Vo Bayibolo Limuka
Nchifukwa wuli Khristu wazengi so?
M’chaka cha 33 C.E., Yesu Khristu wechendaluti kuchanya, wangulayizga kuti wazengi so. Iyu wangujiyeruzgiya ndi munthu wakuzirwa yo wanguluta ku charu chinyaki. Munthu yo wanguchijaku nyengu yitali ndipu wati wawe wanguzija fumu. Yesu wazengi so kuti wazijalikiski boma lamampha kuti liziwusi ŵanthu.—Ŵerengani Luka 19:11, 12.
Yesu wazengi so kuti wazijalikiski boma lamampha kuti liziwusi ŵanthu
Kumbi Khristu wazengi ndi liŵavu wuli? Iyu wanguyuskika nge mungelu. (1 Petro 3:18) Pavuli paki, wanguluta kuchanya ndi kuchija kujanja lamaryi laku Chiuta. (Sumu 110:1) Pati pajumpha nyengu, anguza nayu paurongo paku Yehova Chiuta, ‘Mura wa Mwaka,’ ndipu wangumupaska nthazi kuti wawusi ŵanthu. Mwaviyo, Yesu wachiza wazengi nge munthu cha kweni nge mungelu, Fumu yambula kuwoneka.—Ŵerengani Danyele 7:13, 14.
Kumbi Yesu wazamuchitanji asani waza?
Pa nyengu yo Yesu waziyengi limoza ndi angelu ŵaki kuziyeruzga ŵanthu, wazamuwoneka cha. Iyu wazamubaya ŵanthu aheni ndipu wo azomerezga kuti iyu ndi Fumu, wazamupaska umoyu wamuyaya.—Ŵerengani Mateyu 25:31-33, 46.
Nge Fumu, Yesu wazamusintha charu chapasi kuti chije paradayisu. Iyu wazamuyuska akufwa kuti azije ndi umoyu wamuyaya m’charu chenicho wazamusintha.—Ŵerengani Luka 23:42, 43.