Mo Tingasazgiyaku Lusu Lidu mu Uteŵeti—Kumuka Ŵanthu wo Akana Kuŵapharazgiya

Nchifukwa Wuli Nkhwakukhumbika?: Ŵanaŵaniyani kuti m’chigaŵa chinu muchitikengi chinthu chinyaki cho chingabaya ŵanthu anandi asani angaleka kuthaŵa. Muluta kwa munyinu kuchimutcheŵeska kweni mwechendamalizi kukonkhoska, watikukambiyani kuti watangwamika. Kumbi ivi vingakuchitiskani kuti muleki kumutcheŵeska? Ŵanthu anandi m’chigaŵa chidu akana kuŵapharazgiya chifukwa chakuti aziŵa cha kuti uthenga widu ngwakuzirwa ukongwa kweniso ngwakutaska umoyu. Ndipu akhumba atanja kujitangwamiska asani taŵapukwa. (Mat. 24:37-39) Nyengu zinyaki akhoza kukana chifukwa chakuti akuvwa nkhani zaboza. (Mat. 11:18, 19) Ivi vichitiska kuti awonengi nge kuti tiyanana ŵaka ndi visopa vinyaki vo vichita vinthu viheni. (2 Pet. 2:1, 2) Asani mweneku wa nyumba wawoneka kuti walivi linweka, tingagongowanga liŵi cha.

Mo Mungachitiya:

Mwechendayambi kupharazga nyumba ndi nyumba, muŵanaŵaniyengi dankha vinthu vo ŵanthu wo akana kuŵapharazgiya akamba kweniso mo mungaŵamukiya.
Asani mweneku wa nyumba watikususkani, muyesengi kusaniya nthowa yamampha yakulutirizgiya kukambiskana nayu. Akhumba mungachita umampha kumulumba. Mwakuyeruzgiyapu, asani wakamba kuti we ndi chisopa chaki, mungamumuka kuti, “Nani ndakhumbisiskanga kusaniya munthu yo watanja Chiuta nge yimwi.” Nyengu zinyaki kuziŵa liŵi maŵanaŵanu nga munthu yo mutimupharazgiya kungakuwovyani kuti mulutirizgi kukambiskana nayu. Mwakuyeruzgiyapu, asani wakamba kuti watangwamika, mungamumuka kuti: “Chamampha. Kweni ndechendaluti, ndingayanja kukupaskani chinthu chinyaki.” Asani mweneku wa nyumba wakamba kuti waleka kukondweskeka, mungamufumba kuti, “Kumbi mung’anamuwa kuti lo lileka kukukondweskani ndi Bayibolo pamwenga chisopa chechosi?”
Muchitengi vinthu mwazeru. Mutenere kukumbuka kuti Yehova wachichizga cha ŵanthu kuti avwisiyi. (Mar. 30:19) Weyosi wakhumbika kunyamuwa katundu waki pakuti wazamumuka yija kwaku Yehova. (Ŵag. 6:5) Asani mweneku wakanisiska, tingachita umampha kumusiya. Kumulongo ulemu kungawovya kuti munthazi wazileki kukana asani Akaboni anyaki azimupharazgiya.—1 Pet. 3:15.

Yesani Kuchita ivi Mwezi Wunu:

Asani mwatuwa ŵaka panyumba ya munthu yo wakana kumupharazgiya, kambiskanani ndi munyinu nthowa yamampha yo mwakhumbikiyanga kumukiya.