Kumbi Umoyu Ukwamba Wuli?

Chiuta ndiyu we ndi “chisimi cha umoyu.” (Salimo 36:9) Kumbi mutiyigomezga fundu yeniyi? Ŵanthu anyaki aŵanaŵana kuti vinthu vamoyu vikujaku waka vija ndipu palivi yo wakuvilenga. Asani venivi vauneneska ndikuti taŵanthu tikujaku waka mwangozi. Kweni asani Yehova Chiuta ndiyu wakulenga vinthu vamoyu ndikuti pe chifukwa cho wakuvilenge.a Asi viyo? Wonani vo Bayibolu likamba pa nkhani ya mo umoyu ukwambiya ndipuso chifukwa cho tingagomezge kuti vo likamba vauneneska.

1. Kumbi charu chapasi ndipuso nyenyezi vikutuliya pani?

Bayibolu likamba kuti: “Pakwamba Chiuta wangulenga kuchanya ndi charu chapasi.” (Genezesi 1:1) Asayansi anandi azomereza kuti charu chapasi kweniso nyenyezi ve ndi zuŵa lo vingwambiya. Kumbi Chiuta wanguvilenga wuli? Iyu wangugwiriskiya ntchitu mzimu wakupaturika wo ndi “nthazi” yaki kuti wapangi chechosi kusazgiyapu nyenyezi, charu ndipuso mapulaneti nganyaki.—Genezesi 1:2.

2. Ntchifukwa wuli Chiuta wakulenga charu chapasi?

Yehova “wakuchilenga ŵaka cha [charu], kweni wakuchipanga kuti ŵanthu ajengemu.” (Yesaya 45:18) Iyu wakulenga charu chapasi ndi vinthu vosi vakukhumbika kuti ŵanthu ajepu mpaka muyaya. (Ŵerengani Yesaya 40:28; 42:5.) Asayansi akamba kuti charu chikupangika mwapade. Palivi so pulaneti linyaki lo le ndi vinthu vosi vakukhumbika kuti ŵanthu aje ndi umoyu.

3. Kumbi taŵanthu tipambana wuli ndi nyama?

Wati wapanga charu chapasi, Yehova wangwamba kulenga vinthu vamoyu. Chakwamba, Iyu wangulenga dankha vakume ndipuso nyama. Pavuli paki, “Chiuta wangulenga munthu mu chikozgu chaki.” (Ŵerengani Genezesi 1:27) Ntchifukwa wuli tingakamba kuti ŵanthu akulengeka mwapade? Pakuti tikulengeka mu chikozgu chaku Chiuta, tingatoliyaku mijalidu yaki, nge chanju ndipuso urunji. Iyu wakutilenga ndi lusu lakusambira vineneru, kukondwa ndi vinthu vakutowa ndipuso sumu. Kweniso mwakupambana ndi nyama, isi taŵanthu tingamusopa Mlengi widu.

SAMBIRANI VINANDI

Wonani ukaboni wakuti umoyu ukupangika mwalusu ndipuso kuti vo Bayibolu likamba pa nkhani ya chilengedu vauneneska. Wonani mo mijalidu yo ŵanthu ŵenayu yititisambiziya vinandi vakukwaskana ndi Chiuta.

4. Umoyu ukupangika mwalusu

Ŵanthu alumbika asani apanga vinthu vinyaki mwakukope ku chilengedu. Sonu kumbi ndiyani yo wakhumbika kulumbika ukongwa pakati paku yo wangwamba kupanga ndi yo wachita kukope? Woneriyani VIDIYO, pavuli paki kambiskanani fumbu ili:

VIDIYO: Kugomeza Kuti Chiuta Waliku (2:43)

• Kumbi ndi vinthu wuli vo ŵanthu akupanga mwakukope ku chilengedu?

Nyumba yeyosi yizengeka ndi munthu. Nanga ndiyani yo wakuzenga pamwenga kupanga vinthu vo ve muchilengedu? Ŵerengani Aheberi 3:4, pavuli paki kambiskanani mafumbu yanga:

• Kumbi ndi vinthu wuli vo vitikukondwesani ukongwa muchilengedu?

• Kumbi muwona kuti mphakuvwika kugomezga kuti vinthu vikuchita kulengeka? Ntchifukwa wuli muwona viyo?

Kumbi muziŵa?

Mungasaniya nkhani zenizi ndipuso mavidiyo ngaki pa jw.org/tog pachigaŵa chakuti “Kumbi Vikuchitika Vija?” ndipuso chakuti “Mo Umoyu Ukwambiya.”

“Mbuneneska kuti nyumba yeyosi ye ndi yo wakuyizenga, kweni Chiuta ndiyu wakuzenga vinthu vosi”

5. Nkhani ya mu Bayibolu yakuti vinthu vikuchita kulengeka njauneneska

VIDIYO: Kachigaŵa ka Vidiyo Yakuti Kumbi Vinthu va Muchilengedu Vikuchita Kulengeka? (3:51)

• Kumbi Bayibolu lisambiza kuti charu chapasi kweniso vinthu vosi vamoyu vingulengeka mu mazuŵa 6 nga maola 24?

• Kumbi muwona kuti nkhani ya mu Bayibolu yakukwaskana ndi chilengedu njakuvwika ndipuso njauneneska? Ntchifukwa wuli muwona viyo?

Ŵerengani Genezesi 1:1, pavuli paki kambiskanani fumbu ili:

• Asayansi akamba kuti chilengedu che ndi chiyambi. Kumbi vo yiwu akamba vikoliyana wuli ndi vo mwaŵerenga mu Bayibolu?

Ŵanthu anyaki aŵanaŵana kuti Chiuta wangupanga dankha kanthu kamana ukongwa ko pavuli paki kasambukanga kamanakamana ndi kuja vamoyu vinandi. Ŵerengani Genezesi 1:21, 25, 27, pavuli paki kambiskanani mafumbu yanga:

• Kumbi Bayibolu lisambiza kuti Chiuta wangulenga dankha kanthu kamana ko kanguzisambuka somba, vinyama ndipuso ŵanthu? Pamwenga wangulenga vamoyu vosi mwakukoliyana ndi “mitundu” yaki?b

6. Chiuta wakuŵalenga mwapade ukongwa ŵanthu

Taŵanthu tipambana ukongwa ndi vinyama vosi vo Yehova wakulenga. Ŵerengani Genezesi 1:26, pavuli paki kambiskanani fumbu ili:

• Pakuti tikulengeka mu chikozgu chaku Chiuta, taŵanthu titanja anyidu ndipuso titiŵachitiya lisungu, kumbi venivi vilongo kuti Chiuta ngwamtundu wuli?

KUMBI MWASAMBIRANJI?

Yehova ndiyu wakulenga charu chapasi, nyenyezi ndipuso vinthu vosi vamoyu.

Kuweriyamu

• Kumbi Bayibolu lisambiza kuti charu chapasi ndipuso nyenyezi vikutuliya pani?

• Kumbi Chiuta wangulenga dankha kanthu kamana ko kanguzisambuka vinthu vinyaki vamoyu, pamwenga vamoyu vosi wanguchita kuvilenga?

• Ntchifukwa wuli tingakamba kuti ŵanthu akulengeka mwapade?

FUFUZANI

Wonani vinthu vinyaki va muchilengedu vo vilongo kuti kwe Mlengi.

“Kumbi Vinthu va Chilengedu Vititisambizanji?” (Jani Masu!, September 2006)

Wonani mo ada angakonkhoske mwana wawu nkhani ya mu Bayibolu yakuti vinthu vikuchita kulengeka.

Yehova Ndiyu ‘Wakulenga Vosi’ (2:37)

Wonani asani fundu yakuti vinthu vamoyu vikuchita kusambuka yikoliyana ndi vo Bayibolu likamba.

“Kumbi Chiuta Wakuchita Kusambusa Vamoyu Vinyaki pa Kulenga Mitundu Yinyaki ya Vamoyu?” (Nkhani ya pa webusayiti)

Wonani asani viwanga vakali ndipuso vo asayansi afufuza vilongo kuti vinthu vamoyu vikuchita kulengeka pamwenga vikujaku waka vija.

Mo Umoyu Ukwambiya—Mafumbu 5 Ngo Titenere Kujifumba (kabuku)