2 Timote 1:7—“Chiuta Wakutipaska Mzimu wa Mantha cha”

“Pakuti Chiuta wakutipaska mzimu wa mantha cha, kweni wakutipaska mzimu wa nthazi, wa chanju ndipuso wakuŵanaŵana umampha.”—2 Timote 1:7, Bayibolu la Charu Chifya.

“Chifukwa Chiuta wengavi kutipaska mzimu wa chitenthe, kweni wa nthazi ndi wa chanju ndi wa chilangwa.”—2 Timote 1:7, Mazu Ghaku Chiuta.

Vo Lemba la 2 Timote 1:7 Ling’anamuwa

Chiuta wangawovya munthu kuja ndi chiganga pakuchita cho ntchamampha. Chiuta wakhumba cha kuti munthu wajengi ndi “mantha” ndipu mantha ngenanga ngangamuchitiska munthu kuleka kuchita vinthu vo vingakondwesa Chiuta.

Wonani mijalidu yitatu yo yakonkhoskeka mu vesi ili yo yingakuwovyani kuti muleki kuchita mantha.

“Nthazi.” Akhristu ateŵete Chiuta mwachiganga chinanga angaŵa ndi arwani anandi akofya kweniso angakumana ndi masuzgu. Yiwu awere vuli cha chifukwa cha mantha. (2 Akorinto 11:23-27) Kumbi venivi vichitika wuli? Wakutumika Paulo wangukamba kuti: “Mu vinthu vosi ndija ndi nthazi kuporote mwaku yo watindipaska nthazi.” (Afilipi 4:13) Chiuta wangapaska ateŵeti ŵaki “nthazi yakujumpha yo tituŵa nayu” kuti afiski kumalana ndi masuzgu ngengosi ngo angakumana nangu.—2 Akorinto 4:7

“Chanju.” Kwanja ukongwa Chituta kutovya Mkhristu kuchita cho ntchakwenere mwachiganga. Mwakuyanana waka, kwanja anyidu kuchitiska Mkhristu kuti waŵikengi vakukhumba va anyaki pamalu ngakwamba mumalu mwa vakukhumba vaki, ndipu wachita venivi chinanga mphanyengu yo wasuskika pamwenga pa nyengu yo umoyu waki we pangozi.—Yohane 13:34; 15:13.

“Wakuŵanaŵana umampha.” Mu Bayibolu mazu ngakuti wakuŵanaŵana umampha, ngakamba va Mkhristu yo wasankha vakuchita mwakukoliyana ndi fundu zakutuliya mu Bayibolu. Munthu yo waŵanaŵana umampha walutirizga kuŵanaŵana umampha ndipuso waja munthu wakuvwisa vinthu chinanga wangakumana ndi masuzgu. Iyu wangasankha vakuchita mwakukoliyana ndi mo Yehova waŵanaŵaniya, wachiziŵa kuti ubwezi waki ndi Chiuta ndiwu wakukhumbika ukongwa kuphara vo ŵanthu anyaki angakamba.

Nkhani ya pa 2 Timote 1:7

Buku la mu Bayibolu la 2 Timote lingulembeka ndi wakutumika Paulo nge kalata yakuluta ku mubwezi waki wakwanjiwa ndipuso antchitu anyaki aku Timote. Mu kalata iyi, Paulo wangumuchiska Timote mwachanju kuti walutirizgi kugwira ntchitu mwaphamphu muuteŵeti. (2 Timote 1:1, 2) Timote watenere kuti wenga ndi soni zo zatingi zimutondekesengi kuchita vinthu limoza ndi mpingu wa Chikhristu. (1 Timote 4:12) Kweni Paulo wangumukumbusa Timote kuti we ndi mphasu yo ndi uteŵeti wakupaturika mu mpingu. Iyu wamunguchiska Timote kuti wagwiriskiyengi ntchitu udindu waki nge wakuwonere mu mpingu, asani wapharazga uthenga wamampha ndipuso asani wakunthiyapu chifukwa cha chivwanu chaki.—2 Timote 1:6-8.

Chinanga kuti mazu yanga ngangulembeke Timote, kweni ngachiska so wosi wo akhumba kuteŵete Chiuta mazuŵa nganu kuti Yehova waŵapaskengi vo akhumbikiya kuti vinthu viŵayende umampha, chananga angakumana ndi masuzgu.