Chanju

WEYOSI WAKHUMBA KUYANJIKA. Palivi nthengwa, banja pamwenga ubwezi wo ungakho kwambula chanju. Mwaviyo, chanju ntchakukhumbika kuti ŵanthu aje ndi umoyu wamampha kweniso walikondwa. Kumbi “chanju” ching’anamuwanji?

Chanju cho tikamba yapa, ntchanju cho chiŵapu pakati pa munthurumi ndi munthukazi cha, chinanga kuti nachu ntchakukhumbika. Mumalu mwaki, ntchanju cho chichitiska munthu kuŵanaŵaniya anyaki kweniso kuŵika vakukhumba va ŵanthu anyaki pakwamba. Munthu yo we ndi chanju walongozgeka ndi fundu zaku Chiuta.

Bayibolu likamba kuti: “Chanju chizizipizga ndipuso ntchalisungu. Chanju chichita sanji cha. Chanju chitijilumba cha, chitijikuzga cha, chichita vinthu vambula kwenere cha, chikhumba vakuchija cha ndipuso chikwiya cha. Chisunga vifukwa cha. Chikondwa cha ndi vinthu vambula urunji, kweni chikondwa ndi uneneska. Chiwundiya vinthu vosi, . . . chilindizga vinthu vosi ndipuso chikunthiyapu vinthu vosi. Chanju chimala cha.”—1 Akorinto 13:4-8.

Chanju chaviyo “chimala cha,” kung’anamuwa kuti chiŵengepu nyengu zosi ndipu chingakuwa mukuluta kwa nyengu. Chifukwa chakuti chanju chizizipizga, ntchalisungu ndipuso chigowoka, chitovya kuti “ŵanthu akoliyanengi ukongwa.” (Akolose 3:14) Ŵanthu wo atanjana, aja akuvikilirika ndipuso alikondwa chinanga kuti mbambula kufikapu. Mwakuyeruzgiyapu, tiyeni tikambiskani kukoliyana kwa munthurumi ndi munthukazi munthengwa.

MUNTHENGWA ŴANTHU ‘AKOLIYANA UKONGWA’ CHIFUKWA CHA CHANJU

Yesu Khristu wangusambiza fundu zakukhumbika pa nkhani ya nthengwa. Mwakuyeruzgiyapu, wangukamba kuti: “‘Munthu wazamuleka awisi ndi anyina ndipu wazakujibatika ku muwolu waki, ndipu wosi ŵaŵi azamuja liŵavu limoza’ . . . Mwaviyo, cho Chiuta wamanga pamoza, munthu wangapatuwanga cha.” (Mateyu 19:5, 6) Pa lemba ili pe fundu ziŵi zakukhumbika.

“WOSI ŴAŴI AZAMUJA LIŴAVU LIMOZA.” Palivi chinthu cho chichitiska kuti ŵanthu aje akukoliyana kuluska nthengwa. Chanju chingaŵavikiliya kuti aleki kuchita chigololu, kung’anamuwa kugonana ndi munthu munyaki pade pa muwolu pamwenga mulumu wawu. (1 Akorinto 6:16; Aheberi 13:4) Nthengwa yingamala chifukwa chakuleka kugomezgeka. Kweniso asani mubanja mwe ŵana, angasuzgika ukongwa maŵanaŵanu, angajivwa nge kuti atanjika cha, mbambula kuvikilirika, pamwenga angakwiya.

“CHO CHIUTA WAMANGA PAMOZA.” Kweniso nthengwa njakupaturika. Ŵanthu akutolana wo avwiya fundu iyi, ayesesa kuti nthengwa yawu yije yakukho. Yiwu apenja vifukwa cha vakumalisiya nthengwa yawu asani akumana ndi masuzgu. Chanju chawu chija chakukho ndipuso chikunthiyapu. Chanju chaviyo “chiwundiya vinthu vosi.” Yiwu atesesa kumalana ndi masuzgu kuti munthengwa yawu mulutirizgi kuja chimangu.

Asani apapi atanjana mubanja, vitovya ŵana wosi. Jessica wangukamba kuti: “Ada ndi ama atanjana ndipuso atumbikana ukongwa. Asani ndiwona mo ama atumbikiya ada, . . . nani ndikhumba kuzija nge yiwu.”

Jalidu likulu ukongwa laku Chiuta, ntchanju. Bayibolu likamba kuti “Chiuta ntchanju.” (1 Yohane 4:8) Mwaviyo, tizizwa cha kuti Bayibolu likamba kuti Yehova ndi “Chiuta walikondwa.” (1 Timote 1:11) Nasi tijengi ndi likondwa asani titesesa kuja ndi mijalidu ya Mulengi widu, ukongwa jalidu laki la chanju. Lemba la Aefeso 5:1, 2 likamba kuti: “Muyezgengi Chiuta nge ŵana ŵaki akwanjiwa. Ndipuso lutirizgani kwenda mu chanju.”