NKHANI YA PAPEJI LAKWAMBA | ŴANTHU ANANDI AKHUMBA CHA KUJA AKUGOMEZEKA

Vo Vingachitika Asani Taleka Kugomezeka

“Kanandi ndikumana ndi vinthu vakusuza vo vichitisa kuti ndikambi boza.”—Samantha wa ku South Africa.

Kumbi namwi mukoliyana ndi vo Samantha wangukamba? Nge Samantha, tosi tikumana ndi vinthu vinyaki vakusuza. Vo tichita asani takumana ndi vinthu vo vingachitisa kuti tikambi boza ndivu vilongo asani te akugomezgeka nadi. Mwakuyeruzgiyapu, asani titopa kulengeskeka, tingawona kuti palivi suzu kukamba boza. Kweni asani uneneska waziŵika tingakumana ndi masuzu nganandi. Tiyeni tiwoni masuzu nganyaki ngo tingakumana nangu.

ŴANTHU ATIMUGOMEZA CHA MUNTHU WABOZA

Ŵanthu akoliyana ukongwa asani agomezana. Asani munthu ngwakugomezeka ŵanthu atimuthemba. Kweni pe vinthu vinyaki vo vitovya kuti ŵanthu agomezanengi ukongwa. Ŵanthu agomezana ukongwa asani acheze limoza kwa nyengu yitali, akambisana, kweniso kuchitiyana vinthu vamampha. Kweni ŵanthu angaleka kugomezana chifukwa cha kuleka kugomezeka kamoza pe. Ndipu asani ŵanthu aleka kugomezana, vija vakusuza kuti ayambi so kugomezana.

Kumbi mukupusikikapu ndi munthu yo mwamuwonanga kuti ndi mubwezi winu? Asani ndi viyo, kumbi munguvwa wuli? Panyaki vingukupwetekani ukongwa. Ivi vakuziziswa cha. Kuleka kugomezeka kungachitisa kuti ŵanthu aleki kukoliyana.

MUNTHU YUMOZA WANGACHITISKA KUTI ŴANTHU ANANDI AJE AMBULA KUGOMEZEKA

Pulofesa munyaki wakuwona mo chuma chitende zina laki Robert Innes wangusaniya kuti munthu yumoza wangachitisa kuti ŵanthu anandi aje ambula kugomezeka. Nkharu iyi tingayiyeruzgiya ndi matenda ngakupasiyana. Asani munthu wayanjana ndi munthu wambula kugomezeka, nayu waja wambula kugomezeka.

Kumbi tingachita wuli kuti tileki kuwira muchiŵana cha kuleka kugomezeka? Bayibolu ndilu lingatiwovya. Tiyeni tiwoni fundu zimanavi za m’Bayibolu zo zingatiwovya pa nkhani iyi.

Mitundu ya Kuleka Kugomezeka

Boza

KUMBI KUKAMBA BOZA KUNG’ANAMUWANJI? Kung’anamuwa kuleka kumukambiya uneneska munthu yo wakhumbika kuziŵa uneneska. Kung’anamuwa so kuleka kukamba fundu zauneneska ndi chilatu chakuti tipusisi munthu munyaki.

VO BAYIBOLU LIKAMBA: “Yehova watinkha munthu wachinyengu, kweni watanja ŵanthu a mtima wamampha.” (Nthanthi 3:32) “Pakuti sonu mwaleka chinyengu, weyosi wakambengi uneneska ku munyaki.”—Ŵaefesu 4:25.

Misechi

KUMBI MISECHI YING’ANAMUWANJI? Ying’anamuwa kukamba nkhani yaboza yakunanga mbiri ya munthu munyaki.

VO BAYIBOLU LIKAMBA: “Munthu wakupenje anyaki vifukwa wayambisa mphindanu, ndipu yo wakamba vinthu viheni va ŵanthu anyaki wachitisa kuti mabwezi ngatinkhani.” (Nthanthi 16:28) “Motu uzimwa asani palivi nkhuni, ndipu asani palivi munthu wakukamba vinthu viheni va ŵanthu anyaki, mphindanu zimala.”—Nthanthi 26:20.

Chinyengu

KUMBI CHINYENGU CHING’ANAMUWANJI? Ching’anamuwa kupusisa munthu munyaki ndi chilatu chakuti tisaniyi ndalama pamwenga katundu.

VO BAYIBOLU LIKAMBA: “Ungamuchitiyanga chinyengu cha waganyu yo ndi mukavu.” (Marangu 24:14, 15) “Wakubiya mukavu wanyoza yo wakumupanga, kweni wakuchitiya lisungu mukavu watumbika yo wakumupanga.”—Nthanthi 14:31.

Kuba

KUMBI KUBA KUNG’ANAMUWANJI? Kung’anamuwa kuto chinthu cha munthu munyaki kwambula kuzomelezeka.

VO BAYIBOLU LIKAMBA: “Wakuba wangabanga so cha, kweni wagwiri ntchitu mwaphamphu. Wagwiri ntchitu yamampha ndi manja ngaki kuti wasaniyi kanthu kakuti wapasi mukavu.” (Ŵaefesu 4:28) “Mungalandizgikanga cha. . . . Ankhungu, ambunu, aloŵevu, apamulomu, ndipuso akuphanga, wosi azamusere cha mu Ufumu waku Chiuta.”—1 Ŵakorinte 6:9, 10.