Mo Tingaleke Kusambira ndi Munthu yo Waleka Kuluta Panthazi

KUMBI VENIVI VAKUKHUMBIKA WULI?: Ŵanthu akhumbika kuti adanengi zina laku Yehova kuti azitaskiki. (Aro. 10:13, 14) Kweni mbanthu wosi cha wo azomera kusambira Bayibolu wo akhumba kulondo fundu zamampha zaku Yehova. Nyengu yo tigwiriskiya ntchitu mu uteŵeti njakukhumbika ukongwa chifukwa titovya ŵanthu wo akhumbisiska kusintha umoyu wawu kuti ayambi kukondwesa Yehova. Kweni asani munthu yo tisambira nayu waluta panthazi cha chinanga kuti tasambira nayu kwa nyengu yitali, vingaŵa umampha kuleka kusambira nayu ndi kwamba kusambira ndi anyaki wo Yehova watiŵaguziya kwaku iyu kweniso ku gulu laki. (Yoha. 6:44) Tingaziyamba so kusambira ndi munthu yo asani waziyamba kulongo ‘maŵanaŵanu ngamampha ngakumuwovya kuti wazisaniyi umoyu wamuyaya.’—Machi. 13:48.

KUMBI TINGACHITA WULI VENIVI?:

• Muwongeni yo musambira nayu chifukwa cha kuyesesa kuti waziŵi uneneska.—1 Timo. 2:4

• Mukambiyeni umampha wakugwiriskiya ntchitu vo wasambira.—Luka 6:46-49

• Mukonkhoskiyeni mwachanju ntharika yaku Yesu ya wakumija mbewu, ndipu mupempheni kuti waŵanaŵaniyi vinthu vo vitimuweze vuli.—Mate. 13:18-23

• Mukonkhoskiyeni mwakuphwere chifukwa cho mulekiyengi kusambira nayu Bayibolu

• Mukambiyeni kuti muyendiyengeku kaŵikaŵi kuti muzimuchiskengi. Mukambiyeni so kuti mungaziyamba so kusambira nayu kunthazi asani wangasintha

WONERIYANI VIDIYO, PAVULI PAKI MUKANI MAFUMBU YANGA:

• Kumbi ndi vinthu wuli vo vakambika mu vidiyo iyi vo vilongo kuti yo wasambiranga Bayibolu walutanga panthazi cha?

• Kumbi mupharazgi wangumuwovya wuli wakusambira Bayibolu kuti waziŵi kuti wakhumbikanga kusintha umoyu waki?

• Kumbi mupharazgi wangukambanji vakulongo kuti wangaziyamba so kusambira nayu munthu yo kunthazi?