Visopa Vaboza Visambiza Vinthu Vaboza Vakukwaskana Ndi Chiuta

Asani Chiuta ntchanju, ntchifukwa wuli ŵanthu a mu visopa achita vinthu vinandi viheni? Chifukwa chikulu ntchakuti visopa venivi visambiza vinthu vaboza vakukwaskana ndi Chiuta. Kumbi ndi vinthu nivi vaboza vakukwaskana ndi Chiuta vo visopa venivi visambiza? Kumbi iyu watuvwa wuli ndi maboza ngenanga? Nanga wachitengi wuli ndi maboza ngenanga?

1. Kumbi vinthu vo visopa vaboza visambiza vinanga wuli zina laku Chiuta?

“Mumalu mwakugomezga uneneska waku Chiuta, yiwu agomezga boza.” (Aroma 1:25) Mwakuyeruzgiyapu, alongozgi anandi a visopa atiŵasambiza cha ŵanthu ŵawu zina laku Chiuta. Kweni Bayibolu lititichiska kuti tigwiriskiyengi ntchitu zina laku Chiuta. (Aroma 10:13, 14) Asani pachitika chinthu chinyaki chiheni, alongozgi anyaki a visopa akamba kuti ndi khumbu laku Chiuta. Kweni ili ndi boza likulu ukongwa. Ndi Chiuta cha yo wachitiska vinthu viheni. (Ŵerengani Yakobe 1:13.) Vachitima kuti maboza ngenanga ngachitiska ŵanthu anandi kuti alekengi kwanja Chiuta.

2. Kumbi vinthu vo visopa vaboza vichita vinanga wuli zina laku Chiuta?

Yehova watiŵaphwere ŵanthu kweni visopa vaboza vitiŵaphwere cha. Bayibolu likamba kuti “maubudi ngaki ngawunjikana mpaka kuchanya.” (Chivumbuzi 18:5) Visopa vikwamba kali ukongwa kuselere mu ndali zacharu kweniso vikhuŵiza nkhondu. Visopa vizomereza ndipuso vichitiska kuti ŵanthu anandi abayikengi. Alongozgi anyaki a visopa atanja kuja umoyu wapachanya ukongwa ndipu akhumba kuti ŵanthu ŵawu aŵalipirengi ndalama. Vosi venivi vilongo kuti atimuziŵa cha Chiuta ndipu alivi wanangwa wakusambiza vakukwaskana ndi iyu.—Ŵerengani 1 Yohane 4:8.

3. Kumbi Chiuta watuvwa wuli asani wawona visopa vaboza?

Asani yimwi mukwiya ndi vinthu viheni vo vichitika mu visopa vaboza, muŵanaŵana kuti Yehova watuvwa wuli? Iyu watiŵayanja nadi ŵanthu, kweni wakondwa cha ndi alongozgi a visopa wo asambiza vinthu vaboza vakukwaskana ndi iyu kweniso achitiya ŵanthu nkhaza. Iyu wakukambiya limu kuti visopa vosi vaboza vazamubwangandulika, ndipu ‘vazamusanirika so cha.’ (Chivumbuzi 18:21) Pambula kuswera yapa, Chiuta watuzgengepu visopa vosi vaboza.—Chivumbuzi 18:8.

SAMBIRANI VINANDI

4. Ndi visopa vosi cha vo vitimukondwesa Chiuta

Ŵanthu anandi agomezga kuti visopa ve nge miseŵu yakupambanapambana yo yilongozge ŵanthu kwaku Chiuta. Kumbi venivi vauneneska? Ŵerengani Mateyu 7:13, 14, ndipu pavuli paki kambiskanani fumbu ili:

• Kumbi Bayibolu litiwukonkhoska wuli msewu wo ulongozge ku umoyu?

Woneriyani VIDIYO, ndipu pavuli paki kambiskanani fumbu lo le mumphata.

VIDIYO: Kachigaŵa ka Vidiyo Yakuti Kumbi Chiuta Wazomereza Kusopa kwa Mtundu Wewosi? (3:22)

• Kumbi Bayibolu likamba kuti pe visopa vinandi vo vitimukondwesa Chiuta?

5. Vo visopa vichita vilongo cha kuti Chiuta ngwachanju

Vo visopa vaboza vichita, vikoliyana cha ndi vo Chiuta wakhumba. Mwakuyeruzgiyapu, visopa vichitaku nkhondu. Kuti muwoni chakuwoniyapu, woneriyani VIDIYO. Pavuli paki kambiskanani mafumbu.

VIDIYO: Vo Matchalitchi Nganguchita pa Nkhondu Yachiŵi ya Pacharu Chosi (2:22)

• Kumbi ndi vinthu wuli vo matchalitchi nganguchita pa Nkhondu Yachiŵi ya Pacharu Chosi?

• Kumbi yimwi muwona kuti vo yiwu anguchita vamampha?

Ŵerengani Yohane 13:34, 35 ndi 17:16. Pavuli paki kambiskanani mafumbu yanga:

• Kumbi muwona kuti Yehova watuvwa wuli asani visopa vichitaku nkhondu?

• Visopa vaboza vichitiska vinthu vinandi viheni. Kumbi yimwi mwe ndi ukaboni wuli wo ulongo kuti visopa vitondeka kulongo chanju nge mo Chiuta wachitiya?

6. Chiuta wakhumba kuwovya ŵanthu kuti atuwi mu visopa vaboza

Ŵerengani Chivumbuzi 18:4,a ndipu pavuli paki kambiskanani fumbu ili:

• Kumbi mutuvwa wuli mumtima kuziŵa kuti Chiuta wakhumba kuwovya ŵanthu kuti aleki kulandizgika ndi visopa vaboza?

7. Lutirizani kusambira vakukwaskana ndi Chiuta wauneneska

Kumbi mungaleka kusambira vakukwaskana ndi Chiuta chifukwa cha vo visopa vaboza visambiza ndi kuchita? Tiyeruzgiyi kuti mwana munyaki wakana kuvwiya ulongozgi wa awisi. Pavuli paki, mwana yo watuwapu panyumba ndipu watamba kuchita mijalidu yiheni. Awisi akoliyana cha ndi vo mwana wawu wachita. Kumbi pangaŵa pakuvwika kumba mulandu awisi chifukwa cha nkharu ya mwana wawu?

• Kumbi vingaŵa vakuvwika kumumba mulandu Yehova ndipuso kuleka kusambira chifukwa cha vo visopa vaboza vichita?

KUMBI MWASAMBIRANJI?

Visopa vaboza visambiza vinthu vaboza vakukwaskana ndi Chiuta kweniso vichita vinthu vo vileka kumukondwesa. Chiuta wazamutuzgapu visopa vosi vaboza.

Kuweriyamu

• Kumbi yimwi mutuvwa wuli asani muwona vo visopa vaboza visambiza ndi kuchita?

• Kumbi Yehova wativiwona wuli visopa vaboza?

• Kumbi Chiuta wazamuchitanji navu visopa vaboza?

FUFUZANI

Wonani vinthu viŵi vo visopa vaboza vichita vo Chiuta wakondwa navu cha.

“Kumbi Visopa Vosi Vakuyanana? Kumbi Vosi Vilongozge Ŵanthu Kwaku Chiuta?” (Nkhani ya pa webusayiti)

Ntchifukwa wuli Yehova wakhumba kuti timusopiyengi limoza ndi anyidu?

“Kumbi Mphakwenere Kuja Muchisopa?” (Nkhani ya pa webusayiti)

Wasembi munyaki wasuzgikanga maŵanaŵanu ndi vo chisopa chaki chasambizanga. Kweni wangulutirizga mbwenu kupenja uneneska wakukwaskana ndi Chiuta.

“Ntchifukwa Wuli Wasembi Wanguleka Tchalitchi Laki?” (Jani Masu!, February 2015)

Visopa vikwamba kali ukongwa kusambiza vinthu vaboza vo vichitiska kuti ŵanthu awonengi kuti Chiuta watititoliyaku kanthu cha. Kweni wonani uneneska weneku pa nkhani zitatu zo yiwu asambiza.

“Maboza Ngo Ngatondekeska Ŵanthu Kwanja Chiuta” (Chigongwi cha Alinda, November 1, 2013)