‘Zina Laku Chiuta Litozgeki’
1. Kumbi mutu wa unganu wadera wa chaka cha 2012 ngwakuti wuli, nanga watuliya nampha?
1 Ndi mwaŵi ukulu ukongwa kuti tiziŵika ndi zina laku Chiuta Wachilengedu Chosi, Yehova. Chiuta ndiyu wakutipaska zina laki ndipu tikwamba kuziŵika ndi zina laki lapade nge Akaboni aku Yehova kwambiya mu 1931. (Yesa. 43:10) Mwana waki wakuwayija, Yesu, watumbikanga ukongwa zina laku Chiuta ndipu ndilu wangwamba kulizumbuwa mu rombu lo wangusambiza akusambira ŵaki. (Mate. 6:9) Mwaviyo mutu wa unganu wadera wa chaka cha uteŵeti cha 2012, watuliya pa mazu ngo Yesu wangukamba. Mutu wa unganu uwu ngwakuti, ‘Zina Laku Chiuta Litozgeki.’ Asani mutingaziŵa mazuŵa nga unganu winu wadera, kumbi mwangalemba pa kalendala yinu ndi kupanga manozgeru ngakuti mukasanirikepu?
2. Kumbi tikhaza kuchivwa nkhani nizi ku unganu?
2 Vo Tamusambira: Pa Chisulu nkhani yakuti, “Ziŵiskani Zina Laku Chiuta nge Ateŵeti Anyengu Zosi” yamukonkhoska umampha wakuchita uteŵeti wanyengu zosi pa umoyu. Tamukuvwa so nkhani yakusiliyana yakuti, “Tcheŵani Kuti Munganyozesa Zina Laku Yehova,” yo yazakutiwovya kuti tileki kuŵira mu viŵana vinayi. Nkhani yakuti, “Chifukwa cho Zina Laku Chiuta Litenere Kutozgeke” yamumuka fumbu lakuti, Nchinthu wuli cho chingatiwovya kuti tipharazgengi mwaphamphu chinanga kuti ŵanthu akondwa cha ndi uthenga widu? ndipuso lakuti, Nchinthu wuli cho chingatiwovya kuti tifikengi ŵanthu pa mtima mu uteŵeti? Pa Sabata tamukondwa ndi nkhani yakusiliyana yavigaŵa vinayi yo yakutiwovya kuziŵa mo tingatozge zina laku Chiuta mwa Maŵanaŵanu, vakukamba, vakusankha ndi vakuchita vidu. Wo ayamba sonu kusambira uneneska amukondwa so ukongwa ndi nkhani ya ŵanthu wosi ya mutu wakuti, “Yehova Wazamutozga Zina Laki Likulu pa Aramagedoni.”
3. Kumbi te ndi udindu wuli, ndipu unganu wadera wakutiwovya wuli?
3 Pambula kuswera yapa, Yehova wachitengepu kanthu kuti watozgi zina laki. (Ezek. 36:23) Pa nyengu yasonu, te ndi udindu ukulu ndipuso wapade wakuti tichiti vosi vo tingafiska pakuteŵete Yehova munthowa yo yingatiwovya kuti tichitengi vinthu mwakukoliyana ndi zina laki. Te ndi chigomezgu chakuti unganu wadera uwu utiwovyengi kufiska udindu widu ukulu nge ŵanthu wo aziŵika ndi zina laku Chiuta.