Malifalensi nga Nkhani za Unganu wa Umoyu Widu Wachikhristu Ndipuso Uteŵeti
SEPTEMBER 4-10
CHUMA CHAKUTULIYA M’MAZU NGAKU CHIUTA | EZEKIELE 42-45
“Kusopa Kwauneneska Kunguwezekiyapu”
it-2 1082 ¶2
Nyumba Yakusopiyamu
Chiwona chaku Ezekiele cha nyumba yakusopiyamu. Mu 593 B.C.E., mu chaka cha 14 Yerusalemu wati wabwangandulika limoza ndi nyumba yakusopiyamu yo Solomoni wanguzenga, Ezekiele yo wenga wasembi kweniso mchimi, wanguluta pachanya pa phiri litali muchiwona ndipu wanguchiwona nyumba yikulu yakusopiyamu Yehova. (Ezek. 40:1, 2) Yehova wangukambiya Ezekiele kuti wakambiyi “nyumba ya Yisraele” vosi vo wanguwona kuti wachiski Ayuda akugomezgeka kweniso kuti wachitisi soni Ayuda anyaki wo ŵenga ku ukapolu ndipuso kuti alapi. (Ezek. 40:4; 43:10, 11) Chiwona ichi chinguwovya Ayisraele kuti aziŵi umampha mo nyumba yakusopiyamu yakhumbikiyanga kuzengeke malinga ndi chakupimiya cho chingukambika muchiwona ichi. Chakupimiya ichi chenga “deti” (deti ili lenga litali mamita 3.11 pamwenga kuti mafiti 10.2), ndipu “ukhomi wachimati” (wenga deti la masentimita 51.8 pamwenga kuti mainchesi 20.4). (Ezek. 40:5) Mwesu wa nyumba yakusopiyamu unguwovya ŵanthu anyaki kuti agomezgengi kuti chiwona ichi chatingi chiŵengi chakuwoniyapu cha nyumba yo Zerubabele watingi wazizengengi asani Ayuda awe ku ukapolu. Chinanga kuti veviyo, palivi ukaboni wewosi wakulongo kuti ivi vingufiskika nadi.
Kufufuza Fundu Zakuzirwa za M’Bayibolu
it-2 467 ¶4
Zina
Ayisraele angutondeka kuvwiya marangu ngaku Chiuta ndipu venivi vinguchitisa kuti zina laki linyozeki. (Ezek. 43:8; Amosi 2:7) Pavuli paki, Chiuta wanguŵalanga chifukwa chakuleka kugomezgeka kwawu. Venivi vinguchitisa kuti ŵanthu a mitundu yinyaki ayambi kunyoza zina laku Chiuta. (Yeruzgiyani ndi Sumu 74:10, 18; Yes. 52:5.) Ŵanthu amitundu yinyaki ŵenaŵa aŵanaŵananga kuti Yehova watondeka kuvikiliya ŵanthu ŵaki. Akambanga viyo chifukwa anguziŵa cha kuti chenichi chenga chilangu chakutuliya kwaku Yehova. Yehova wanguchitapu kanthu kuti watowesi zina laki ndipu wanguweze ku Yerusalemu Ayuda wo ŵenga ku ukapolu.—Ezek. 36:22-24.
it-2 140
Urunji
Nyengu zosi Yehova watanja ŵanthu wo ayesesa kulondo fundu zaki za urunji. (Yes. 1:17, 18; 10:1, 2; Yer. 7:5-7; 21:12; 22:3, 4; Ezek. 45:9, 10; Amosi 5:15; Mika 3:9-12; 6:8; Zek. 7:9-12)
SEPTEMBER 11-17
CHUMA CHAKUTULIYA M’MAZU NGAKU CHIUTA | EZEKIELE 46-48
Kufufuza Fundu Zakuzirwa za M’Bayibolu
it-2 1001
Mwana wa Munthu
Mu Malemba ngosi nga Chiheberi, mazu yanga ngasanirika ukongwa m’buku la Ezekiele ndipu Chiuta wakamba mchimi mwenuyu kuti “mwana wa munthu” kwa maulendu ngakujumpha 90. (Ezek. 2:1, 3, 6, 8) Viwoneka kuti Yehova wagwirisiya ntchitu mazu yanga chifukwa mchimi uyu wenga munthu. Kweni wapambananga ukongwa ndi ŵanthu wo alongolonga m’malu mwa fumu. Tikamba viyo chifukwa iyu wapharazganga uthenga wakutuwa kwaku Chiuta Wapachanya Limu. Mazu ngenanga ngagwirisikiya so ntchitu paku pa Danyele ndipu ngasanirika pa Danyele 8:17.
SEPTEMBER 18-24
CHUMA CHAKUTULIYA M’MAZU NGAKU CHIUTA | DANYELE 1-3
Kufufuza Fundu Zakuzirwa za M’Bayibolu
it-2 382
Mesheke
Viwoneka kuti penga vifukwa vitatu vo vinguŵachitisa kuti awonengi kuti vakurya va fumu ‘vakufipiskika’: (1) Ababiloni aryanga nyama zakufipiskika. Venivi vapambananga ukongwa ndi Marangu ngaku Mosese; (2) aziŵanga cha kuti nyama zo Ababiloni aryanga zachinjikanga pamwenga cha, chifukwa viwoneka kuti nyengu zinyaki azinyongolonga ŵaka khosi; (3) kanandi nyama zo aryanga ŵanthu wo asopanga angoza, aziperekenga dankha sembi kwa achiuta ŵawu. Mwaviyo, Ayisraele akananga kurya nyama zenizi chifukwa atingi alongongi kuti nawu asopa achiuta ŵenaŵa.—Dan. 1:8; Yeruzgiyani ndi 1 Ŵakor. 10:18-20, 28.
SEPTEMBER 25–OCTOBER 1
CHUMA CHAKUTULIYA M’MAZU NGAKU CHIUTA | DANYELE 4-6
Kufufuza Fundu Zakuzirwa za M’Bayibolu
w88 10/1 30 ¶3-5
Vo Akuŵerenga Afumba
Pa nyengu yo Mheberi munyaki zina laki Danyele wangudanika, fumu yaku Babiloni yingumupempha kuti wavwali malaya nga mtundu wapepu, ndikumuvwalika nekelesi ya golidi, kuti waje wakulamuliya wachitatu mu ufumu waki. Mchimi uyu wangumuka mwaulemu kuti: “Mphasu zinu zo toni, ndipu mphotu zinu mupasi ŵanthu anyaki. Kweni ndiyiŵerengiyengi fumu vo vikulembeka ndipuso ndiyikambiyengi vo ving’anamuwa.”—Danyele 5:17.
Danyele wakhumbanga cha kulipirika pamwenga kulonde chinyeda kuti wang’anamuliyi vo wanguŵerenge fumu. Fumu yakhumbikanga kuti yito mphasu zaki pamwenga kuzipereka ku munthu munyaki. Danyele wakhumbikanga kupasika mphasu cha kuti wang’anamuliyi vo wanguŵerenga chifukwa chakuti wagwirisiyanga ntchitu nthazi zaku Yehova, Chiuta wauneneska, yo wenga pafupi kuyeruzga Babiloni.
Nge po tiwone pa Danyele 5:29, Danyele wati waŵerenga ndipuso kung’anamuliya nge po wangukambiya, fumu yingulamula kuti Danyele wapasiki mbwenu mphasu. Danyele wanguvwala yija cha malaya ndi nekelesi. Kweni anguchita kumuvwalika chifukwa chakuti Fumu Beleshazara ndiyu yingulamula. Fundu iyi yisuskana cha ndi lemba la Danyele 5:17, po mchimi uyu wangulongo kuti wengavi vilatu viheni pakung’anamuliya fumu vo wanguŵerenga.