Kumbi Tingaŵawovya Wuli Ŵanthu Anyaki?
François yo ndi mura mumpingu m’charu chinyaki chikavu wangukamba kuti: “Kwenga viwawa pavuli pa chisankha cho chinguchitika, ndipu venivi vinguchitiska kuti Akaboni anandi athaŵi munyumba zawu. Chakurya kweniso munkhwala vingwamba kusoŵa, vinthu venga vakudula ukongwa. Mabanki ngangujalika ndipu kwengavi kwakuti ungachito ndalama.”
Mwaliŵiliŵi, abali a ku ofesi ya nthambi angwamba kugaŵiya vinthu ndipuso ndalama Akaboni wo anguthaŵiya mu Nyumba za Ufumu za m’charu cho. Magulu ngo ngalimbananga ngangujala misewu, kweni chifukwa chakuti magulu ngosi ngaziŵanga kuti Akaboni aserere mu ndali cha, galimotu za ofesi ya nthambi azizomerezganga kujumpha.
François wangukamba kuti: “Tichiluta ku Nyumba ya Ufumu yinyaki, vigeŵenga vinguhoma galimotu yindu ndi futi kweni isi yingutihoma cha. Tati tawona msilikali wachititchimbiriya ndi futi, tinguwerere mwaliŵiliŵi kuluta ku ofesi ya nthambi. Tingumuwonga Yehova chifukwa wangutitaska. Mawa laki, abali 130 wo ŵenga mu Nyumba ya Ufumu yo talutangaku anguthaŵiya kumalu ngo kwengavi viwawa. Anyaki anguza ku ofesi ya nthambi ndipu tinguŵaphwere mpaka po viwawa vingumaliya.”
François wangukamba so kuti: “Ofesi ya nthambi yingulonde makalata nganandi kutuliya kwa abali wo awonganga ukongwa. Kuwona mo abali pacharu chosi anguŵawovye kunguchitiska kuti agomezgengi ukongwa Yehova.”
Asani kwachitika masuzgu nge yanga, titiŵakambiya ŵaka pamulomu cha abali kuti “mufundiskiki ndi mugutiskiki.” (Yak. 2:15, 16) M’malu mwaki, tiyesesa kuŵawovya mwakuliŵavu. Mwakuyana ŵaka, akutumika ŵati ŵavwa kuti kuŵengi chilala, weyosi wangupereka chovyu mwakulingana ndi mo wasaniriyanga kuti “chitumiki ku ŵabali ŵakuja mu Yuda.”—Mac. 11:28-30.
Nge ateŵeti aku Yehova, tikhumbisiska kuwovya wo akhumbika chovyu chakuliŵavu. Kweni ŵanthu akhumbika so kuwovyeka mwauzimu. (Mat. 5:3) Yesu wangutuma wo amulondonga kuti akapangi akusambira ndi chilatu chakuti ŵanthu aziŵi kuti ŵe ndi suzgu yauzimu kweniso kuti akhumbika kuwovyeka. (Mat. 28:19, 20) Titijipereka ukongwa kweniso tigwiriskiya nchitu nyengu, nthazi ndi chuma chidu kuti tifiski dangu lenili. Nge gulu, tigwiriskiya nchitu ndalama zo ŵanthu apereka mwakukhumba kwawu kuti tiwovyi ŵanthu mwakuliŵavu, kweni chilatu chikulu cha ndalama izi nkhulutisa panthazi nchitu yakupharazga uthenga wamampha wa Ufumu. Asani tichita viyo, tilongo kuti titanja Yehova ndi anyidu.—Mat. 22:37-39.
Ŵanthu wo apereka vawanangwa kuti viwovyi pa nchitu ya pacharu chosi ya Akaboni aku Yehova, atenere kuja ndi chigomezgu kuti vakupereka vawu vigwiriskiya nchitu mwakwenere. Kumbi mungafiska kovya abali ŵidu wo akhumbika chovyu? Kumbi mukhumbisiska kuwovya pa nchitu yakupanga akusambira? Asani ndiviyo, ‘mungakaniliyanga cha umampha kwaku ŵeniwo utiŵayenere asani nkhwinu kuwuchita.’—Nthanthi 3:27.