Malifalensi nga Nkhani za Unganu wa Umoyu Widu Wachikhristu Ndipuso Uteŵeti
FEBRUARY 4-10
CHUMA CHAKUTULIYA M’MAZU NGAKU CHIUTA | AROMA 1-3
“Lutirizgani Kusambiza Njuŵi Yinu”
lvs 18 ¶6
Kumbi Mungachita Wuli Kuti Muje ndi Njuŵi Yamampha?
6 Chinanga mbanthu wo aleka kuteŵete Yehova, kanandi nawu aziŵa cho ntchamampha ndi chiheni. Bayibolu likamba kuti: “Maŵanaŵanu ngawu ngatiŵasuska pamwenga kuŵazomereza.” (Aroma 2:14, 15) Mwakuyeruzgiyapu, ŵanthu anandi aziŵa kuti kubaya munthu pamwenga kuba nkhuheni. Mwaviyo, chinanga kuti aziŵa cha, kweni alondo njuŵi yawu yo Yehova wakuŵapaska kuti apambanisengi pakati pa chamampha ndi chiheni. Asani achita viyo ndikuti alondo fundu za mijalidu yamampha zo Yehova wakutipaska kuti zitiwovyengi kusankha umampha vinthu.
lvs 19-20 ¶8-9
Kumbi Mungachita Wuli Kuti Muje ndi Njuŵi Yamampha?
8 Ŵanthu anyaki aŵanaŵana kuti kuvwiya njuŵi yawu kung’anamuwa kulondo waka chechosi cho mtima wawu wakhumba. Yiwu awona kuti angachita chechosi cho akhumba, malinga awona kuti ntchamampha. Kweni tikhumbika kuziŵa kuti te ambula kufikapu ndipu maŵanaŵanu ngidu ngangatipusisa. Kweniso, kulondo maŵanaŵanu ngidu kuchitiska kuti njuŵi yidu yileki kugwira ntchitu umampha. Bayibolu likamba kuti: “Mtima widu ngwakunyenga kuluska chechosi kweniso nguheni ukongwa. Ndiyani yo wangawuziŵa?” (Yeremiya 17:9) Mwaviyo, tingayamba kuwona chinthu chiheni nge kuti ntchamampha. Mwakuyeruzgiyapu, Paulo wechendasinthi kuja Mkhristu waŵatombozganga ukongwa ŵanthu aku Chiuta ndipu wawonanga kuti wachita vinthu vakwenere. Iyu wachitanga venivi ndi njuŵi yamampha. Kweni pati pajumpha nyengu iyu wangukamba kuti: “Yehova ndiyu watindifufuza.” (1 Akorinto 4:4; Machitidu 23:1; 2 Timote 1:3) Paulo wati waziŵa mo Yehova wavwiyanga ndi vo wachitanga, wanguziŵa kuti wakhumbikanga kusintha. Venivi vititisambiza kuti kuti techendachiti chinthu chechosi, tikhumbika kujifumba kuti, ‘Kumbi Yehova wakhumba kuti ndichiti wuli pa nkhani iyi?’
9 Munthu yo watanja munyaki wangamuguŵiskiya dala cha. Mwakuyanana waka, nasi tingachitiya dala cha vinthu vo vingaguŵiska Yehova, chifukwa titimuyanja ukongwa. Kopa kuguŵiska Yehova ndiku kutenere kuja panthazi pa umoyu widu. Nehemiya ntchakuwoniyapu chamampha pa nkhani iyi. Iyu wangukana kugwiriskiya ntchitu udindu waki kuti wakhupuki. Ntchifukwa wuli wanguchita viyo? Iyu wangukamba kuti “wawopanga Chiuta.” (Nehemiya 5:15) Nehemiya wakhumbanga cha kuchita chechosi cho chatingi chiguŵiskengi Yehova. Nge mo Nehemiya wanguchitiya, nasi titopa kumuguŵiskiya Yehova mwakuchitiya dala vinthu viheni. Kuŵerenga Bayibolu kungatiwovya kuti tiziŵi vinthu vo vikondwesa Yehova.—Wonani Fundu Yakukumaliya 6.
Kufufuza Fundu Zakuzirwa za M’Bayibolu
w08 6/15 30 ¶5
Fundu Zikulu Zakutuliya Mukalata Yakuluta kwa Aroma
3:4. Asani vo ŵanthu akamba vipambana ndi vo Chiuta wakamba mu Bayibolu, tiyesesa kuti “Chiuta waje muneneska.” Kugomezga uthenga wa mu Bayibolu ndipuso kuchita vo Chiuta wakhumba ndiku kutitiwovya kuti tichitengi venivi. Asani tipharazga uthenga wa Ufumu mwaphamphu kweniso asani tigwiraku ntchitu yakovya ŵanthu kuti aje akusambira ndikuti titiŵawovya kuti aziŵi kuti Chiuta ndi muneneska.
w08 6/15 29 ¶6
Fundu Zikulu Zakutuliya Mukalata Yakuluta kwa Aroma
3:24, 25—Kumbi “sembi yakuwombole yo Khristu Yesu wakupereka” yikubenekere wuli “maubudi ngo ngakuchitika kali” sembi iyi yechendaperekeki? Uchimi wakwamba wakukwaskana ndi Mesiya wo ukulembeka pa Chiyambo 3:15, ungufiskika mu 33 C.E. pa nyengu yo Yesu wangufwiya pachimiti chakutombozgekiyapu. (Aga. 3:13, 16) Yehova wati wakamba uchimi uwu, venga nge kuti sembi iyi yaperekeka kali chifukwa palivi chechosi cho chingamutondekesa kufiska khumbu laki. Mwaviyo, chifukwa cha sembi yaku Yesu Khristu yo yinguziperekeka, Yehova wangugowoke maubudi nga ŵana aku Adamu wo agomezganga layizgu lenili. Sembi yeniyi yitovya so kuti ŵanthu wo ŵengaku Chikhristu chechendayambi aziyuskiki.—Machi. 24:15.
FEBRUARY 11-17
CHUMA CHAKUTULIYA M’MAZU NGAKU CHIUTA | AROMA 4-6
“Chiuta Watilongo Chanju Chaki”
w11 6/15 12 ¶5
Chiuta Watilongo Chanju Chaki
5 Pakwamba nkhani iyi, Paulo wangukonkhoska kuti: “Nge mo ubudi ukuselere mucharu kuziya mwa munthu yumoza, ndi nyifwa chifukwa cha ubudi, ndipu nyifwa yikusapaliya ku ŵanthu wosi chifukwa wosi akubuda.” (Aro. 5:12) Tiziŵa venivi chifukwa Chiuta wangutuma ŵanthu kuti alembi mo umoyu wa ŵanthu ukwambiya. Pakwamba, Yehova wangulenga ŵanthu ŵaŵi, Adamu ndi Heva. Mulengi widu ngwakufikapu ndipu apapi ŵidu akwamba nawu so ŵenga akufikapu. Chiuta wanguŵapaska dangu limoza pe ndipu wanguŵakambiya kuti asani alekengi kuvwiya afwengi. (Chiya. 2:17) Kweni yiwu angusankha kuchita vinthu vo vinguŵapweteka ndipu anguvwiya cha vo Chiuta wanguŵakambiya. Mwaviyo, vo yiwu anguchita vingulongo kuti akana kuti Chiuta ndiyu ngwakwenere kuŵapaska marangu kweniso kuŵalamuliya.—Mara. 32:4, 5.
w11 6/15 12 ¶6
Chiuta Watilongo Chanju Chaki
6 Adamu wangwamba kubala ŵana wati wabuda kali. Mwaviyo, ubudi waki unguyambukiya so ŵana ŵaki wosi ndipu angwamba kukumana ndi masuzgu. Ŵana aku Adamu anguphwanyaku cha dangu laku Chiuta nge mo anguchtiya awusewu. Ndichu chifukwa chaki yiwu angumbika mlandu wakuyanana ndi wa awusewu cha. Kweniso pa nyengu iyi ndipu ŵana aku Adamu ŵechendapaskiki marangu. (Chiya. 2:17) Chinanga venga viyo, ŵana yaŵa anguhara mbwenu ubudi wa awusewu. Mwaviyo, ubudi ndi nyifwa vingwamba kulamuliya mpaka pa nyengu yo Chiuta wanguŵapaskiya marangu Ayisirayeli. Marangu ngenanga nganguŵawovya kuziŵa kuti mbakubuda. (Ŵerengani Aroma 5:13, 14.) Masuzgu ngo ngatuza chifukwa cha ubudi ngangayeruzgikiya ndi chilema pamwenga matenda nganyaki ngo munthu watole kwa apapi ŵaki, nge matenda ngakumala ndopa pamwenga kutaya ndopa zinandi kwambula kulekeza asani munthu wapwetekeka. Mbuneneska kuti nyengu zinyaki ŵana anyaki angasuzgika cha ndi matenda ngenanga kweni angayambuzgiya ŵana ŵawu wo angazibala. Kweni ndimu viliri cha ndi ubudi chifukwa palivi munthu yo waleka kukwaskika ndi ubudi waku Adamu. Ndipu nyengu zosi ubudi uwu uzisa nyifwa. Mwana weyosi wayambuwaku ubudi wenuwu. Kumbi ubudi wenuwu ungatuzgikapu?
w11 6/15 13 ¶9-10
Chiuta Watilongo Chanju Chaki
9 Kumbi mazu nga Chigiriki ngo ngakufwatulika kuti “kukambika kuti mbarunji‵” kweniso ngakuti “akambiki kuti mbarunji” ngang’anamuwanji? Munthu munyaki yo wagwiranga ntchitu yakufwatuliya Bayibolu wangukamba kuti: “Mazu yanga ngakuphiphirisa ndipu ngayeruzgiya nkhani iyi ndi vo vichitika mukhoti. Ngakamba ukongwa za mo Chiuta watimuwone munthu yo sonu kupambana ndi mo wamuwoniyanga pakwamba . . . Ve nge kuti munthu munyaki wambika mulandu wakuti wachita vinthu vambula urunji. Kweni Chiuta yo ngwakuyeruzga, wakamba kuti munthu yo walivi mulandu.”
10 Kumbi “Wakuyeruzga wa charu chosi” wangafwatuwa munthu wambula urunji pa vifukwa nivi? (Chiya. 18:25) Kuti ivi vichitiki, Chiuta wangutuma Mwana waki wapade pacharu chapasi. Iyu wanguchita venivi chifukwa cha chanju. Yesu wanguchita khumbu la Awisi kwambula kunangisapu kekosi chinanga kuti wakumananga ndi mayeseru, wasekekanga ukongwa kweniso watombozgekanga. Iyu wangulutirizga kuja wakugomezgeka mpaka po wangufwiya pa chimiti chakutombozgekiyapu. (Ahe. 2:10) Yesu wangupereka sembi umoyu waki wakufikapu kuti wafwatuwi pamwenga kuti wawombo ŵana aku Adamu ku ubudi ndi nyifwa.—Mate. 20:28; Aro. 5:6-8.
Kufufuza Fundu Zakuzirwa za M’Bayibolu
w08 6/15 29 ¶7
Fundu Zikulu Zakutuliya Mukalata Yakuluta kwa Aroma
6:3-5—Kumbi kubatizika mwaku Khristu Yesu kweniso kubatizika mu nyifwa yaki kung’anamuwanji? Asani Yehova wasankha akusambira aku Yesu ndi mzimu wakupaturika, yiwu akoliyana ndi Yesu ndipu aja chigaŵa cha mpingu, wo ndi liŵavu laku Khristu. Ndipu Khristu ndiyu mutu wa mpingu wenuwu. (1 Akori. 12:12, 13, 27; Ako. 1:18) Kwenuku ndiku kubatizika mwaku Khristu Yesu. Akhristu akusankhika ‘abatizika so mu nyifwa yaku [Khristu]’ chifukwa aja umoyu wambula kukhumba vinandi kweniso aleka kuja ndi chilindizga chakuzija ndi umoyu wamuyaya pacharu chapasi. Mwaviyo, nyifwa yawu nayu yija nge sembi, nge mo yenge nyifwa yaku Yesu, chinanga kuti nyifwa yawu yiwombo ŵanthu cha. Kubatizika mu nyifwa yaku Khristu kumala asani Akhristu akusankhika ŵenaŵa ŵafwa ndi kuyuskikiya kuchanya.
w14 7/1 15 ¶2
Ntchinthu Wuli cho Chazamuchitikiya Ambuyafwi wo Akufwa Kali?
1 Asani ŵanthu ambula urunji aziyuskika, kumbi azamuyeruzgika chifukwa cha vo achitanga ŵechendafwi? Awa. Lemba la Aroma 6:7 likamba kuti: “Munthu yo wafwa, wafwatulika ku ubudi waki.” Mwaviyo, chifukwa chakuti angufwa, mphurupuru zawu zikumala. Ndichu chifukwa chaki azamuyeruzgika pa vinthu vo anguchita ŵechendafwi cha kweni vo azamuchita asani aziyuskika. Kumbi yiwu azamuyanduwa wuli?
FEBRUARY 18-24
CHUMA CHAKUTULIYA M’MAZU NGAKU CHIUTA | AROMA 7-8
“Kumbi ‘Mulindizga mwakunweka’?”
w12 7/15 11 ¶17
Zomerezani Kuti Yehova Wakulongozgiyeni ku Wanangwa Weneku
17 Pakukamba za wanangwa wo Yehova wazamupaska ŵanthu ŵaki, Paulo wangukamba kuti: “Chilengedu chilindizga mwakunweka kuvumbulika kwa ŵana aku Chiuta.” Pavuli paki wangukamba so kuti: “Chilengedu chenichi chazamufwatulika ku ukapolu wa kuvunda ndi kuja ndi wanangwa waunkhankhu wa ŵana aku Chiuta.” (Aro. 8:19-21) Mazu ngakuti “chilengedu” pa lemba ili ngakamba za ŵanthu wo ŵe ndi chilindizga chakuzija pacharu chapasi wo azamuyanduwa ukongwa ndi “kuvumbulika” kwa ŵana aku Chiuta wo akusankhika ndi mzimu. Kuvumbulika kwenuku kwazamukwamba asani “ŵana” ŵenaŵa aziyuskikiya kuchanya kweniso asani aziyamba kuwovyana ndi Khristu pakutuzgapu viheni vosi pacharu ndi kutaska “mzinda ukulu” kuti usere mucharu chifya.—Chivu. 7:9, 14.
w12 3/15 23 ¶11
Tikondwengi ndi Chilindizga Chidu
11 Yehova ndiyu wakupaska ŵanthu chilindizga chifukwa wakulayizga kuti wazakuwaŵataska ku “njoka yakali ukongwa” yo yidanika kuti Satana Dyaboli. Kuti venivi vifiskiki, iyu wazamugwiriskiya ntchitu mbewu yakulayizgika. (Chivu. 12:9; Chiya. 3:15) Yesu Khristu ndiyu chigaŵa chakwamba cha “mbewu” yeniyi. (Aga. 3:16) Kufwa ndipuso kuyuskika kwaku Yesu mbukaboni ukulu ukongwa wakuti chilindizga cho ŵanthu ŵenachu chakuti azamufwatulika ku ukapolu wa ubudi ndi nyifwa ntchauneneska. Kufiskika kwa chilindizga chenichi kukoliyana ndi nyengu ya “kuvumbulika kwa ŵana aku Chiuta.” Akhristu akusankhika ndiwu chigaŵa chachiŵi cha “mbewu.” Yiwu ‘azamuvumbulika’ pa nyengu yo azamuwovyiyana ndi Khristu pakutuzgapu vinthu vosi viheni va mucharu chaku Satana ichi. (Chivu. 2:26, 27) Venivi vazamuwovya kuti mbereri zinyaki zo zazamupona pa chisuzgu chikulu zizitaski.—Chivu. 7:9, 10, 14.
w12 3/15 23 ¶12
Tikondwengi ndi Chilindizga Chidu
12 “Chilengedu” chazamupuwa nadi mu Ulamuliru Waku Khristu wa vyaka 1000. Pa nyengu iyi “ŵana aku Chiuta” a unkhakhu azamuvumbulika so pa nyengu yo azamugwira so ntchitu nge asembi limoza ndi Khristu, ndipu azamuwovya ŵanthu kuti ayanduwi ndi sembi yaku Yesu yakuwombole ŵanthu. Nge zika za Ufumu waku Chiuta, ŵanthu azamufwatulika ku ubudi ndi nyifwa. Pavuli paki, ŵanthu akuvwiya azamufwatulika kamanakamana “ku ukapolu wa kuvunda.” Asani azilutirizga kuja akugomezgeka mkati mwa vyaka 1000 mpaka pakumaliya pa mayeseru ngakumaliya, mazina ngawu ngazamulembeka mu “mpukutu waumoyu.” Pa nyengu iyi azamukondwa ndi “wanangwa waunkhankhu wa ŵana aku Chiuta.” (Chivu. 20:7, 8, 11, 12) Chenichi ntchilindizga chamampha ukongwa!
Kufufuza Fundu Zakuzirwa za M’Bayibolu
Kumbi Mukumbuka?
Kumbi “kuŵika maŵanaŵanu pa vinthu va liŵavu” kupambana wuli ndi “kuŵika maŵanaŵanu pa vinthu va mzimu”? (Aro. 8:6)
Munthu yo waŵika maŵanaŵanu pa vinthu vakuliŵavu wachita makhumbiru ngaliŵavu, nyengu zosi wakamba za vinthu vakuliŵavu kweniso wativiwona kuti vakukhumbika ukongwa. Mkhristu yo waŵika maŵanaŵanu pa vinthu va mzimu, walongozgeka ndi mzimu utuŵa ndipu wachita vinthu mwakukoliyana ndi vo Chiuta wakhumba kweniso vo waŵanaŵana. Kuŵika maŵanaŵanu pa vinthu va liŵavu, kulongozge ku nyifwa kweni kuŵika maŵanaŵanu pa vinthu va mzimu, kulongozge ku umoyu wamuyaya.—w16.12, pp. 15-17.
w09 11/15 7 ¶20
Kumbi Mapempheru Nginu Ngalongo Kuti Ndimwi Munthu Wamtundu Wuli?
20 Nyengu zinyaki vingachitika kuti tiziŵa cha vo tingakamba mu pempheru lapakutija. Paulo wangukamba kuti: “Suzgu njakuti tiziŵa cha vo titenere kupempha nge mo tikhumbikiya, kweni madandawulu ngo titondeka kukamba, mzimu [wakupaturika] uŵeyere mumalu mwaku isi. Kweni [Chiuta] mweniyo wafufuza mitima waziŵa vo mzimu ung’anamuwa.” (Aro. 8:26, 27) Yehova wakuchitiska kuti mapempheru nganandi ngalembeki mu Bayibolu. Iyu walondere mapempheru ngenanga ngo ngakulembeka kali nge kuti ngatuliya kwaku isi ndipu watitichitiya vo takhumbikanga kupempha. Chiuta watitiziŵa umampha, ndipu waziŵa so umampha vo wangukambiya mzimu waki kuti ukambi kuziya mu ŵanthu wo wanguŵagwiriskiya ntchitu kuti alembi Bayibolu. Yehova wamuka mapempheru ngidu asani mzimu “uŵeyere mumalu mwaku isi.” Kweni asani tayamba kungaziŵa Mazu Ngaku Chiuta, fundu zakuti tikambi mu pempheru zituza liŵi ukongwa mumaŵanaŵanu ngidu.
FEBRUARY 25–MARCH 3
CHUMA CHAKUTULIYA M’MAZU NGAKU CHIUTA | AROMA 9-11
“Ntharika ya Chimiti cha Maolivi”
w11 5/15 23 ¶13
‘Zeru Zaku Chiuta Zapachanya Ukongwa!’
13 Paulo wanguyeruzgiya ŵanthu wo ŵe mugulu la mbewu yaku Abrahamu ndi mphanda za chimiti cha maolivi chakuyeruzgiya. (Aro. 11:21) Chimiti cha maolivi chakuchita kupanda chimiya kufiskika kwa chilatu chaku Chiuta cho wenga nachu pakwamba po wachitanga phanganu ndi Abrahamu. Msisi wa chimiti ichi ngwakupaturika ndipu umiya Yehova yo wapereka umoyu kwa Ayisirayeli auzimu. (Yesa. 10:20; Aro. 11:16) Chisina cha chimiti cha maolivi ichi chimiya Yesu chifukwa ndiyu chigaŵa chakwamba cha mbewu yaku Abrahamu. Mphanda zosi za chimiti ichi, zimiya “chiŵerengeru chakukwana” cha ŵanthu wo ŵe mugulu lachiŵi la mbewu yaku Abrahamu.
w11 5/15 24 ¶15
‘Zeru Zaku Chiuta Zapachanya Ukongwa!’
15 Kumbi Yehova wangufiska wuli chilatu chaki? Paulo wangukonkhoska kuti mphanda za chimiti cha maolivi chamudondu zingubatikika kuchimiti cha maolivi chakuchita kupanda kuti zisere mumalu mwa zo zingudumulika. (Ŵerengani Aroma 11:17, 18.) Mwaviyo, tingakamba kuti Akhristu akusankhika amitundu yinyaki wo ŵenga mumpingu wa ku Roma, angubatikika kuchimiti cha maolivi mwakuphiphirisa. Venivi vinguchitiska kuti nawu aje chigaŵa cha mbewu yaku Abrahamu. Pakwamba ŵenga nge mphanda za chimiti cha maolivi chamudondu ndipu ŵengavi mwaŵi wewosi wakuja chigaŵa cha phanganu lapade lenili. Kweni Yehova wanguŵajuliya nthowa kuti aje Ayuda auzimu.—Aro. 2:28, 29.
w11 5/15 25 ¶19
‘Zeru Zaku Chiuta Zapachanya Ukongwa!’
19 Khumbu laku Yehova lakukwaskana ndi “Isirayeli waku Chiuta” lifiskika mwakuziziswa ukongwa. (Aga. 6:16) Malinga ndi vo Paulo wangukamba, “Ayisirayeli wosi azamutaskika.” (Aro. 11:26) Mu nyengu yakuŵikika yaku Yehova, “Ayisirayeli wosi,” kung’anamuwa chiŵerengeru chakukwana cha Ayisirayeli auzimu, azamuluta kuchanya kuchiteŵete nge mafumu kweniso asembi. Palivi chechosi cho chingatondekesa khumbu laku Yehova!
Kufufuza Fundu Zakuzirwa za M’Bayibolu
w13 6/15 25 ¶5
Zomerezani Ulongozgi Waku Yehova Kuti Ukuwumbeni
5 Kumbi Chiuta wagwiriskiya wuli ntchitu udindu waki asani ŵanthu akana kuwumbika ndi iyu, yo ndi Wakuwumba Mura? Ŵanaŵaniyani vo vichitika asani wakuwumba watondeka kuwumba chiyaŵi cho iyu wakhumbanga chifukwa chakuti dongu ndamampha cha. Wakuwumba wangawumba chiyaŵi chinyaki pamwenga kutaya waka dongu lo. Asani dongu ndiheni, kanandi suzgu yituŵa ndi wakuwumba. Kweni ivi vipambana ndi Wakuwumba widu. (Mara. 32:4) Asani munthu wasintha cha po Yehova watimuwumba, nyengu zosi munthu yo ndiyu waja wakusuzga. Yehova wagwiriskiya ntchitu udindu waki pa ŵanthu nge mo wachitiya wakuwumba viyaŵi, iyu wasintha kachitiru ka vinthu mwakukoliyana ndi mo ŵanthu achitiya asani awumbika. Ŵanthu wo azomereza kuwumbika ayanduwa ukongwa. Mwakuyeruzgiyapu, Akhristu akusankhika ndi “viyaŵi va lisungu” ndipu awumbika kuti aje ‘viyaŵi vakuzirwa.’ Kweni ŵanthu wo asuska Chiuta ŵe mugulu la “viyaŵi va ukali vakwenere kunangika.”—Aro. 9:19-23.
it-1 1260 ¶2
Sanji
Phamphu Lambula Kwenere. Munyaki wangaja ndi phamphu lamampha pamwenga sanji zamampha pa vifukwa vinyaki kweni wangachita vinthu vambula kwenere vo Chiuta wangakondwa navu cha. Ndimu venge ndi Ayuda anandi munyengu ya akutumika. Yiwu ayesesanga kulondo Dangu laku Mozesi muvakuchita vawu vosi kuti ajilongo kuti mbarunji ukongwa. Kweni Paulo wangulongo kuti phamphu lawu lenga lambula kwenere chifukwa aziŵanga vinthu mwauneneska cha. Ndichu chifukwa chaki angulondiyaku cha urunji chayiwu wakutuliya kwaku Chiuta. Yiwu akhumbikanga kuziŵa vo anangisanga ndi kupempha Chiuta kuziya mwaku Khristu kuti aje arunji ndipuso afwatuki ku vo Dangu lakambanga. (Aro. 10:1-10) Saulo wa ku Tariso wenga yumoza wa ŵanthu wo alondonga ukongwa marangu nga Ayuda ndipu wangufika mpaka pa ‘kuwutombozga ukongwa mpingu waku Chiuta ndi kuwunanga.’ Iyu wangalondonga ukongwa marangu ndipu wawonanga kuti ‘wenga wambula kalema.’ (Aga. 1:13, 14; Afi. 3:6) Kweni phamphu laki pa nkhani yakulondo ukongwa marangu nga Ayuda lenga lambula kwenere. Iyu wengavi chinyengu mumtima waki. Ndichu chifukwa chaki Yehova wangumuchitiya lisungu likulu kuziya mwaku Khristu ndipu wangumusintha kuti wayambi kusopa Chiuta mwauneneska.—1 Timo. 1:12, 13.