Kumbi ndi Vinthu Wuli vo Vingakuwovyani Kuti Mulivwisengi Bayibolu?

Vo Bayibolu limuka

Bayibolu likonkhoska fundu zinandi zo zingakuwovyani kuti mulivwisengi. Kaya mukukuliya pani, uthenga waku Chiuta wo we mu Bayibolu ‘ngunononu cha kwaku yimwi, kweniso we kumalu ngakuti mungatondeka cha kufikaku.’—Marangu 30:11.

Vo vingakuwovyani kuti mulivwisengi Bayibolu

1. Mujengi ndi maŵanaŵanu ngakwenere. Muzomerezengi kuti Bayibolu ndi Mazu ngaku Chiuta. Muchitengi vinthu mwakujiyuyuwa chifukwa Chiuta wasuska akujikuzga. (1 Atesalonika 2:13; Yakobe 4:6) Kweni mungagomezganga waka chechosi cha, chifukwa Chiuta wakhumba kuti mugwiriskiyengi ntchitu “lusu linu lakuŵanaŵana.”—Aroma 12:1, 2.

2. Mupemphengi zeru kwaku Chiuta. Pa Nthanthi 3:5, Bayibolu likamba kuti: “Ungathembanga lusu laku lakuvwisa vinthu cha.” Mumalu mwaki, ‘lutirizgani kupempha Chiuta’ kuti wakupaskeni zeru kuti mulivwisengi Bayibolu.—Yakobe 1:5.

3. Muŵerengengi Bayibolu nyengu zosi. Mungalivwisa umampha Bayibolu asani mutiliŵerenga nyengu zosi mumalu mwakuliŵerenga kamozakamoza.—Yoswa 1:8.

4. Musankhengi nkhani yo mukhumba kusambira. Kusankha nkhani yinyaki yo mukhumba kuyivwisa, kutovya ukongwa kuti muvwisengi vo Malemba ngasambiza. Mungayamba kusambira visambizu vakwambiriya ndipu pavuli paki mungasambira vinthu vandimba. (Aheberi 6:1, 2) Asani muchitengi viyo, muwonengi kuti malemba nganyaki ngayanana kweniso kuti Bayibolu litijikonkhoska lija, chinanga ndi vinthu “vakusuzga kuvivwisa.”—2 Peturo 3:16.

5. Mupemphengi anyinu kuti akuwovyeni. Bayibolu lititichiska kuti tizomerengi asani anyidu wo atilivwisa umampha Bayibolu akhumba kutiwovya. (Machitidu 8:30, 31) Akaboni aku Yehova asambiza ŵanthu Bayibolu kwawezi. Nge mo Akhristu akwambiriya achitiyanga, yiwu agwiriskiya ntchitu mabuku ngakukonkhoska Bayibolu kuti awovyi anyawu kuvwisa vo Bayibolu lisambiza.—Machitidu 17:2, 3.

Vinthu vo mukhumbika cha

1. Masambiru ngapachanya. Akutumika 12 aku Yesu angavwisanga umampha Malemba ndipu asambizanga anyawu, chinanga kuti ŵanthu anyaki awonanga kuti akutumika yaŵa “ŵenga ambula kusambira ndipuso ambula kutchuka.”—Machitidu 4:13.

2. Ndalama. Mukhumbika kulipira ndalama cha kuti musambiri Bayibolu. Yesu wangukambiya akusambira ŵaki kuti: “Mukupaskika kwawezi, paskani kwawezi.”—Mateyu 10:8.