Bayibolu le ndi Uthenga Wakutuliya Kwaku Chiuta

Yehova wakutipaska Bayibolu. Bayibolu ndi mphasu yapade ndipu le ndi mabuku 66 ngamanangamana. Kweni mungajifumba kuti: ‘Kumbi Bayibolu likutuliya pani? Kumbi ndiyani yo wakulilemba?’ Kuti timukiki mafumbu yanga, tiyeni tikambiskani mo uthenga waku Chiuta wo we mu Bayibolu ukufikiya kwaku isi taŵanthu.

1. Asani ŵanthu ndiwu alembanga Bayibolu, ntchifukwa wuli tikamba kuti Chiuta ndiyu Mweneku?

Bayibolu likulembeka ndi ŵanthu pafufupi 40 kwa vyaka pafufupi 1,600, kutuliya mu 1513 B.C.E. mpaka cha mu ma 98 C.E. Ŵanthu wo alembanga Bayibolu ŵenga akupambanapambana. Chinanga kuti venga viyo, vo yiwu akulemba vikoliyana. Kumbi venivi vinguchitika wuli? Vinguchitika chifukwa chakuti Chiuta ndiyu Mweneku wa Bayibolu. (Ŵerengani 1 Atesalonika 2:13.) Ŵanthu yaŵa alembanga maŵanaŵanu ngawu cha. Mumalu mwaki, yiwu “alongoronga mazu ngakutuliya kwaku Chiuta mwakulongozgeka ndi mzimu wakupaturika.”a (2 Peturo 1:21) Chiuta wangugwiriskiya ntchitu mzimu waki wakupaturika kuti ulongozgi ŵanthu ŵenaŵa kuti alembi maŵanaŵanu ngaki.—2 Timote 3:16.

2. Kumbi Bayibolu lingawovya ayani?

Uthenga wa mu Bayibolu ungawovya “mtundu wewosi, fuku lelosi, lilimi lelosi ndipuso . . . ŵanthu wosi.” (Ŵerengani Chivumbuzi 14:6.) Chiuta wanguwonesesa kuti Bayibolu lisanirikengi mu vineneru vinandi kuphara buku linyaki lelosi. Pafufupi munthu weyosi mazuŵa nganu wangaŵerenga pamwenga kuvwisiya uthenga waku Chiuta wo we mu Bayibolu. Venivi vichitika kwambula kutole kuti munthu waja pani pamwenga walongoro chineneru wuli.

3. Kumbi Yehova walivikiliya wuli Bayibolu?

Bayibolu lingulembeka pa vinthu vo vinangika liŵi, nge vikumba ndipuso vinthu vinyaki. Kweni ŵanthu wo ayanjanga Bayibolu alikopanga kaŵikaŵi kuti lilutirizgi kusanirika. Chinanga kuti akulamuliya anyaki ndipuso alongozgi a visopa anguyesesa kuti Bayibolu lileki kusanirika, kweni ŵanthu anyaki anguŵika umoyu wawu pangozi kuti alivikiliyi. Yehova wazomerezapu cha kuti munthu pamwenga chinthu chechosi chimutondekesi kukambiskana nasi. Bayibolu likamba kuti: “Mazu ngaku Chiuta ngaŵengeku mpaka muyaya.”—Yesaya 40:8.

SAMBIRANI VINANDI

4. Bayibolu livumbuwa yo ndi Mweneku

Woneriyani VIDIYO. Pavuli paki ŵerengani 2 Timote 3:16, ndipu kambiskanani mafumbu ngo nge mumphata.

VIDIYO: Kachigaŵa ka Vidiyo Yakuti Kumbi Ndiyani yo Wakulemba Bayibolu? (2:48)

• Asani ŵanthu ndiwu akulemba Bayibolu, ntchifukwa wuli lidanika kuti Mazu ngaku Chiuta?

• Kumbi muwona kuti mphakuvwika kugomezga kuti Chiuta wangukambiya nadi ŵanthu kuti alembi maŵanaŵanu ngaki?

5. Bayibolu lajumpha mu masuzgu nganandi

VIDIYO: Kachigaŵa ka Vidiyo Yakuti Awonanga Kuti Bayibolu Ndakuzirwa (William Tyndale) (6:17)

• Pakuti sonu mwaziŵa kuti ŵanthu anyaki anguŵika umoyu wawu pangozi kuti avikiliyi Bayibolu, kumbi muliŵerengengi ndi mtima wosi?

Ŵerengani Salimo 119:97, pavuli paki kambiskanani fumbu ili:

• Ntchifukwa wuli ŵanthu anandi anguŵika umoyu wawu pangozi kuti afwatuliyi Bayibolu?

6. Buku la ŵanthu wosi

Bayibolu lisanirika mu vineneru vinandi ukongwa kuluska buku linyaki lelosi. Ŵerengani Machitidu 10:34, 35, pavuli paki kambiskanani mafumbu yanga:

• Ntchifukwa wuli Chiuta wakhumba kuti Mazu ngaki ngasanirikengi mu vineneru vinandi?

• Ntchinthu wuli chitikukondwesani ukongwa ndi Bayibolu?

KUMBI MWASAMBIRANJI?

Bayibolu ndi Mazu ngaku Chiuta ndipu iyu wawonesesa kuti lisanirika ndi ŵanthu anandi.

Kuweriyamu

• Kumbi ting’anamuwanji asani tikamba kuti Chiuta ndiyu wanguchitiska ŵanthu kuti alembi Bayibolu?

• Ntchinthu wuli chitikukondwesani ndi mo Chiuta wavikiliya Bayibolu ndipuso mo wachitiya kuti lisanirikengi mu vineneru vakupambanapambana?

• Kumbi mutuvwa wuli kuziŵa kuti Chiuta wayesesa kuchita vosi venivi kuti wakambiskanengi namwi?

FUFUZANI

Ŵerengani nkhani za mo Bayibolu lingufwatulikiya kutuwa ku mipukutu yakali.

“Vo Vinguchitika Kuti Bayibolu Lifiki Mpaka Mazuŵa Nganu” (Jani Masu!, November 2007)

Wonani mo Bayibolu lavikilirikiya ku vinthu vitatu vo vatingi vichitiskengi kuti lileki kusanirika.

“Vo Vachitika Kuti Bayibolu Lifiki Mpaka Sonu” (Chigongwi cha Alinda Na. 4 2016)

Wonani mo ŵanthu anyaki anguŵikiya umoyu wawu pangozi kuti afwatuliyi Bayibolu.

Awonanga Kuti Bayibolu Ndakuzirwa (14:26)

Bayibolu lakopeka ndipuso lafwatulika maulendu nganandi. Sonu mungasimikiza wuli kuti uthenga waku Chiuta ukusinthikapu cha?

“Kumbi Bayibolu Akulisintha?” (Nkhani ya pa webusayiti)