Malifalensi nga Nkhani za Unganu wa Umoyu Widu Wachikhristu Ndipuso Uteŵeti
NOVEMBER 4-10
CHUMA CHAKUTULIYA MU MAZU NGAKU CHIUTA | 1 YOHANE 1-5
“Mungayanjanga Charu Cha Pamwenga Vinthu va Mucharu”
w05 1/1 10 ¶13
Londoni Chakuwoniyapu cho Yesu Wakutipaska
13 Ŵanthu anyaki angakamba kuti ndi vinthu vosi cha va mucharu vo viheni. Chinanga kuti veviyo, charu kweniso vinthu vakukopa vo ve mucharu ichi vingatitimbanyizga kuti tileki kuteŵete umampha Yehova. Ndipu pa vinthu vosi va mucharu, palivi cho chingatiwovya kuti tindere kufupi ndi Chiuta. Kweni tingawa mu suzgu yikulu asani titanja ukongwa vinthu va mucharu, chinanga ndi vinthu vo vingawoneka kuti viheni cha pakuvija. (1 Timote 6:9, 10) Kukamba uneneska, vinthu vinandi va mucharu ichi viheni ndipu vingatitimbanyizga. Mwakuyeruzgiyapu, asani tiwonere mafilimu pamwenga mapulogilamu nga pa TV ngo ngalongo vachiwawa, kwanja vinthu vakuliŵavu, pamwenga malusu ngaheni ngakugonana, tingayamba kuwona kuti palivi suzgu kuviwonere ndipu tingawira muchiŵana. Kweniso, asani titanjana ndi ŵanthu wo akhumbisiska kuja ndi umoyu wapachanya pamwenga wo akhumba kusazgiyaku mabizinesi ngawu, nasi tingayamba kuwona kuti vinthu venivi ndivu vakukhumbika ukongwa.—Mateyu 6:24; 1 Akorinto 15:33.
Ŵanaŵaniyani Mtundu Wa Munthu Yo Mutenere Kuja
18 Fundu yinyaki yo yingatiwovya kuti tikani vinthu “va mucharu,” nkhukumbuka mazu ngo Yohane wangukambirika kuti walembi. Iyu wanguti: “Charu ndi khumbiru laki viluta, kweni munthu yo wachita khumbu laku Chiuta, waŵengeku mpaka muyaya.” (1 Yoha. 2:17) Charu ichi chaku Satana, chiwoneka nge kuti chijaliriyengi mpaka muyaya kweni zuŵa ndimoza, chazamumala. Mucharu chaku Satana ichi mulivi chinthu cho chijengi mpaka muyaya. Kukumbuka fundu yeniyi, kutiwovyengi kuti tileki kunyengeka ndi nyambu zaku Dyaboli.
Kufufuza Fundu Zakuzirwa za mu Bayibolu
Marangu Ngaku Yehova Ngakugomezgeka
14 Mu Malemba nga Chigiriki Ngachikhristu, mwe fundu zinandi zo zititikumbuska kuti tiyanjanengi. Yesu wakukamba kuti ‘kwanja munyaku nge mo utijiyanjiya wamweni’ ndi dangu lachiŵi likulu ukongwa. (Mate. 22:39) Mwakuyanana ŵaka, Yakobe mvurwa waku Yesu, wangukamba kuti chanju ndi “dangu laufumu.” (Yako. 2:8) Wakutumika Yohane wakulemba kuti: “Akwanjiwa, nditikulembiyani dangu lifya cha, kweni dangu lakali lo mwaja nalu kutuliya pakwamba.” (1 Yoha. 2:7, 8) Kumbi Yohane wang’anamuwanganji po wangukamba kuti “dangu lakali”? Iyu wang’anamuwanga dangu lo lakambanga za chanju. Dangu ili lenga “lakali” chifukwa Yesu wangulikamba “kutuliya pakwamba.” Yapa ndipu pajumpha vyaka vinandi kutuliya po wangulikambiya. Kweni lenga so “lifya” chifukwa chakuti munthu wakhumbikanga kupereka umoyu waki chifukwa chakwanja munyaki. Venivi ndivu akusambira ŵaki akhumbikanga kuzichita kunthazi pakunozgeke masuzgu ngo anguzikumana nangu. Nge akusambira aku Khristu, titenere kuwonga marangu ngo ngatititcheŵeska kuti tileki kuja ndi jalidu lakujiyanja lo lawanda mucharu ichi, lo lingachitiska kuti tileki kwanja anyidu.
it-1 862 ¶5
Kugowoke
Mphakwenere kupemphere anyidu kuti Chiuta waŵagowoke. Tingapemphere so mpingu wosi. Mozesi nayu wangupemphere mtundu wa Ayisirayeli. Iyu wangusumuwa maubudi ngawu ndi kupempha kuti Yehova waŵagowoke ndipu wanguŵagowoke nadi. (Maŵe. 14:19, 20) Kweniso, pa nyengu yo Solomoni wapaturiyanga nyumba yakusopiyamu kwaku Chiuta, wangupemphera kuti Yehova waŵagowokiyengi ŵanthu ŵaki asani alapa maubudi ngawu ndi kuleka vinthu viheni vo achitanga. (1 Ŵakaro. 8:30, 33-40, 46-52) Ezara wangumiya mtundu wosi wa Ayuda wo anguwere kwawu ndipu wangusumuwa maubudi ngawu pakweru. Pempheru laki lakutuliya pasi pamtima ndipuso lakuchiska linguwovya ukongwa chifukwa Ayuda anguchitapu kanthu mwaliŵi kuti Yehova waŵagowoke. (Ezra 9:13–10:4, 10-19, 44) Yakobe nayu wangukamba kuti munthu yo watama mwauzimu watenere kudana ŵara a mpingu kuti amupemphere, ndipu “asani wakuchita maubudi,” wagowokerekengi. (Yako. 5:14-16) Kweni “pe ubudi wo uchitiska nyifwa,” kubudiya mzimu wakupaturika. Ubudi uwu ung’anamuwa kuchitiya dala maubudi ndipu munthu yo wachita venivi wangagowokereka cha. Mwaviyo, Mkhristu wakhumbika cha kupemphere munthu yo wachitiya dala maubudi.—1 Yoha. 5:16; Mate. 12:31; Ahe. 10:26, 27; wonani pamutu wakuti SIN, I; SPIRIT.
NOVEMBER 11-17
CHUMA CHAKUTULIYA MU MAZU NGAKU CHIUTA | 2 YOHANE 1–YUDA
“Titenere Kufwiyapu Kuti Tije mu Uneneska”
w04 9/15 11-12 ¶8-9
“Saniyani Nthazi mwa Ambuya”
8 Titiziziŵa umampha ukongwa nthowa zo Satana wagwiriskiya ntchitu chifukwa Malemba ngakukambiya limu mauryarya ngaki. (2 Akorinto 2:11) Pakulimbana ndi Yobu yo wenga munthu murunji, Dyaboli wangugwiriskiya ntchitu masuzgu ngakulu nga za chuma, nyifwa ya ŵana ŵaki, kususkika ndi muwolu waki, matenda kweniso kuneneka ndi ŵanthu wo awonekanga nge mabwezi ngaki. Yobu wangusuzgika maŵanaŵanu ndipu wawonanga kuti Chiuta wamujowo. (Jobu 10:1, 2) Chinanga kuti mazuŵa nganu Satana wagwiriskiya ntchitu nthowa zenizi mwachindunji cha, kweni masuzgu ngenanga ndingu Akhristu anandi akumana nangu. Ndipu Dyaboli wangasaniriyapu mpata pa masuzgu ngenanga.
9 Vinthu vo vingatimbanyiza ubwezi widu ndi Chiuta vinandi ukongwa mu nyengu yinu yakumaliya. Tija mucharu cho ŵanthu anandi apenja ukongwa vinthu vakuliŵavu mumalu mwakuja pa ubwezi ndi Chiuta. Nyengu zinandi pa TV kweniso pa intaneti akamba kuti kugonana munthowa yambula kuzomerezeka ndiku kuchitiska kuti ŵanthu akondwengi. Ndipu ŵanthu anandi atanja “masaza mumalu mwakwanja Chiuta.” (2 Timote 3:1-5) Maŵanaŵanu ngenanga ngangatitimbanyiza kuti tileki kuteŵete Chiuta. Kweni tikhumbika ‘kufwiyapu kuti tivikiliyi chivwanu.’—Yuda 3.
Kufufuza Fundu Zakuzirwa za mu Bayibolu
it-2 279
Maphwandu Ngakulongo Kuti Ayanjananga
Bayibolu litingakonkhoska cha maphwandu yanga kuti ngenga nga mtundu wuli kweniso kuti ngachitikanga kanandi wuli. (Yuda 12) Yesu Khristu kweniso akutumika ŵaki angukambapu cha kuti tichitengi maphwandu yanga. Ndipu viwoneka kuti palivi dangu lo likamba kuti tichitengi maphwandu ngenanga. Ŵanthu anyaki akamba kuti nyengu zinyaki Akhristu wo ŵenga akukhupuka anozganga maphwandu ndipu adananga Akhristu anyawu wo ŵenga akavu. Pa maphwandu yanga, paŵanga ŵana alanda, vyoko, ŵanthu akukhupuka kweniso akavu ndipu wosi aryiyanga pamoza.
it-2 816
Mwa
Mazu nganyaki nga Chigiriki (spi·lasʹ) ngakamba za mwa wo ukubisika pasi pa maji. Yuda wangugwiriskiya ntchitu mazu ngenanga pakukamba za ŵanthu anyaki wo angusere mumpingu wachikhristu ndi vilatu viheni. Mya yakubisika pasi pamaji yiswera cha kunanga masitima. Mwakuyanana ŵaka, ŵanthu ŵenaŵa ndiwu ayambisanga masuzgu mumpingu. Pakukamba za ŵanthu ŵenaŵa, Yuda wanguti: “Yiwu ndi mya yakubisika pasi pa maji asani aturya namwi pa maphwandu ngakulongo kuti mutanjana ngo muchita.”—Yuda 12.
“Wangukondwesa Chiuta”
Kumbi uchimi waku Enoke wenga wakuti wuli? Wenga wakuti: “Awonani! Yehova wanguza ndi masawuzandi nganandi nga akupaturika ŵaki kuti waziyeruzgi ŵanthu wosi ndi kuŵasaniya ndi mulandu wosi wo aleka kopa Chiuta chifukwa cha vakuchita vawu viheni vo anguvichita kweniso vinthu vosi viheni vo amukambanga.” (Yuda 14, 15) Chinthu chakwamba cho mungawona pa mavesi yanga ntchakuti Enoke wangukamba nge kuti Chiuta wachita kali vo vakambika. Pavuli paki, achimi anandi achitanga so viyo. Fundu njakuti: Achimi akamba vinthu vo vazamuchitika nadi kunthazi, mwakuti ativikamba nge kuti vachitika kali.—Yesaya 46:10.
“Wangukondwesa Chiuta”
Chivwanu chaku Enoke chingatiwovya kuti tijifumbengi asani tiwona charu nge mo Chiuta watichiwone. Uthenga wacheruzgu wo Enoke wapharazganga mwachiganga mu nyengu yaki, ngwakovya so mazuŵa nganu. Mwakukoliyana ndi vo Enoke watcheŵeskanga ŵanthu, Yehova wanguzisa Chigumula pa ŵanthu wo alekanga kopa Chiuta mu nyengu yaku Nowa. Kweni vo vinguchitika pa nyengu iyi, vilongo waka vo Yehova wachitengi pambula kuswera. (Mateyu 24:38, 39; 2 Peturo 2:4-6) Mwakuyanana waka, mazuŵa nganu Chiuta ndi angelu ŵaki masawuzandi, mbakunozgeka kuti apereki cheruzgu ku ŵanthu wo aleka kopa Chiuta. Weyosi watenere kukumbuka uchimi waku Enoke kweniso kukambiyaku anyaki. Abali ŵidu kweniso anyidu angakoliyana navu cha vo isi tigomezga. Nyengu zinyaki tingajivwa nge kuti te tija. Kweni Yehova wangumuleka cha Enoke ndipuso waŵalekengi cha ateŵeti ŵaki akugomezgeka mazuŵa nganu.
NOVEMBER 18-24
CHUMA CHAKUTULIYA MU MAZU NGAKU CHIUTA | CHIVUMBUZI 1-3
“Ndiziŵa Ntchitu Zaku”
w12 10/15 14 ¶8
Kumbi Mulongo Mzimu Wuli?
8 Kuti tileki kuja ndi mzimu wenuwu, tikhumbika kukumbuka kuti Bayibolu lilongo kuti Yesu wakukoleze ‘nyenyezi 7 kujanja laki lamaryi.’ “Nyenyezi” izi zimiya ŵara akusankhika, kweni zingamiya so ŵara anyaki wosi mumipingu yosi. Yesu walongozga “nyenyezi” zo ze mumanja mwaki munthowa yo iyu wawona kuti njakwenere. (Chivu. 1:16, 20) Mwaviyo, chifukwa chakuti iyu ndiyu mutu wa mpingu wachikhristu, Yesu walongozga mawupu ngosi nga ŵara. Asani mura munyaki wakhumbika kupaskika ulongozgi, Yesu yo ‘masu ngaki ngayanana ndi mulipu wa motu’ wawona ndipu wachitapu kanthu pa nyengu yaki kweniso munthowa yakwenere. (Chivu. 1:14) Kweni pasonupanu tikhumbika kupereka ulemu wakwenere ku ŵanthu wo akusankhika ndi mzimu wakupaturika, chifukwa Paulo wangulemba kuti: “Muvwiyengi ŵanthu wo alongozga pakati pinu ndipuso mujithereskengi kwaku yiwu, pakuti yiwu awonere maumoyu nginu nge ŵanthu wo azamumuka mulandu. Muchitengi venivi kuti agwiri ntchitu yawu mwalikondwa kweniso mwambula kudandawula, chifukwa asani mungachita viyo, mupwetekekengi.”—Ahe. 13:17.
w12 4/15 29 ¶11
Yehova Watitivikiliya Kuti Tizitaskiki
11 Chiwona cho che mubuku la Chivumbuzi chaputala 2 ndi 3, chilongo kuti Yesu Khristu wanguyendere mipingu 7 ya ku Asia Minor. Chiwona ichi chilongo kuti Yesu wawonanga vinthu chayivu vo vachitikanga mumipingu yeniyi. Mumipingu yinyaki, wanguzumbuwa ndi mazina nga ŵanthu viyo. Iyu wangukamba vinthu vamampha vo vachitikanga mumpingu wewosi kweniso wangupereka ulongozgi wakwenere. Kumbi venivi vilongonji? Kufiskika kwa chiwona ichi kulongo kuti mipingu 7 yimiya Akhristu akusankhika wo ŵengaku chaka cha 1914 chati chajumpha. Ndipu ulongozgi wo mipingu 7 yeniyi yingulonde ndiwu so ugwira ntchitu mazuŵa nganu mumipingu yosi ya ŵanthu aku Chiuta pacharu chosi chapasi. Mwaviyo, mphakwenere nadi kukamba kuti Yehova wagwiriskiya ntchitu Mwana waki pakulongozga ŵanthu ŵaki. Kumbi tingachita wuli kuti tiyanduwi ndi ulongozgi wenuwu?
w01 1/15 20-21 ¶20
Muyendiyengi Limoza ndi Gulu Laku Yehova
20 Kuti muyendiyengi limoza ndi gulu laku Yehova mukhumbika kuziŵa udindu wo Chiuta wakupaska Yesu Khristu nge “mutu wa mpingu.” (Aefeso 5:22, 23) Wonani fundu yinyaki yakukhumbika yo ye pa Yesaya 55:4, po pakamba kuti: “Wonani! Ini [Yehova] ndamuŵika kuti waje kaboni ku mitundu ya ŵanthu, ndipuso nge mulongozgi kweniso wakulamuliya mitundu ya ŵanthu.” Tikayika cha kuti Yesu watiyiziŵa umampha ntchitu yakulongozga. Watiziziŵa so umampha mbereri zaki kweniso vo zichita. Pa nyengu yo wangwende mipingu 7 ya ku Asia Minor, maulendu ngankhondi wangukamba kuti: “Ndiziŵa ntchitu zaku.” (Chivumbuzi 2:2, 19; 3:1, 8, 15) Yesu waziŵa so vo tikhumbika pa umoyu, nge mo Yehova wachitiya. Yesu wechendapereki Pempheru Lakuwoniyapu, wangukamba kuti: “Awusemwi aziŵa vo mukhumba chinanga mphanyengu yo mwechendaŵapemphi.”—Mateyu 6:8-13.
Kufufuza Fundu Zakuzirwa za mu Bayibolu
Ufumu Waku Chiuta Utuzgapu Arwani Ŵaki
10 Kuyeruzga. Pavuli paki, arwani wosi a Ufumu azamuchichizgika kuwona chakuchitika cho chazamusazgiyaku urwirwi wawu. Yesu wangukamba kuti: “Ŵanthu azamuwona Mwana wa munthu wachiza mu mitambu ndi nthazi zikulu ndipuso unkhankhu.” (Mariko 13:26) Vakuchitika vakuziziswa ivi vazamulongo kuti Yesu waza kuti waziyeruzgi. Mu uchimi wenuwu wa mazuŵa ngakumaliya, Yesu wangukonkhoska so vinandi vakukwaskana ndi cheruzgu cho chazamuperekeka pa nyengu iyi. Vo wangukonkhoska visanirika muntharika ya mbereri ndi mbuzi. (Ŵerengani Mateyu 25:31-33, 46.) Ŵanthu akugomezgeka ku Ufumu waku Chiuta azamuyeruzgika nge “mbereri” ndipu ‘azamutumphuska mitu yawu,’ chifukwa azamuziŵa kuti ‘utaski wawu we pafupi.’ (Luka 21:28) Kweni arwani a Ufumu azamuyeruzgika nge “mbuzi” ndipu azamuliya chifukwa azamuziŵa kuti “abayikengi kwamuyaya.”—Mate. 24:30; Chivu. 1:7.
w09 1/15 31 ¶1
Fundu Zikulu za Mubuku la Chivumbuzi—Chigaŵa Chakwamba
2:7—Kumbi “paradayisu waku Chiuta” ntchinthu wuli? Pakuti mazu yanga ngaluta kwa Akhristu akusankhika, paradayisu mwenuyu watenere kuti wang’anamuwa paradayisu wakuchanya, malu chayingu ngo kuja Chiuta. Akhristu akusankhika wo mbakugomezgeka azamupaskika mphotu yakurya “va muchimiti chaumoyu.” Venivi vilongo kuti azamulonde umoyu wambula kufwa.—1 Akori. 15:53.
NOVEMBER 25–DECEMBER 1
CHUMA CHAKUTULIYA MU MAZU NGAKU CHIUTA | CHIVUMBUZI 4-6
“Ŵanthu Anayi wo Akwera Pamahachi”
Kumbi Ŵanthu Anayi wo Akwera Pamahachi Amiyanji?
Kumbi ndiyani yo wakwera pahachi yituŵa? Buku la Chivumbuzi lo musanirika nkhani yeniyi, lititiwovya kuziŵa munthu mwenuyu. Ilu likamba kuti munthu mwenuyu ndi “Mazu ngaku Chiuta.” (Chivumbuzi 19:11-13) Yesu Khristu ndiyu waziŵika kuti Mazu chifukwa nyengu zinyaki walongoro m’malu mwaku Chiuta. (Yohane 1:1, 14) Iyu wadanika so kuti “Fumu ya mafumu kweniso Mbuya wa ambuya” kweniso waziŵika kuti “Wakugomezgeka kweniso Muneneska.” (Chivumbuzi 19:11, 16) Vakuwoneke limu kuti iyu wakupaskika mazaza nge fumu ndipu wagwiriskiya ntchitu nthazi zaki mwaurunji kweniso mwakwenere. Kweni pe so mafumbu nganyaki ngo titenere kumukika.
wp17.3 4 ¶5
Kumbi Ŵanthu Anayi wo Akwera Pamahachi Amiyanji?
Kumbi ŵanthu anayi ŵenaŵa akukwera zukwanji pamahachi? Yesu yo ndi munthu wakwamba pa ŵanthu yaŵa, wakwamba ulendu waki wati wapaskika Ufumu. (Chivumbuzi 6:2) Kumbi Yesu wakupaskika zukwanji Ufumu kuchanya? Bayibolu lilongo kuti Yesu wati wawere kuchanya, wanguchilindizgapu dankha wechendapaskiki ufumu. (Aheberi 10:12, 13) Yesu wangukambiya akusambira ŵaki vinthu vo vazamulongo kuti iyu wapaskika ufumu. Wanguŵakambiya kuti asani waziyamba kulamuliya kuchanya, vinthu vazamusintha pacharu. Iyu wanguti pazamuja nkhondu, nja ndipuso milili. (Mateyu 24:3, 7; Luka 21:10, 11) Nkhondu Yakwamba Yapacharu Chosi yati yayamba mu 1914, vinguwoneke limu kuti nyengu yo Yesu wakambanga yakwana. Nyengu ya masuzgu yo Bayibolu likamba kuti “mazuŵa ngakumaliya” yingwamba.—2 Timote 3:1-5.
Kumbi Ŵanthu Anayi wo Akwera Pamahachi Amiyanji?
Munthu yo wakwera pahachi iyi wamiya nkhondu. Lemba ili lakamba kuti iyu watuzgapu chimangu pacharu chosi chapasi. Mu 1914, kunguchitika nkhondu yapacharu chosi yo yenga yechendachitikepu. Pavuli paki kunguchitika so nkhondu yachiŵi yapacharu chosi yo yingubayisa ŵanthu anandi. Ŵanthu anyaki akamba kuti kwambiya mu 1914, ŵanthu akujumpha 100 miliyoni akufwa chifukwa cha nkhondu ndipu anyaki anandi angupwetekeka ukongwa.
wp17.3 5 ¶4-5
Kumbi Ŵanthu Anayi wo Akwera Pamahachi Amiyanji?
“Ndinguwona hachi yifipa, yo wangukwerapu wenga ndi sikelu mujanja laki. Ndinguvwa mazu ngo ngachitanga nge kuti ngatuliya pakati pa vamoyu vinayi ngakuti: ‘Kwati yimoza ya tirigu dinari yimoza, ndipu makwati ngatatu nga balire dinari yimoza. Mafuta nga maolivi ndi vinyu kuvinanga cha.’”—Chivumbuzi 6:5, 6.
Munthu yo wakwera pahachi iyi wamiya nja. Lemba ili lilongo kuti nja yazamufika paheni ukongwa mwakuti kilu yimoza (1.08 L) ya tirigu yazamugulika ndi dinari yimoza. Mu nyengu ya akutumika, munthu walondiyanga dinari yimoza asani wagwira ntchitu kwa zuŵa lamphumphu. (Mateyu 20:2) Lemba ili lilongo so kuti makilu ngatatu (3.24 L) nga balire mtengu waki ndi dinari yimoza. Kweni balire ntchakurya chakusika ukongwa kuyeruzgiya ndi tirigu. Banja lo le ndi ŵanthu anandi, lingakwana cha chakurya chenichi. Mwaviyo, pa lemba ili ŵanthu atcheŵeskeka kuti akhumbika kugwiriskiya ntchitu mwazeru chakurya cho ŵe nachu. Mafuta nga maolivi ndi vinyu ndivu vimiya chakurya cha nyengu zosi, mwakukoliyana ndi mo vinthu venge pa nyengu yo buku la Chivumbuzi lalembekiyanga.
wp17.3 5 ¶8-10
Kumbi Ŵanthu Anayi wo Akwera Pamahachi Amiyanji?
Munthu yo wakwera pahachi iyi wamiya nyifwa. Ŵanthu atufwa chifukwa cha milili kweniso vinthu vinyaki. Chaka cha 1914 chati chajumpha, ŵanthu mamiliyoni nganandi angufwa chifukwa cha chifuŵa cha ku Spain. Ŵanthu pafupifupi 500 miliyoni angutama chifuŵa chenichi. Ivi ving’anamuwa kuti munthu yumoza pa ŵanthu atatu wangutama chifuŵa chenichi.
Pavuli paki, pangubuka so matenda nganyaki. Kafukufuku walongo kuti mu vyaka 100 vajumpha, ŵanthu mamiliyoni nganandi angufwa chifukwa cha nthenda ya kasabola. Chinanga kuti mazuŵa nganu madokotala ngakusaniya nthowa zasonu zakuchizgiya matenda, kweni ŵanthu mamiliyoni nganandi atufwa chifukwa cha Ezi, TB ndi maleriya.
Ŵanthu anandi atufwa chifukwa cha nkhondu, nja kweniso milili. Nyifwa yibaya ŵanthu anandi ukongwa ndipu viwoneka kuti palivi vo tingachita.
Kufufuza Fundu Zakuzirwa za mu Bayibolu
re 76-77 ¶8
Unkhankhu wa Mpandu Waufumu Waku Yehova
8 Yohane waziŵanga kuti asembi ndiwu asankhikanga kuti ateŵetiyengi muchihema mu nyengu yakali. Panyaki ndichu chifukwa chaki wanguzizwa wati wawona vo wangukamba pa lemba ili. Iyu wangukamba kuti: “Kuzunguliya mpandu waufumu wosi wo, penga mipandu yaufumu 24, ndipu ndinguwona pamipandu yeniyi paja ŵara 24, wo anguvwala malaya ngatuŵa ndipuso visoti vagolidi kumutu kwawu.” (Chivumbuzi 4:4) Mumalu mwa asembi, wanguwona ŵara 24 aja pamipandu yaufumu kweniso avwala visoti vaufumu. Kumbi ŵara ŵenaŵa mbayani? Yiwu mbanthu anyaki cha, kweni mbanthu wo akusankhika mumpingu wachikhristu ndipu akuyuskika kuti alonde udindu wo Yehova wanguŵalayizga. Kumbi tiziŵa wuli venivi?
re 80 ¶19
Unkhankhu wa Mpandu Waufumu Waku Yehova
19 Kumbi vamoyu venivi vimiyanji? Chiwona cho Ezekiele wangulemba chingatiwovya kuti tisaniyi kwamuka. Ezekiele wanguwona Yehova waja pampandu waufumu pachanya pa galeta lakuchanya, lo layendiyanga limoza ndi vamoyu vo vawonekanga nge mo Yohane wangukonkhoske. (Ezekiele 1:5-11, 22-28) Pati pajumpha nyengu, Ezekiele wanguwona so galeta leniliya lo lenga ndi mpandu waufumu ndipu layendiyanga so limoza ndi vamoyu. Kweni pa nyengu iyi vamoyu ivi wanguvikamba kuti mbakerubi. (Ezekiele 10:9-15) Vamoyu vinayi vo Yohane wanguwona vitenere kuti vamiyanga akerubi anandi aku Chiuta. Akerubi yaŵa ndi vamoyu vo ve ndi udindu wapachanya ukongwa mugulu lauzimu laku Chiuta. Yohane watenere kuti wanguzizwapu cha kuwona kuti akerubi ŵama pasina ndi Yehova, chifukwa pa chihema mu nyengu yakali, akerubi ŵaŵi agolidi ajanga pachanya pa chibenekereru cha bokosi la phanganu lo lamiyanga mpandu waufumu waku Yehova. Mazu ngaku Yehova ngavwikanga kutuliya pakati pa akerubi ŵaŵi ŵenaŵa kuti wapereki marangu ku mtundu wa Ayisirayeli.—Chituwa 25:22; Sumu 80:1.
cf 36 ¶5-6
“Awona! Nkharamu ya Fuku Laku Yuda”
5 Nkharamu yiziŵika kuti ndi nyama yachiganga. Kumbi mukukumanapu masu ndi masu ndi nkharamu yikulu yinthulumi? Asani mukukumanapu nayu, panyaki yenga mumpanda kumalu ngakusungiyaku nyama zamudondu. Chinanga kuti yenga mumpanda, tikayika cha kuti munguchita mantha mbwenu. Asani mulereskana ndi nyama yikulu kweniso yanthazi yeniyi, mungaŵanaŵana kuti palivi chinthu chechosi cho nkharamu yingathaŵa pamwenga kuchita nachu mantha. Ndichu chifukwa chaki Bayibolu likamba kuti “nkharamu ndi nyama yanthazi ukongwa kuluska nyama zosi zamudondu ndipu yitopa chechosi cha.” (Nthanthi 30:30) Ndimu so viliri ndi Khristu. Nayu we ndi chiganga nge nkharamu.
6 Sonu tiyeni tikambiskani nthowa zitatu zo Yesu wangulongore kuti wenga ndi chiganga nge nkharamu: pakuvikiliya uneneska, pakuvikiliya urunji, kweniso pa nyengu yo wasuskikanga. Tiwonengi so mo nasi tingayezge Yesu pa nkhani yakulongo chiganga, kaya tikuwa achiganga pamwenga cha.