwovya kuti ndiwonengi kuti Yehova weche kundiwona kuti nde wakukhumbika ndipuso kuti watindiyanja.”—Malcom, Sierra Leone.

“Ndikondwa ukongwa kuziŵa kuti Yehova watanja ŵanthu ŵaki ndipu wakhumbisiska kuti gulu laki lijengi lakutowa. Chinanga kuti ŵanthu anyaki angawona nge ndi nkhaza kumika dankha munthu mu mpingu, kweni ndimu viliri cha. Mumalu mwaki venivi vilongo chanju. Ndikondwa ukongwa kuziŵa kuti Awusefwi akuchanya atitiyanja ndipu yiwu ndi Chiuta wakugowoke ukongwa.”—Sandi, United States.

Vo akaswiri anyaki akuziŵa va marangu wo Mbakaboni aku Yehova cha akamba

Kumbi makhoti kweniso akaswiri anyaki akambanji vakukwaskana ndi Akaboni aku Yehova pa nkhani yakumika dankha munthu yo wakhumba cha kulapa? Wonani vo anyaki akamba.

“Chisopa cho chilondo kweniso kugwiriskiya ntchitu fundu za mu Bayibolu che ndi ŵanangwa wakumika dankha munthu mumpingu wawu yo wachita ubudi ukulu asani mphakukhumbika kuchita viyo. Kuchita venivi nkhwakukhumbika chifukwa asani munthu munyaki wakhumba cha kulondo fundu za mu Bayibolu ndikuti ngwakwenere cha kuja membala wa chisopa cho, ndipu asani wangaleka kumikika dankha wangachitiska kuti anyaki wo alondo fundu za mu Bayibolu achiti vo iyu wakuchita.”—The High Court of Justice, England and Wales, June 7, 2019.
“Makhoti nga ku Europe ndipuso muvigaŵa vinyaki ngakusaniya kuti Akaboni aku Yehova ŵe ndi wanangwa wakumika dankha munthu yo wachita ubudi, ndipu makhoti ngangaseleriyapu cha pa nkhani zenizi.”—Professor Paulo Pinto de Albuquerque, yo kali wenga wakweruzga mu Khoti Likulu Lakuwona va Wanangwa wa Ŵanthu ku Europe.

a Kali tagwiriskiyanga ntchitu mazu ngakuti kusezgeka pakukamba va munthu yo watuzgika mumpingu chifukwa chakuchita ubudi ndipu wakhumba cha kulapa. Kweni pasonu panu, tigwiriskiya ntchitu mazu nga mu Bayibolu ngakuti wamikika dankha mumpingu.

b Ŵara mbanthulumi akukhwima mwauzimu wo asambiza fundu za mu Malemba kweniso aphwere ŵanthu aku Yehova ndipuso kuŵawovya. Yiwu alipirika cha.—1 Peturo 5:1-3.

c Nyengu zinyaki munthu wangatuwa mumpingu kweniso wangayamba kukamba vinthu viheni vo vingananga mbiri ya mpingu pamwenga kukopa ŵanthu anyaki kuti nawu achitengi vinthu viheni. Asani venivi vachitika, tilondo dangu la mu Bayibolu lakuti ‘tingamutawuzganga cha’ munthu waviyo.—2 Yohane 9-11.